यज्ञमूर्ति तिमिल्सिना । पाल्पा
पाहुँना गाउँमा पुग्नै लाग्दा पञ्चेबाजा टोली दोबाटोसम्म बाजा बजाउँदै लिन आइपुग्छन् । स्थानीयले पाहुँनालाई फुलमालाले स्वागत गर्छन् र बाजा बजाउँदै पाहुँनालाई नचाउँदै होमस्टे भएको घरघरमा पु¥याउँछन् ।
चिटिक्क सजाइएका घर त्यस्तै राम्रा कोठाहरू । दुर्गम गाउँमा यति राम्रो ब्यवस्था देख्न पाउँदा पाहुँनाहरु पनि खुशी हुन्छन् र दङ्ग पर्छन् । यहाँको आतिथ्यता यहाँ पुगेका सबै पाहनालाई मन पर्छ । यो दृश्य पुर्वखोला गाउँपालिका–२ जल्पा ढोलीमाराको हो ।
ढोलीमारामा अहिले ब्यवस्थित रुपमा होमस्टे संचालन भइरहेको छ । यो कार्यक्रमबाट स्थानीय बासिन्दाहरुलाई स्वरोजगारीको अवसर मिलेको छ भने पर्यटन प्रवर्धन पनि भइरहेको छ । अझ थप प्रचार प्रसार हुन सक्ने हो अझ धेरै पाहुँनाहरुको संख्या बढ्ने बिश्वास स्थानीय होमस्टे संचालकहरुको छ ।
पहाडी भूभाग त्यसमा लेकमा छ ढोलीमारा गाउ“ । गर्मीको मौसममा यहाँ पुग्नेहरुले खुबै आनन्दको महसुस गर्छन् । हिमाल प्रष्टैसँग देखिने यो गाउँसम्म हिमालको चिसो हावा आइपुग्छ । गर्मी छल्न आएका पाहुँनालाई यो भन्दा ठूलो उपहार केही हुनै सक्दैन । होमस्टेका सचिव मन बहादुर ठाडाले यो होमस्टेमा यो वर्ष १९ सय बढी पाहुँनाहरू आइसक्नुभएको बताउनुभयो ।
होमस्टे प्रयोजनकै लागि १२ वटा घर छन् । यो सामुदायिक होमस्टे समेत भएकोले पाहुँनाको इच्छा अनुसार समूहमा बस्न चाहनेहरुलाई सामुदायिक रुपमा समूहमा र घरघरमा बस्न चाहनेहरुलाई सोही बमोमिज राख्ने गरिएको उहाँले बताउनुभयो । अहिले गर्मीको समय भएकोले पनि बुटवल लगायत गर्मी धेरै हुने तराईका स्थानबाट यो होमस्टेमा धेरै पाहुँनाहरू आउने गरेको उहाँले बताउनुभयो ।
बास बस्न आइपुगेका पाहुँनाको रोजाइँ अनुसार खाना खाजा खुवाइन्छ । साँझको समयमा सथनीय कलासंस्कृतिको प्रस्तुती हुन्छ । अर्को बिहान पाहुँनाले स्थानीय पर्यटकीय स्थलहरुको अवलोकन गर्छन्, फर्केपछि स्थानीय परिकारसहितको खाजा खुवाइन्छ र फर्कन चाहनेहरुलाई सम्मान बिदाई गरिन्छ । जल्पाका वडाध्यक्ष नीर बहादुर सारुले यो होमस्टे पूर्वखोलाकै गौरवको रुपमा अगाडि बढेको बताउनुभयो । २०७९ मंसिरबाट औपचारिक रुपमा सुरू भएको यो होमस्टे संचालनको प्रक्रिया, तालिम, सास्कृतिक कार्यक्रमका लागि पोशाक लगायतका बिषयमा गाउँपालिकाले सहयोग गरेको उहाँले बताउनुभयो ।
अहिले साँस्कृतिक कार्यक्रम खुल्ला मञ्चमा हुन्छ । पानी परेको अवस्थामा कार्यक्रम संचालनका लागि अप्ठेरो हुने भएकोले छिटै हल निर्माणको तयारी रहेको उहाँले बताउनुभयो । गाउँपालिका अध्यक्ष नुनबहादुर थापाले गाउँपालिकाको गौरवको रुपमा रहेको ढोलीमारा सामुदायिक होमस्टेले छोटो समयमै ग्रामीण पर्यटन विकासमा राम्रो फड्को मारेको बताउनुभयो ।
होमस्टे सुरू भएपछि पहिचान बढेको, स्थानीयहरुमा स्वरोजगार सिर्जना सम्भव भएको र गाउँको उत्पादन गाउँमै खपत हुन थालेको बताउनुभयो । किवीको पकेट क्षेत्र पनि नजिकै छ । गाउँपालिकाले प्रदेश सरकार र बन कार्यालयसँगको समन्वयमा पुर्वाधार निर्माणमा सहजीकरण पनि गरेको छ । अध्यक्ष थापाले भन्नुभयो ।
यहाँको भ्युटावर, पिकनिक स्थल, लायन पार्क, वृक्षारोपण गरिएका थरिथरिका फलफुल,आकर्षक फुलबारी उद्दान, रमणीय अम्रिसो खेती, किवी खेती यहाँको प्रमुख आकर्षण हो । यहाँका मादले गुफा,खाँणदेवी गुफा पनि पर्यटकका लागि आकर्षणको केन्द्र बनेको अध्यक्ष थापाले बताउनुभयो ।