पाल्पा । उचित उपचारको अभावमा बालकलाई फलामे सिक्रीले बाँधेर राख्ने गरिएको छ । रिब्दीकोट गाउँपालिका–१, ख्याहा जोगिथुम घर भई हाल तानसेन नगरपालिका–१४, अर्गलीमा भाडाको घरमा बस्दै आउनुभएका १२ वर्षीय शिव कुमाल उपचार अभावमा फलामे सिक्रीमा बाँधिएर दैनिकी गुजार्दै हुनुहुन्छ । छोरा जान्ने सुन्ने भएदेखि नै यसै गरी बाँधेर राख्न थालिएको आमा पार्वती कुमालले बताउनुभयो ।
तीन,चार वर्षको हुदादेखि नै त्यत्तिकै छोड्दा भागेर टाढा टाढा जाने र दुःख दिने गरेकोले यसरी बाँधेर राख्न थालिएको उहाँले बताउनु भयो । शिवले बोल्न सक्नुहुन्न । आमाले बोलाउँदा सुन्ने र भन्न खोजेको कुरा भने बुझ्ने गरेको पार्वतीले बताउनुभयो । एक्लै हुँदा दौडिने भाग्ने र पानीमा जाने तथा घरबाट निस्केपछि खोजेर ल्याउन नसकिने भएकोले यसरी बाँधेर राख्नुपरेको उहाँले बताउनुभयो ।
पार्वतीका दुई भाई छोरा हुन् । शिव कान्छो छोरा । “ठूलो छोरामा कुनै समस्या छैन । विद्यालय जाने गर्नुहुन्छ । पति रोजगारीका लागि भारत हुनुहुन्छ । पतिको कमाइबाट खान बस्न ठिक्क छ । आर्थिक अभावकै कारण बुबाको राम्रोसँग उपचार गर्न सकिएन”, पार्वतीले भन्नुभयो । सबैजनाले बाबुको उपचार राम्रोसँग गराउने हो भने निको हुन्छ भन्नुहुन्छ तर आर्थिक अभावकै कारण उपचार गराउन लैजान सकिएको छैन । उहाँले भन्नुभयो । आफू घरमा छदा खुल्लै राख्ने र निगरानी गरे पनि आफू दिनभर काममा जादा वा अन्यत्र बास बस्ने गरी जादा पनि यसै गरी बाँधेर राख्ने गरिएको उहाँले बताउनुभयो ।
उपचारको नाममा तीन वर्षअघि केही दिन बुटवल लगेर उपचार गराए पनि आर्थिक अभावका कारण धेरै समय उपचार गराउन नसकेको र फेरी फर्काएर ल्याएपछि उस्तै दैनिकी सुरू भएको पार्वतीले बताउनुभयो । शिवले कखरा समेत सिक्ने बुझ्नै मौका पाउनुभएन । आफ्नै सहोदर दाई र छिमेकी समान उमेर समूहका बालबालिका विद्यालय जाँदा शिव भने सिक्रीमै बाँधिएर बस्न बाध्य हुनुहुन्छ ।
सिक्रीले बाधिएका बालक शिवलाई २०७५ जेठ १३ गते तत्कालीन प्रमुख जिल्ला अधिकारी विष्णुप्रसाद ढकालले आफ्नो कार्यकक्षमै ल्याई उहाँको चालचलन बानीव्यहोरा अवलोकन गर्दै भरपर्दो उपचारको लागि सरकारी तवरबाटै पहल गर्ने बताउनुभएको थियो । बालकको घरमै पुगेर उहाँको अवस्थाबारे जानकारी लिनुभएका पाल्पा सिविआरका कार्यक्रम प्रमुख कृष्ण गहतराजले बालकको अवस्था बारे जानकारी लिँदा ७० प्रतिशत ठिक हुने बताउनुभएको थियो ।
उहाँको पहलमा रिब्दीकोट गाउँपालिका, महिला तथा बालबालिका कार्यालय, पाल्पा सिविआरलगायतका संघसंस्थाहरूले बालककै घरमा पुगेर उहाँको थप उपचारका लागि २०७५ असार १७ गते युनाइटेड मिसन अस्पताल लगेका थिए । महिला तथा बालबालिका कार्यालयले शिवलाई असार १७ गते नै ख वर्गको निलो अपांगता कार्डलाई परिवर्तन गरी क वर्गको रातो अपांगता कार्ड दिएको थियो । शिवले मासिक रूपमा २ हजार रुपियाँ पाउँदै आउनुभएको छ ।
