पाल्पा । नेपाल पत्रकार महासंघले सदस्यता शुद्धिकरण अभियान चलाइरहेको छ । सदस्यता शुद्धिकरणका सन्दर्भमा केन्द्रबाट सार्वजनिक पाल्पा शाखामा नविकरण हुने सदस्यहरुको बिवरण जिल्ला शाखाको निर्णय भन्दा बाहिर भएकोले जिल्ला शाखाको निर्णय बमोजिम कार्यान्वयन गरी सो बमोजिम नविकरणका लागि सिफारिस गर्न पाल्पा शाखाले केन्द्रीय समितिलाई अनुरोध गरेको छ ।
शाखाले २०८० साल असार ५ गते सम्पन्न कार्यसमितिको बैंठकले सिफारिस गरेका पत्रकारहरुको सदस्यता कायम राख्न लिखित रुपमा आग्रह गरेको हो । केही दिन अघि केन्द्रीय समितिका अध्यक्ष महासचिवद्वारा हस्ताक्षरित लिस्टको नामावलीले जिल्लामा विवाद बढाएको, न्योचित नभएको, कयौ पत्रकारहरु नाम लिष्टमा नपरेकाले यही अवस्थामा आसन्न निर्वाचन गर्न अप्ठेरो हुने शाखाले जनाएको छ ।
पाल्पा कार्यसमितिका बैठकले ९६ पत्रकार सदस्यहरुबाट ७१ जनाको नाम लिष्ट प्रदेश तथा केन्द्रमा सिफारिस गरेको थियो । पत्रकार महासंघ पाल्पाको २०८१ साल जेठ १५ गते बसेको कार्यसमितिको बैठकले विगतमा सिफारिस गरेको ७१ जनाको सदस्यता कायम राख्न केन्द्रिय महासंघलाई अनुरोध गरेको शाखा अध्यक्ष रेखीराम रानाले बताउनुभयो । शुद्धिकरणको नाम लिष्टमा धेरै पत्रकारहरुको नाम छुटेकाले जिल्ला कार्यसमितिले सिफारिस गरेको नामावलीलाई नै अन्तिम मान्न अनुरोध गरिएको अध्यक्ष रानाले बताउनुभयो ।
केन्द्रले पठाएको शुद्धिकरणको नामावली अनुसार शाखाको दैनिक कामकाज गर्न अप्ठ्यारो परेको र आसन्न निर्वाचन गराउन समेत कठिनाई हुने शाखा सचिव यज्ञमूर्ति तिमिल्सिनाले बताउनुभयो ।