गोपालप्रसाद बश्याल । पाल्पा
तानसेनको मोहन कन्या माध्यमिक विद्यालयले पढ्दै सिकाउँदै कार्यक्रम सञ्चालन गरिरहेको छ ।
विद्यालयमा सञ्चालित कम्प्युटर इञ्जिनियरिङ अध्ययन गर्ने कक्षा १२ का विद्यार्थीहरूले अहिले विद्यालयकै कक्षा ८ देखि ११ सम्मका छात्राहरूलाई कम्प्युटरसम्बन्धी ज्ञान दिइरहेका र पछि अन्य विद्यालयमा गै सिकाउने कार्यक्रम रहेको कार्यक्रम संयोजक ईञ्जिनियर तिलकराम भण्डारीले बताउनु भयो ।
पढ्दै सिकाउँदै कार्यक्रमअन्तर्गत विद्यार्थीहरूले कम्प्युटरसम्बन्धी आधारभूत ज्ञान सिकाउनुका साथै कम्प्युटर पार्टस्, डिसेम्बल, असेम्बल, हार्डवेयर, सफ्टवेयर लगायत पक्षमा सैद्धान्तिक र प्रयोगात्मक अभ्यासात्मक ज्ञान सिकाउने गरिएको छ ।
प्राविधिक धारतर्फका विद्यार्थीहरूको भूमिका रहेको यस पढ्दै सिकाउँदै कार्यक्रमले विद्यार्थीहरूको ज्ञानात्मक पक्ष बलियो हुने र कक्षाकोठाको ज्ञानलाई अरुमा हस्तान्तरण गर्ने क्रममा कम्प्युटर हार्डवेयर र सफ्टवेयरसम्बन्धी गहिरो ज्ञान र सिप विकास हुने भएकोले अध्ययनपश्चात् पेशागत जीवनका लागि पनि यस कार्यक्रमले सहयोग गर्ने विद्यालयका प्रधानाध्यापक दिपक ज्ञवालीले बताउनुभयो ।
पढ्दै सिकाउँदै कार्यक्रमले विद्यार्थीमा सैद्धान्तिक ज्ञान, हार्डवेयरसम्बन्धी सिप विकास हुनुका साथै आफ्नो ज्ञानलाई बाड्ने, सहयोगात्मक सिकाइ, सिकाइ नेतृत्व सिप, सञ्चार सिप, उद्यमशीलता सिपको विकास भै पेशा गरेर जिविकोपार्जन गर्नाका लागि यस कार्यक्रमले सहयोग पुग्ने देखिन्छ ।
विद्यालयमा कम्प्युटर इञ्जिनियरिङ् अध्ययन गरिरहेका कक्षा १२ का सबै विद्यार्थीहरू यस पढ्दै कमाउँदै कार्यक्रममा सहजकर्ताका रुपमा र अन्य कक्षाका विद्यार्थी एवम् सम्भव भएका शिक्षकहरू सहभागी भएका छन् । हरेक शुक्रबार करीव दुई घण्टा यो कार्यक्रम नियमित सञ्चालन गरिने भएको छ ।