जनतालाई सहज स्वास्थ्य सेवा दिँदै माथागढी

0
207
पाल्पा । माथागढी गाउँपालिकाले उचित स्वास्थ्य सेवाबाट बञ्चित वडा र टोलका नागरिकहरुलाई प्राथमिकता दिई बजेट बिनियोजन गरी कार्यक्रम संचालन गर्दै आएको छ ।
गाउँपालिकाले स्वास्थ्य चौकीको पहुँचबाट टाढा रहेका नागरिकहरुलाई स्वास्थ्य सेवा प्रदान गर्नको लागि सामुदायिक स्वास्थ्य इकाई सञ्चालन गरेको गाउँपालिका अध्यक्ष यम बहादुर चिदील बताउनुभयो । गाउँपालिकाले स्वास्थ्य चौकीहरुको सेवाको गुणस्तरलाई समय सापेक्ष बृद्धि गर्दै नागरिकको स्वास्थ्य अधिकारलाई सुनिश्चित गर्नेतर्फ उन्मुख भएको उहाँले बताउनुभयो ।
माथागढी गाउँपालिकाका केही वडाहरूमा भौगोलिक हिसावले पनि एउटा टोलबाट अर्को टोलमा पुग्न र स्वास्थ्य चौकीसम्म तत्काल सम्भव नभएका टोलहरू पनि रहेका छन् । ती इकाईहरुबाट स्वास्थ्य चौकीसम्म पुग्न सम्भव नभएका नागकिहरुले सेवा लिन सहज भएको उहाँले बताउनुभयो । चिदीपानीको धैरेनी, कसेनीको शिकारकोट, गोठादीको भुटुके, रहबासको मटेरी र बहादुरपुरको ताकातुङमा गत वर्ष सामुदायिक स्वास्थ्य इकाई थपिएका थिए । सामुदायिक स्वास्थ्य इकाईमा सेवाका लागि पालिकाले करारमा १२ जना स्वास्थ्यकर्मी थप गरेको थियो ।
त्यस्तै यो गाउँपालिकाका कतिपय वडाहरु बिकट रहेको र सुत्केरी गराउन सदरमुकाम वा अन्य अस्पतालमा पुग्न अप्ठेरो हुने भएकोले गाउँपालिका सबै वडाहरुमा तालिमप्राप्त जनशक्ति सहितको बर्थिङ सेन्टरको अवधारणा ल्याएको अध्यक्ष चिदीले बताउनुभयो । यस वर्ष गोठादीमा पनि बर्थिङ सेन्टर संचालन हुने उहाँले बताउनुभयो । त्यस्तै पालिकाका सबै वडाहरुमा ल्याव सेवा पनि संचालनमा आएको छ । पालिका अन्तरगतका वडा नं. ५ र ६ मा स्वास्थ्य चौकीको नयाँ भवन बनाउने कार्य बाँकी छ । वडा नं. ५ हात्तीलुङ साविक कसेनी गाविसका २ वटा वडा र गोठादी गाविसका ४ वटा वडा समेटेर बनाइएको हो । यी दुबै वडामा पायक पर्ने स्थानमा जग्गा प्राप्तिको कार्य अगाडि बढाइएको अध्यक्ष चिदीले बताउनुभयो । हात्तीलुङमा सामुदायिक स्वास्थ्य इकाई मार्फत सेवा प्रवाह हुँदै आएको छ ।
गर्भवतीलाई अण्डा र झण्डा कार्यक्रम कायमै
माथागढीको स्वास्थ्य क्षेत्रमा अर्को महत्वपूर्ण कार्यक्रम गर्भवतीको घरमा हरियो झण्डा र गर्भवतीलाई अण्डा कार्यक्रम पनि हो । अण्डाले आमा र बच्चालाई पोषण पुरा हुने र गर्भवतीको घरमा राखिएको घरमा हरियो झण्डाले उक्त घरमा गर्भवती छन् भनेर चिनाउन सहयोगी हुने भएकोले यसो गरिएको गाउँपालिकाका स्वास्थ्य शाखा प्रमुख केशव जिसीले बताउनुभयो । गाउँपालिकाले स्वास्थ्य क्षेत्र अन्र्तगत गर्भवती र सुत्केरीहरुका लागि बिशेष कार्यक्रम सञ्चालन गर्दै आइरहेको जिसीले बताउनुभयो । गर्भ रहेपछि स्वास्थ्य संस्थामा पहिलो पटक गर्भ जाँचका लागि गर्भवती स्वास्थ्य संस्थामा आउदा अण्डा र झण्डा दिएर पठाउने गरिएको छ । एक पटक झण्डा दिइने र क्रमशः परीक्षणको क्रममा आउँदा गर्भवतीको अवस्था हेरी ४ पटक अण्डा प्रदान गर्ने गरिएको उहाँले बताउनुभयो ।
अण्डाले गर्भवतीलाई पोषण दिने र झण्डाले छिमेकीहरुलाई समेत यो घरमा गर्भवती रहिछन् त्यसैले आवश्यक सहियोग गर्नुपर्छ भन्ने भावना जागृत गराउने भएकोले यो अभियान सञ्चालन गरिएको उहाँले बताउनुभयो । पालिका अन्तरगत २ वटा एम्बुलेन्स रहेका छन् । यी एम्बुलेन्स मार्फत अति विपन्न र पैसा तिर्न नसक्ने परिवारलाई निःशुल्क सेवा समेत प्रदान गरिएको छ ।
तीव्र गतिमा बन्दै माथागढी अस्पताल 
गाउँपालिकाको ४ नं. वडा झडेवामा बन्दै गरेको १५ शैयाको अस्पताल निर्माण कार्यले तीव्रता पाएको छ । ९ रोपनी क्षेत्रफलमा बनिरहेको छ । २०७८ जेठ २७ गते प्राकृतिक निर्माण सेवासँग करिब १२ करोड लागतमा २०८१ जेठसम्म सक्नेगरी ठेक्का सम्झौता भएको छ । सोही अनुसार समयमै काम सम्पन्न गर्नेगरी निर्माण व्यवसायीले काम गरिरहेको गाउँपालिकाले जनाएको छ । दुई तले अस्पतालको भवनमा अहिले स्टक्चरको काम अन्तिम चरणमा पुगेको बताइएको छ ।
अस्पताल निर्माण कार्य सम्पन्न भएपछि दरबन्दी नवौं तहको चिकित्सको नेतृत्वमा ३० जना स्वास्थ्यकर्मीले सेवा दिने छन् । आधारभूत अस्पतालबाट ओपिडी सेवा, प्रयोगशाला सेवा, एक्सरे सेवा, आयुर्वेद सेवा, दन्त उपचार सेवा, आकस्मिक सेवा, अन्तरङग सेवा (बिरामी भर्ना) र फार्मेसी सेवा उपलब्ध हुनेछ । यो अस्पतालबाट सेवा सुरु भएपछि गाउँपालिकाका झडेवा, गोठादी, हात्तिलुङ, रहवास, बहादुरपुरका सबै र कसेनीको केही भागका नागरिकलाई फाइदा पुग्ने गाउँपालिका अध्यक्ष चिदीले बताउनुभयो ।
यता कसेनी स्वास्थ्य चौकीको भवन निर्माण कार्य पनि तीव्र रुपमा चलिरहेको छ । कसेनीमा बन्दै गरेको उक्त भवनको निर्माण कार्य ६० प्रतिशत बढी सम्पन्न भएको बताइएको छ ।
फोटोः कसेनीमा निर्माणाधिन स्वास्थ्य चौकी भवनको अनुगमन निरीक्षण गर्दै सरोकारवालाहरू

LEAVE A REPLY

Please enter your comment!
Please enter your name here