तानसेनमा गाउँका काफल, गाबा, भुटुक र सिब्लीगानको छोपाछोप

0 231

पाल्पा । लकडाउनका कारण अर्गानिक तरकारी तथा अर्गानिक उत्पादन प्रयोग गर्न नपाएका तानसेनबासी बुधवार खुशी भए ।
माथागढी बहुउद्देश्यीय सहकारी संस्था माथागढी चिदीपानीले बुधवार एउटा गाडीभरि गाउँका काफल, काक्रा, गावा, भुटुक, सिब्लीगान, गोलेभेडा, धनिया लगायत स्थानीय जातका अर्गानिक उत्पादन तानसेनमा बिक्री गरेको छ । संस्थाले स्थानीय किसानहरुले उत्पादन गरेका सामाग्रीहरु खरिद गरि सस्तोमा बिक्री गरेको हो । जसका कारण उपभोक्ताहरु निकै खुशी भएका छन् । गाडी आउने थाहा पाएपछि स्थानीयहरु उक्त उत्पादन खरिद गर्न आतुर देखिन्थे ।


तानसेनका ओम रानाले लकडाउनको समयमा बाहिरबाट ल्याइएका तरकारीहरुमा खतरा पनि हुने र महंगो पनि हुने भएपनि गाउँको उत्पादन सस्तोमा अर्गानिक पाउदा निकै खुशी लागेको बताए । संस्थाले कृषि एम्बुलेन्स मार्फत यसरी घर घरमा अर्गानिक उत्पादन पुर्याउन थालेको सहकारीका अध्यक्ष राजकुमार पन्थीले बताए ।

सहकारीमा अधिकांश किसानहरु आवद्ध रहेको र उनीहरुका उत्पादन त्यसै खेर गइरहेको अवस्थामा बजारको मर्मलाई बुझेर सहकारीले यो प्रयास गरेको उनले बताए । यसरी सहकारीले किसानको खेर जाने उत्पादन समेत बिक्री गरिदिन थालेपनि किसानहरु खुशी भएको उनले बताए ।


गाउँका गाबा, सिब्लीगान, भुटुकको ब्यापार खासै हुदैनथ्यो । त्यसै खेर जाने उत्पादनले अहिले राम्रो बजार पाएको छ । किसानले बजार पाउँदा खुशी भएका छन् भने उपभोक्ताहरु सस्तो मुल्यमा अर्गानिक उत्पादन पाउदा खुशी छन् । यो समाचार तयार पार्दासम्म एकैदिन १ लाख बढीको ब्यापार भइसकेको छ ।


जिल्लाका अन्य स्थानीय तहहरुले समेत कृषि एम्बुलेन्स सञ्चालन गरेपनि माथागढीको यो सहकारीको अभियानले जिल्लामा राम्रो सन्देश दिएको छ । यो सहकारीको अभियानलाई स्थानीय सरकारले पनि महत्व दिई सहयोग गर्नु आवश्यक छ ।

Comments
Loading...