पाल्पा । लक्षमी वचत तथा ऋण सहकारी संस्थाको २२ औं साधारण सभा शनिबार सम्पन्न भएको छ ।
साधारण सभा उद्घाटन गर्दै सहकारीका अध्यक्ष हरि रायमाझीले सहकारीले सदस्यमैत्री वातावरणमा जोड दिएको जानकारी दिनुभयो । उहाँले सहकारीमा आवद्ध शेयर सदस्यहरूलाई समुदायमा छरिएर रहेको सानो सानो पूँजी संकलन गरी बचत गर्ने बानीको विकास गराउँदै आएको सहकारीले शेयर सदस्यको लागि ५ लाख सम्मको दुर्घटना विमा, जेष्ठ नागरिक सम्मान र असल बचत कर्तालाई सम्मान गर्दै आएको बताउनुभयो ।
निर्वाचन अधिकृत राधेश्याम ज्ञवालीले सरकारको तीन खम्बे अर्थ नीति अनुसार सञ्चालित सहकारीले प्रजातान्त्रिक आचरण, पारदर्शिता र कानून पालना गर्ने प्रतिवद्धतालाई जोड दिनुपर्ने बताउनुभयो । सहकारीको मूल्य, मान्यता र आदर्शलाई अगाडि बढाई जिल्लामा अग्रणी संस्थाको रूपमा अगाडि बढ्न साधारण सभालाई सदस्यले नयाँ कुरा सिक्ने अवसरका रूपमा लिनुपर्ने बताउनुभयो ।
साधारणमा सभामा बोल्दै समाजसेवी शोभा शाक्यले सहकारीमा स्थानीयलाई पहिलो प्राथमिकतामा राखेर काम गर्नुपर्ने जसले गर्दा सहकारी ठगी हुनबाट जोगिने बताउनुभयो । कार्यक्रममा लेखा सुपरीवेक्षण समितिको संयोजक विमला शाक्य बज्राचार्यले वार्षिक प्रतिवेदन प्रस्तुत गर्दै सहकारीमा १५७४ शेयर सदस्यबाट आव २०८०।८१ मा २९ करोड, २२ लाख ६६ हजार १ सय ४६ रुपैंया बचत जम्मा भएकोमा २९ लाख ६६ हजार ३ सय ५१ खुद नाफा भएको जानकारी दिनुभयो ।
कार्यक्रममा उत्कृष्ट कारोबार गर्ने संस्थाका सदस्य, जेष्ठ नागरिक र संस्थामा आवद्ध कर्मचारीलाई सम्मान गरिएको थियो । संस्थाका अध्यक्ष हरि रायमाझीको अध्यक्षतामा भएको कार्यक्रममा उपाध्यक्ष ओम प्रसाद मलेगोले स्वागत र सचिव उत्तम कुमार बज्राचार्यले सञ्चालन गर्नुभएको थियो ।
