अति विपन्न परिवारको घर र साँस्कृतिक महत्वका सम्पदाहरुमा निशुल्क मिटर जडान

0 218

पाल्पा । नेपाल विद्युत प्राधिकरण पाल्पा वितरण केन्द्रले अति बिपन्न घरमा विद्युत पुर्याउने सरकारको नीति अन्तर्गत पाल्पा जिल्लाभर अति बिपन्न तथा साँस्कृतिक महत्वका सम्पदाहरुलाई निःशुल्क मिटर जडान कार्यक्रमसञ्चालन गरिरहेको छ ।


बगनासकाली गाउँपालिका ६ यम्घाको दर्पुक गाउँको बोटे बस्तीमा रहेका १५ जना अति विपन्न बोटे परिवारको लागि निःशुल्क मिटर वितरण गरेको छ । माझी परिवारले विद्युत मिटरका साथै सर्विस केवुल समेत निःशुल्क पाएका छन् । पाल्पा वितरण केन्द्रका कार्यालय प्रमुख रामु श्रेष्ठले हालसम्म करिव ४ सय अति विपन्न र गरिव परिवारलाई निःशुल्क मिटर वितरण गरिएको बताए ।
मिटर निःशुल्क प्राप्त गरे तापनि मासिक उठ्ने बिजुलीको बील भने उपभोक्ताले तिर्नुपर्ने हुन्छ । विजुलीको बिल तिर्न मोबाइलमा इ–सेवा राखी वा गाउँमै रहेको कम्प्युटर पसलबाट बिजुलीको बिल तिर्न सकिने व्यवस्था गरेको छ ।


बोटे परिवारमा निशुल्क मिटर जडान गरेकोमा प्राधिकरणलाई धन्यवाद दिँदै बगनासकाली यम्घाका वडाध्यक्ष लक्ष्मी प्रसाद अधिकारीले गाउँपालिकाले समुदायलाई टिनको छानो छाउन सहयोग गर्ने बताए । वितरण केन्द्रका प्रशासन प्रमुख चतुर्भुज गौतमले नागरिकता, जग्गाधनी प्रमाणपुर्जाको प्रतिलिपि, फोटोसहित धरौटी रकम बुझाएपछि मिटर पाइने जानकारी दिए । मठमन्दिरलगायत साँस्कृतिक सम्पदाहरुको हकमा भने समितिको निर्णय र सिफारिस चाहिने पाल्पा वितरण केन्द्रले जनाएको छ । बोली दैनिकफोटोः रेडियो मुक्तिनाथ

Comments
Loading...