पाल्पा । बगनासकाली गाउँपालिका अन्तरगतको बालमैत्री स्थानीय गाउँ समितिको बैठक सम्पन्न भएको छ ।
गाउँपालिका अध्यक्ष एवम् समितिका अध्यक्ष सरस्वती चिदीको अध्यक्षतामा भएको बैठकमा आर्थिक वर्ष २०८०।०८१ मा बालमैत्री कार्यक्रमका लागि बिनियोजित रु २० लाख बाट सञ्चालन गरिने कार्यक्रम र गतिबिधिबारे छलफल समिक्षा गरिएको थियो ।
कार्यक्रममा अध्यक्ष चिदीले गाउँपालिका स्तरीय समितिको पुर्नगठन गरिएको र वडा स्तरमा पनि सोही बमोजिमका कार्यक्रमहरु सञ्चालन गरिने बताउनुभयो ।
बगनासकालीलाई २०७७ चैत १५ गते लुम्बिनी प्रदेशमै पहिलो बालमैत्री पालिका घोषणा गरिएको थियो । तत्पश्चात पालिकाले हरेक बर्ष बालमैत्री शीर्षकमा बजेट बिनियोजन गरि बिभिन्न कार्यक्रमहरु संचालन गर्दै आएको छ । चालु आर्थिक वर्षबाट गाउँपालिका स्तरमा स्थानीय बालकल्याण अधिकारीको दरबन्दी सृजना गरिएको र यही महिनाभित्र पदपूर्ति गर्ने गरि तयारी गरिएको, सडक नाटक लगायत बिभिन्न सचेतनामूलक कार्यक्रम संचालन, बालमैत्री प्रचारप्रसार लगायत बिभिन्न रचनात्मक कार्यक्रमको तयारी गरिएको अध्यक्ष चिदीले बताउनुभयो ।
बैठकमा गाउँपालिका उपाध्यक्ष हरिप्रसाद पाठकले बगनासकाली प्रदेशकै पहिलो बालमैत्री पालिका घोषणा भइसकेको र कार्यान्वयन पक्षमा पनि बगनासकाली पहिलो नै रहने गरी कार्यक्रम सञ्चालन गरिने बताउनुभयो । उहाँले बालमैत्री अभ्यास अन्तरगत पालिका भित्रका अभिभावक बिहीन बालबालिकाहरुको अध्ययन सहयोगार्थ मासिक रु १ हजार सोही कार्यक्रम अन्तरगत प्रदान गर्दै आएको र चालु वर्षमा सो कार्यक्रमले निरन्तरता पाउने बताउनुभयो ।
प्रमुख प्रशासकीय अधिकृत बद्रीनाथ लम्सालले घोषणापछि सही कार्यान्वयनमा बगनाकालीले उचित कार्यक्रम बनाउँदै आएको बताउनुभयो । उहाँले बालमैत्री अभ्यासले प्रत्यक्ष रुपमा बालबालिका लाभान्वित हुने बताउनुभयो ।
यहाँ धेरै पालिकाहरुबाट बालमैत्री अध्ययन तथा जानकारी लिनका लागि टोलीहरु आउने गरेका छन् । टोलीले बगनाकालीको बालमैत्री अभ्यास र कार्यान्वयनको अवस्थाबारे अन्तरक्रिया गर्ने गरेको गाउँपालिका प्रवक्ता टिका बहादुर थापाले बताउनुभयो ।
बैठकमा वडाध्यक्षहरु, कार्यपालिका सदस्य, गैरसरकारी संस्थाका प्रतिनिधि, सुरक्षा निकायका प्रतिनिधि, शिक्षक प्रतिनिधि, बालसञ्जालका प्रतिनिधि, बिद्यालय व्यवस्थापन समितिका प्रतिनिधि, बिभिन्न शाखाका प्रमुख प्रतिनिधि लगायत बालमैत्री स्थानीय गाउँ समितिको कार्यबिधिमा उल्लेख भए बमोजिमका संघसंस्थाका प्रतिनिधिहरुको सहभागिता रहेको थियो । बैठकको सहजीकरण बालमैत्री कार्यक्रमको गाउँपालिकाका फोकल पर्सन सुजन घिमिरेले गर्नुभएको थियो ।
