पाल्पा । दैनिक ५ सय बिरामीले उपचार गराउने पाल्पा अस्पताल स्तरोन्नतीमा जग्गा अभाव भएको छ । अस्पतालको पुरानो र राणाकालिन भवनबाट अहिले सेवा प्रवाह हुदै आएको छ ।
अस्पतालको नयाँ भवन निर्माणका लागि पटक पटक बजेट बिनियोजन भएपनि आवश्यकता अनुसारको जग्गा व्यवस्थापन नहुदा बजेट फ्रिज हुने गरेको छ । मापदण्ड अनुसार अस्पताल भवन निर्माणका लागि कम्तीमा १३ रोपनी जग्गा आवश्यक हुन्छ तर पाल्पा अस्पतालको स्वामित्वमा अहिले ८ रोपनी हाराहारी मात्रै जग्गा रहेको छ । यसरी जग्गा अभाव हुदा भवन निर्माणको काम अगाडि बढ्न नसकेको अस्पताल विकास समितिका अध्यक्ष गुरास आत्रेयले बताउनुभयो ।
अस्पतालको भवन निर्माणका लागि आवश्यक जग्गा पु¥याउनका लागि यसअघि पहल भएको हो तर पहल सार्थक हुन सकेको छैन । अस्पताल नजिकै रहेको मोहन कन्या माविको छात्राबास रहेको जग्गा अस्पताललाई दिने र अस्पतालको नाममा हाल स्वास्थ्य कार्यालय रहेको जग्गा र भवन मोहनकन्या माविलाई दिनेगरी सहमति जुटेको छ । मोहन कन्या माध्यमिक बिद्यालयका अध्यक्ष बिधान श्रेष्ठले यो विषयमा जिल्लामा सर्बपक्षीय रुपमा कुनै समस्या नभएपनि नीतिगत रुपमा समस्या भएको बताउनुभयो । मोहन कन्याको उक्त जग्गा के गर्ने भन्ने बिषयमा टुंगो नलाग्दा बिद्यालयले अन्य योजना बनाउन नपाएको उहाँको भनाई छ ।
यसैबीच प्रदेश सरकारका स्वास्थ्य मन्त्री राजु खनालले अस्पताल ब्यवस्थापन समिति, कर्मचारी, जिल्ला स्थित राजनीतिक दल र सरोकारवालासँग अस्पताल सुधारको बिषयमा छलफल गर्नुभएको छ ।
यसैबीच पाल्पा अस्पतालको व्यवस्थापन समितिको टोलीबाट तानसेन नगरपालिकासँग अस्पतालको स्तरोन्नतीलाई जग्गा व्यवस्थापनका लागि तानसेन नगरपालिकालाई ध्यानाकर्षण गराएको छ । जग्गा कम र नगर सरकारको बेवास्ताका कारणले विशेषज्ञ डाक्टर जिल्लामा बस्न नखोज्ने समस्या सिर्जना भएको अवस्था भएको अध्यक्ष आत्रेयले बताउनुभयो । पुरानो भौतिक संरचना र दरबन्दी अनुसारको जनशक्ति अभावका बीचमाअस्पताल बाट गुणस्तरीय सेवा दिएको उहाँको भनाई छ ।
पाल्पा अस्पताल व्यवस्थापन समितिको टोलीसंग अस्पतालको विषयमा छलफल गर्दै जग्गाको स्रोत लाई कसरी अघि बढाउने भन्ने विषयमा सबैसंग तानसेन नगरपालिकाले छलफल गरेर प्रक्रिया अगाडि बढाउने नगरप्रमुख सन्तोषलाल श्रेष्ठले बताउनुभएको छ ।
