पाल्पा । बगनासकाली गाउँपालिका–८ का युवा सुशिल बस्याले एक घर एक लालीगुँरास अभियान संचालन गर्दै आउनुभएको छ ।
उहाँले तेह्रथुम, ताप्लेजुङ लगायतका जिल्लाहरुबाट लालीगुँरासका विरुवा ल्याएर जिल्लाका बिभिन्न स्थानीय तहहरुमा यो अभियान चलाउदै आउनुभएको छ । पाल्पाको बगनासकाली, तानसेन लगायतका स्थानहरुमा गरी १ सय बढी बिरुवाहरू रोपिसकिएको बस्यालले बताउनुभयो ।
बगनासकाली गाउपालिका अन्तरगतका सार्वजनिक स्थलहरू, विद्यालय, स्वास्थ्य संस्थाका प्रांगण, बगनासडाँडा, खानीगाउ, देउराली, तानसेनको भगवती मन्दिर, श्रीनगर पारिलेक, नेपाल सेनाको व्यारेक क्षेत्र लगायतका स्थानहरुमा विरुवा लगाइएको र अन्य स्थानहरुमा पनि बिरुवा लगाउने अभियान जारी रहेको बस्यालले बताउनुभयो ।
लालीगुँरास औषधीको लागि जडिवुटीको रुपमा समेत प्रयोग हुने भएकोले एक घर एक लाँलीगुरास रोप्दा राम्रो हुन्छ भन्ने लागेर अभियान चलाएको उहाँले बताउनुभयो । बस्यालले चलाएको अभियानमा धेरैले साथ र सहयोग गरेका छन् । विरुवा लगाउन चाहनेहरू धेरैभएपनि सबैलाई पु¥याउन नसकिएको उहाँको भनाई छ ।
लालीगुँरास नेपालको राष्ट्रिय फुल हो । लालीगुरास अग्लो र भिरालो स्थानमा हुनेभएकोले यी क्षेत्रहरुको भूवनोट र हावापानी सुहाउदो छ ।
राष्ट्रिय भावनाबाट ओतप्रोत भएका बस्यालले सानैदेखी राष्ट्रियताले भरिएका गीत, कविता, लेख, रचनाहरु लेख्ने र गाउँने गर्दै आउनुभएको छ । आफ्नो उपनाम पनि राष्ट्रप्रेमी भएकोले राष्ट्रका लागि केही त गरौं भन्ने भावनाले यो अभियान चलाएको बस्यालले बताउनुभयो ।