पाल्पाको पर्यटन विकासका लागि अन्तरक्रिया कार्यक्रम सम्पन्न

0
183

पाल्पा । पाल्पाको पर्यटन विकासका लागि अन्तरक्रिया कार्यक्रम तानसेनमा सम्पन्न भएको छ । वातावरणीय तथा पर्यटन प्रवर्धन समूह (गेट अप पाल्पा)को आयोजनामा संचालित अन्तरक्रिया कार्यक्रमका सहभागीहरुले पाल्पा आफैमा पर्यटकीय जिल्ला भएपनि उचित व्यवस्थापन र प्रसारको अभावमा सोचेजति पर्यटक भित्र्याउन नसकिएको बताएका छन् । वक्ताहरुले सामान्य व्यवस्थापन गर्न सक्दा पनि पाल्पाले पर्यटनबाट धेरै फाइदा लिन सक्नेमा जोड दिएका थिए ।

कार्यक्रममा तानसेन नगरपालिकाका प्रवक्ता यादवसिं कार्कीले तानसेन नगरपालिकाले नगर क्षेत्र भित्र रहेका पर्यटकीय गन्तव्यहरुको पहिचान गरी यहाँ आएका पर्यटकहरुलाई केही दिन यतै बस्ने घुम्ने ब्यवस्था मिलाउने गरी योजना र कार्यक्रम बनाएको बताउनुभयो ।

उहाँले तानसेन नगरपालिकाभित्र रहेका रानीमहल, श्रीनगर, भगवती मन्दिर सहित पाल्पा दरबार संग्रहालय परिसरलाई ब्यवस्थित गराउँदै लगिने बताउनुभयो । तानसेन बतासेमा निर्माण कार्य सम्पन्न भई हाल तानसेन नगरपालिकाको स्वामित्वमा रहेको श्रीनगर डबलीलाई उपयोगी बनाउने र डबलीमा हुने बिभिन्न कार्यक्रमका माध्यमबाट पर्यटक भित्र्याउने गरी योजना बनाई सरोकारवालाहरुसँग छलफल अगाडि बढाएको बताउनुभयो ।

कार्यक्रममा संस्थाले हालसम्म गर्दैै आएको काम र प्रगतिबारे जानकारी गराउँदै गेअप पाल्पाका अध्यक्ष मनमोहन श्रेष्ठले पाल्पालाई पर्यटकीय जिल्लाको रुपमा विकास र संस्थाले उचित कार्यक्रम बनाउने उद्देश्य सहित २०५६ सालदेखि गेटअप पाल्पाले पर्यटन र पर्यटकीय विकासबारे कार्यक्रम गर्दै आएको बताउनुभयो । संस्था मार्फत बिभिन्न महत्वपूर्ण पर्यटकीय स्थलहरुको ब्रोसर निर्माण, टे«किङ रुट निर्माण, होडिङ बोर्ड निर्माण, बिभिन्न ऐतिहासिक मठमन्दिरहरुको जीर्णेद्धारका लागि पहल समन्वय गरिएको अध्यक्ष श्रेष्ठले बताउनुभयो । संस्था मार्फत होम स्टे तालिम, पर्यटक गाइड तालिम सहित बिभिन्न गोष्ठी तथा अन्तरक्रिया हुँदै आएको उहाँले बताउनुभयो ।

कार्यक्रममा तानसेन नगरपालिका–१का अध्यक्ष सुनिलकुमार बस्याल, वडा नं. ३ का अध्यक्ष बावुरत्न शाक्य, ४ का अध्यक्ष हेमन्तराज शर्मा, वडा नं. १२ का अध्यक्ष मेजरसिं केसी, कार्यपालिका सदस्य लक्ष्मी बिश्वकर्मा, वडा नं. ६ का सदस्य गोमा गैरेले आआफ्नो वडामा रहेका पर्यटकीय गन्तव्य, सम्भावना र वडा मार्फत हुँदै आएका पहल र कार्यक्रमबारे जानकारी गराउनुभएको थियो ।

कार्यक्रममा नेपाल पत्रकार महासंघ पाल्पाका सचिव यज्ञमूर्ति तिमिल्सिनाले पाल्पा आफैमा पर्यटकीय जिल्लाको रुपमा रहेपनि आपसी समन्वयको अभावमा सोचेजति पर्यटक ल्याउन नसकिएको र आएका पर्यटकहरुलाई पनि केही यही बस्ने घुम्ने बातावरण बन्न नसकेको बताउनुभयो ।

कार्यक्रममा नाटा पाल्पाका अध्यक्ष राजिव शाहले आफ्नो संस्थाले यहाँको पर्यटन विकासका लागि महत्वपूर्ण कार्यक्रम गर्दै आएको बताउनुभयो । होटल तथा रेष्टुरेन्ट व्यवसायी संघ पाल्पाका अध्यक्ष लक्ष्मण बस्यालले सरकारी गैरसरकारी क्षेत्रको उचित समन्वयले मात्र पर्यटन विकास हुने बताउनुभयो । ढाका उद्यमी हरि रायमाझीले पाल्पाको पर्यटकीय सम्भावनाबारे उचित प्रचारप्रसार हुनुपर्ने बताउनुभयो । कार्यक्रम गेटअप पाल्पाका अध्यक्ष मनमोहन श्रेष्ठको अध्यक्षता र गेटअप पाल्पाका सदस्य एवम् पत्रकार देव पचभैयाको संचालनमा चलेको थियो ।

LEAVE A REPLY

Please enter your comment!
Please enter your name here