पाल्पा । नेकपा एमालेको अध्यक्षमा युवा नेता एवम् हालका सचिव रामजी पोखरेल र पुर्व पार्टी सचिव ओम बहादुर घर्तीको नाम चर्चामा छ ।
नेकपा एमालेको जिल्ला अधिवेशन नजिकिदै गर्दा नेतृत्वमा को आउने भन्ने चर्चा परिचर्चा सुरू हुन थालेको हो । एमालेमा पछिल्लो समय जिल्लामा युवाको नेतृत्व आउनुपर्ने चर्चा चलेको छ । एमाले पाल्पाको यहि जेठ ११ र १२ गते १० औं जिल्ला अधिवेशन हुँदैछ ।
एमाले जिल्ला अध्यक्षको लागि वर्तमान सचिव रामजी पोखरेल र पूूर्व पार्टी सचिव ओमबहादुर घर्तिमगर आ–आफ्नो तयारीमा जुट्नुभएको छ । दुबै उम्मेदवारहरुले आफ्नो जित सुनिश्चित रहेको भन्दै अधिवेशन प्रतिनिधिहरुसँग मतदानको लागि फोन तथा भेटघाटलाई तीब्र बनाउनुभएको छ ।
पार्टीमा वर्तमान सचिवको जिम्मेवारी निर्वाह गर्दै आउनुभएका पोखरेलले संगठन चलाएको सचिवको हैसियतले स्वभाविक रुपमा अध्यक्षमा सर्वसम्मत रुपमै आफुले पाउनु पर्ने बताउनुभयो । सर्वसम्मत नभएपनि चुनावी प्रतिष्प्रर्धा हुँदा पनि युवादेखी दलित, जनजाति, महिला, पाका पुस्तासम्म सबैको रोजाईमा रामजी पोखरेल भएकाले अत्याधिक मत ल्याएर अध्यक्ष पदमा विजयी हुने अध्यक्षका उम्मेदवार पोखरेलले बताउनुभयो ।
अध्यक्ष पदका अर्का उम्मेदवार घर्तीले लामो सयमसम्म पार्टी सचिव भएर काम गरेको, कार्यकर्ताहरुको समस्या तथा मनोभावना बुझेको, सबैपक्षलाई समेटेर लैजाने क्षमता भएकाले पार्टीकार्यकर्ता तथा नेतृत्व वर्गले ओम घर्तीलाई नै सर्वसम्मत रुपमा अध्यक्ष बनाउनेमा आफु ढुक्क रहेको बताउनुभयो । निर्वाचन भईहालेमा पनि कार्यकर्ताहरुको पहिलो रोजाई नै घर्ती रहेकाले आफ्नो जित सुनिश्चित रहेको अध्यक्ष पदका उम्मेदवार घर्तिले बताउनुभयो । यद्यपी नेताहरु भने सर्वसम्मत नेतृत्व चयनको तयारीमा लागिपरेका छन् ।
तस्बिरः रेडियो मुक्तिनाथको सहयोगमा
