पाल्पा । बगनासकाली गाउँपालिका स्तरीय पुरुष तथा महिला भलिवल प्रतियोगिता संचालन हुने भएको छ ।
पदम राना कप क्लव स्तरीय महिला तथा पुरुष भलिबल प्रतियोगिता आयोजना गरिएको आयोजकले जनाएका छन् । समाजसेवी पदमबहादुर राना परिवारको आयोजनामा खोरबारी खेलमैदानमा यही साउन २४ गतेदेखि २६ गतेसम्म खेल संचालन हुने खेल संयोजक एवम् युवा नेता डेन्जिङ रायमाझीले बताउनुभयो ।
भलिबल खेलको विकास गर्नुका साथै खेलकुदमा आकर्षण गर्न, नयाँ प्रतिभाशाली खेलाडीहरुलाई प्रोत्साहन र थप प्रतिभाशाली खेलाडीलाई प्रोत्साहन गर्ने उद्देश्यले खेलको आयोजना गरिएको आयोजक राना परिवारका सदस्य डिला रानाले बताउनुभयो ।
पुरुष तर्फ प्रथम हुने समूहले ३० हजार रूपैयाँ द्वितिय हुनेले २० हजार रूपैयाँ, तृतीय हुनेले १५ हजार रूपैयाँ र सान्त्वना हुनेले ५ हजार सहित शिल्ड, मेडल र प्रमाणपत्र प्राप्त गर्ने संयोजक रायमाझीले बताउनुभयो । त्यस्तै महिला तर्फको खेलमा प्रथम हुनेले १५हजार रूपैया द्वितिय हुनेले १० हजार रूपैयाँ, तृतीय हुनेले ५ हजार रूपैयाँ सहित शिल्ड, मेडल र प्रमाणपत्र प्राप्त गर्ने उहाँले बताउनुभयो । पुरुष भलिबलमा दर्ता शुल्क ५ सय रुपैयाँ र महिलाका लागि दर्ता शुल्क नलाग्ने उहाँले बताउनुभयो ।
बगनासकाली गाउँपालिका २ पोखराथोक निवासी समाजसेवी रानाले जन्म भुमि नेपालमा सामाजिक कार्यमा निरन्तर लाग्नुभएको छ । उहाँले यस अघि बगनासकालीका विद्यालयहरूको शैक्षिक गुणस्तरीय वृद्धिका लागि अक्षयकोष एवम शैक्षिक सामाग्री,झोला वितरण,ज्येष्ठ नागरिक तथा अपाङ्गता भएका व्यक्तिलाई लौरो वितरण समेत गर्नु भएको थियो । उहाँ बैदेशीक रोजगारीका शिलशिलामा युएईमा रहनुभएको छ ।