यान्त्रिकरणको उपयोग गर्दै बगनासकालीका किसान

0
210

पाल्पा । बगनासकाली गाउँपालिकाका किसानहरुले कृषि उद्यम कार्यमा पछिल्लो समय यान्त्रिकरणको भरपुर उपयोग गर्दै आएका छन् । यसरी यान्त्रिकरणको उपयोगसँगै आफूहरुको समय र आर्थिक दुबै बचत भएको किसानहरुको भनाई छ ।

बगनासकाली–९ चापपानी झिरभञ्जाङका पारसमणी बस्यालले केही वर्षअघिसम्म हल गोरुले जोत्ने खेतबारीमा अहिले हाते ट्याक्टरको पहुच पुगेको बताउनुभयो । उहाँले बगनासकाली गाउँपालिकाबाट ५० प्रतिशत अनुदानमा हाते ट्याक्टर लिनुभएको थियो । उहाँसँग अहिले कुटानी पिसानी मिल पनि छ । उक्त मिल पनि गाउँपालिकाले नै ५० प्रतिशत अनुदानमा उपलब्ध गराएको पारसमणीले बताउनुभयो ।

बगनासकाली गाउपालिकाले कषि यान्त्रिकरणमा विशेष जोड दिदै आएको छ । परम्परागत गोरू, हलोजुवा, ढिकी, जातो बिस्तापित हुदै जाँदा ट्याक्टर, मिनि टिलर, सहज खालका कुटानी पिसानी मिलको प्रयोग बढेको किसानहरुको भनाई छ ।

खानीछाप मलेङका यादव न्यौपाने गाउँपालिकाबाट हाते ट्याक्टर ल्याइसकेपछि खेतीपाती गर्न सहज भएको बताउनुभयो । एकातिर समय बचेको छ, अर्कोतिर केही आयआर्जन पनि भएको छ र बचेको समयमा घरायसी काम र सामाजिक पनि गर्न सकिएको छ । न्यौपानेले भन्नुभयो ।

बगनासकाली गाउँपालिकाले किसानहरुको माग संकलन गरी आवश्यकता पहिचानको आधारमा यान्त्रिकरणमा अनुदान उपलब्ध गराउँदै आएको छ । गत आर्थिक वर्ष २०७९÷०८० मा कृषि यान्त्रिकरण कार्यक्रम अन्तरगत गाउपालिकाबाट १७ वटा मिनिटिलर अनुदानमा बितरण गरिएको छ । त्यस्तै वडा नं. १ स्वीकृत कार्यक्रम अन्तरगत कुटानी पिसानी मिल १८ वटा वितरण गरिएको छ । त्यस्तै मकै प्रवर्धन कार्यक्रम अन्तरगत गाउँपालिकाट मिनिटिलर ४ वटा र कुटानी पिसानी मिल ४ वटा वितरण गरिएको छ ।

कृषि यान्त्रिकरण कार्यक्रम अन्तरगतनै खानीछापामा मिनिटिलर ३ वटा, कुटानी पिसानी मिल ७ वटा वितरण गरिएको छ । वडा नं. ५ दर्लमडाँडामा मिनिटिलर ५ वटा, कुटानी पिसानी मिल ८ वटा वितरण गरिएको छ । वडा नं. ९ चापपानीमा मिनिटिलर ६ वटा, कुटानी पिसानी मिल ५ वटा, धान काट्ने मेशिन ५ वटा वितरण गरिएको छ । त्यस्तै कृषि ज्ञान केन्द्रबमे सहयोग, कृषि शाखाको समन्वयमा बगनासकाली बहुउद्देश्यीय सहकारी मार्फत मार्फत मिनी टिलर ७ वटा, स्प्रे मिसीन ५ वटा,डिजीटल तराजु ३ वटा, चाप कटर ५० वटा वितरण गरिएको छ ।

बगनासकाली गाउँपालिकाको आर्थिक वर्ष २०८०,०८१ को नीति तथा कार्यक्रममा आधुनिक कृषि पद्धतीलाई विस्तार गरी परम्परागत निर्वाहमुखी खेती प्रणालीमा सुधार गरिने विषयलाई प्राथमितकता दिइएको छ । एक वडा एक उत्पादन कार्यक्रमलाई प्राथमिकताका साथ कार्यान्वयन गर्ने गरी गाउँपालिका र वडा कार्यालयवाट वजेट विनियोजन गरी कार्यान्वयन प्रक्रिया अगाडि बढाइएको गाउँपालिका अध्यक्ष सरस्वती दर्लामी चिदीले बताउनुभयो । उहाँले आधुनिक प्रविधिको उपयोगले किसानहरुलाई धेरै राहत पुगेको र कृषि कर्मप्रति आकर्षण पनि बढेको बताउनुभयो ।

 

LEAVE A REPLY

Please enter your comment!
Please enter your name here