धातानन्द शर्मा गैरे
पाल्पा मंसिर १६ । पाल्पाको तानसेनमा कार्यालय रहेको लुम्बिनी प्रदेश स्तरीय कुटुम्ब बहुउद्देश्यीय सहकारी संस्था लि. ले आफ्नो तेस्रो साधारणसभा संस्थाका अध्यक्ष थानेश्वर गैरेको अध्यक्षता तथा लुम्बिनी प्रदेशका स्वास्थ्य मन्त्री माननीय खेमबहादुर सारुको प्रमुख आतिथ्यमा सम्पन्न गरेको छ । कार्यक्रमका प्रमुख अतिथिले पानसमा दीप प्रज्वलन गरी कार्यक्रमको समुद्घाटन गर्नुभयो ।
कार्यक्रमका अध्यक्ष थानेश्वर गैरेले संस्थाले गरेका विभिन्न गतिविधि, यसको प्रगति र भविष्यका कार्यक्रमसमेत समेटिएको संस्थाको प्रगति प्रतिवेदन प्रस्तुत गर्नुभयो । आफ्नो प्रतिवेदनमा उहाँले संस्थामा अहिले ३०४ जना पुरुष र २४६ जना महिला गरी जम्मा ५५० जना शेयर सदस्य रहेको, १ करोड ९४ लाख ४५ हजार शेयर पुँजि रहेको बताउनुभयो । देशमा राष्ट्रिय स्तरमा देखिएको सहकारी समस्याले मानिसहरुको धारणा बदलिएको वर्तमान अवस्थामा संस्थामा आउने समस्याको निराकरण गर्न समिति सक्षम रहेको छ भन्नुभयो ।
कोषाध्यक्ष विष्णुप्रसाद खनालले २०८०/०८१ को आम्दानी खर्च र २०८१/०८२ का लागि अनुमानित आम्दानी खर्च विवरण प्रस्तुत गर्नुभयो । उहाँले. संस्थामा खराब कर्जा नरहेको र यस वर्ष उद्यमशील र उत्पादनशील क्षेत्रमा ३० लाख रु. सहुलियत ऋण प्रदान गर्ने लक्ष्य रहेको पनि बताउनुभयो । संस्थाका तर्फबाट नेपाल रेडक्रस सोसाइटी पाल्पाका प्रमुख बाबुराम कार्कीलाई ब्लड बैंक स्थापनार्थ रु १५ हजारको चेक हस्तान्तरण गरिएको थियो ।
प्रमुख अतिथि माननीय मन्त्री खेमबहादुर सारुले छोटो समयमै राम्रो आर्थिक कारोबार सञ्चालन गर्न सफल भएकोमा संस्थालार्ई बधाई दिनुभयो । पैसा बचत गर्ने कुरामा जोड दिँदै उहाँले पैसा कमाएर मात्र हुँदैन । पैसाको वचत गर्न र उचित ठाउँमा लगानी गर्न जान्नुपर्छ भन्नुभयो । भौतिक विकास आर्थिक विकाससंग जोडिएको हुन्छ तर हाम्रा भौतिक विकासले पर्याप्त आर्थिक विकासका क्रियाकलाप बढाउन नसकेकोप्रति उहाँले चिन्ता व्यक्त गर्नुभयो । उहाँले शेयर सदस्यहरुमा सहकारीप्रति अपनत्त्वको भावना जगाउन प्रेरित गर्दै शेयर सदस्यहरुलाई उद्यमशील बन्न र उत्पादनमुखी कार्यक्रम सञ्चालन गर्न आह्वान गर्नुभयो ।
कार्यक्रममा शुभकामना दिने क्रममा नेपाल रेडक्रस सोसाइटी पाल्पा शाखाका अध्यक्ष बाबुराम कार्कीले कुटुम्ब सहकारी ठिक बाटो पहिल्याएर अघिबढिरहेको भन्दै यसको उत्तरोत्तर प्रगतिको शुभकामना दिनुभयो । नेपाल रेडक्रस सोसाइटी पाल्पाले पाल्पामा ब्लड बैंकको नितान्त खाँचो महसुस गरी निकट भविष्यमा ब्लड बैंक स्थापना र यसको दिगो व्यवस्थापनका लक्ष्यमा आफू अघि बढिरहेको बताउनु भयो । उहाँले ब्लड बैंक स्थापनाका लागि संस्थागत तथा व्यक्तिगत रुपमा पनि दाताहरुबाट ४६ लाख रकम जम्मा भैसकेको र अझै आउने क्रम जारीरहेको बताउँदै दाताहरुलाई सहयोगका लागि धन्यवाद दिनुभयो । अन्य दाताहरुलाई पनि सहयोग गर्न अनुरोध गर्नुभयो । उहाँले ब्लड बैंक स्थापनार्थ निःशुल्क जग्गा पनि प्राप्त भैसकेको जानकारी गराउनु भयो ।
पत्रकार महासंघ पाल्पाका सदस्य कृष्ण पोखरेलले कुटुम्ब सहकारीको उत्तरोत्तर प्रगतिको शुभकामना दिनुभयो ।
उद्घाटन पछिको बन्द सत्रमा अध्यक्षका तर्फबाट राखिएका विभिन्न प्रस्ताव माथि व्यापक छलफल भई सर्वसम्मतरुपमा पारित भएका थिए । छलफलका क्रममा सहभागीहरुले विभिन्न जिज्ञासा तथा सुझावहरु पनि राख्नुभएको थियो ।
कार्यक्रममा ज्येष्ठ शेयर सदस्य, उत्कृष्ट आर्थिक कारोबार गर्ने र उद्यमशील शेयर सदस्यलाई सम्मान गरिएको थियो । कार्यक्रमको अन्त्यमा अध्यक्षले प्रमुख अतिथिलाई शेयर सदस्यहरुलाई प्रेरित गर्ने मन्तव्य राख्नुभएकोमा धन्यवाद दिँदै संस्थाको लोगो अंकित मायाको चिनो प्रदान गर्नुभएको थियो । उहाँले कार्यक्रम सफल पार्न आ–आफ्ना ठाउँबाट योगदान पुर्याउने सबैलाई धन्यवाद दिनुभयो ।
कार्यक्रम संस्थाका उपाध्यक्ष महेश शर्मा आचार्यको स्वागत तथा संस्थाका सचिव नारायण न्यौपानेको सञ्चालनमा चलेको थियो ।