पाल्पा । माथागढी गाउँपालिका–१ चिदीपानी वडा कार्यालयको समन्वयमा यस वर्ष फागु खेलिने भएको छ ।
मौलिक चाडपर्वको संरक्षण तथा वडा स्तरीय साँस्कृतिक समूह निर्माण गर्ने उद्देश्यले चैत १० र ११ गते वडाभित्रका बिभिन्न टोलहरुमा पुगेर फागु खेल्ने तयारी गरिएको वडाध्यक्ष राजकुमार पन्थीले बताउनुभयो ।
यसरी स्थानीय तह मार्फत फागु खेल्न लागिएको जिल्लामै यो नौलो अभ्यास हो । टोल टोलमा पुगेर फागु खेलिने र संस्कृति संरक्षण सम्बर्धनमा टेवा पु¥याउने योजना रहेको अध्यक्ष पन्थीले बताउनुभयो ।
फागुको ऐतिहासिक महत्व
त्रेता युगमा दैत्यराज हिरण्यकश्यपुले विष्णुभक्त आफ्ना पुत्र प्रह्लादलाई मार्ने उद्देश्यले ब्रह्माबाट आगोले छुन नसक्ने वरदान पाएकी आफ्नी बहिनी होलिकालाई प्रह्लादका साथ दन्किरहेको आगोमा पस्न लगाउँदा होलिका आफै भष्म भएकी तर भक्त प्रह्लादलाई आगोले छुन नसकेको कथा यो फागु पर्वसँग जोडिएको छ । त्यसै बेलादेखि शक्तिको दुरूपयोग गर्ने पापी प्रवृत्तिकी प्रतीक बनेकी होलिका मारिएको उपलक्ष्यमा होली (फागु) खेल्ने परम्परा चलेको विश्वास गरिन्छ ।
यसैगरी द्वापरयुगमा श्रीकृष्ण भगवान्लाई मार्न कंशद्वारा पठाइएकी राक्षसनी पुतनाले आफ्नो विष दलिएको स्तन चुसाउन लाग्दा असफल भई मारिइन् । निजलाई व्रजवासीले जलाई फागु महोत्सव मनाउने परम्परा चलेको पाइन्छ ।