पाल्पा । पूर्वखोला गाउँपालिका–१ सिलुवामा यही कार्तिक २१ गतेदेखि २४ गतेसम्म आठौ मण्डली कप भलिवल खेत प्रतियोगिता हुने भएको छ ।
मण्डली स्पोर्ट्स क्लब पूर्वखोलाको आयोजनामा प्रतियोगिता हुन लागेको प्रतियोगितामा पुरूषतर्फ र महिला तर्फको भलिबल खेल हुने क्लबका अध्यक्ष अन्तप्रसाद श्रेष्ठले बताउनुभयो । पुरूषतर्फ १ लाख ५० हजार रुपैयाँ नगद पुरस्कार राशीको र महिलातर्फ ३० हजार रूपियाँ राशीको पुरस्कार हुने अध्यक्ष श्रेष्ठले बताउनुभयो । यसअघिका वर्षहरुमा पुुरुष भलिवल मात्र हुने गरेमा यस वर्ष सबैको सुझाव बमोजिम महिला भलिवल खेल समेत थप गरिएको उहाँले बताउनुभयो ।
पुरुष भलिबलतर्फ प्रथम हुनेले १ लाख ५० हजार नगद, मेडल र प्रमाणपत्र पुरस्कार प्राप्त गर्नेछन्, त्यस्तै द्वितीय हुनेले १ लाख, तृतीय हुनेले ७० हजार र सान्त्वना हुनेले ३५ हजार नगद पुरस्कार प्राप्त गर्नेछन् । यस्तै उत्कृष्ठ खेलाडीलाइ पनि नगद सहित सम्मान गरिने आयोजक संस्थाले जनाएको छ ।
महिला भलिबल प्रतियोगितामा प्रथम हुनेले ३० हजार, द्वितीयले २० हजार, तृतीयले १० हजार र सान्त्वनालाई ५ हजार रुपैयाँ नगद र कपका साथै मेडल र प्रमाणपत्र पुरस्कार प्रदान गरिनेछ ।
पुरुष भलिबलतर्फ ६ टिम सहभागी हुनेछन् भने महिलातर्फ ४ टिमबीच प्रतिस्पर्धा हुनेछ । प्रतियोगितामा राष्टिूय तथा अन्तरराष्टिूय खेलाडी पनि समावेश हुने बताइएको छ ।
प्रतियोगितासँगै बृहत सांस्कृतिक कार्यक्रमको समेत आयोजना गरिएको छ । कार्यक्रममा राष्ट्रिय कलाकारहरुको जमघट रहनेछ । कार्यक्रम संचालनका लागि पूर्वखोला गाउँपालिकाको ५ लाख सहयोग रहने र अन्य सहयोगी संस्था र ब्यक्तिहरुबाट सहयोग स्वरुप संकलन गरिने क्लवका सचिव कृष्णप्रसाद पंगेनीले बताउनुभयो ।