धातानन्द शर्मा गैरे । पाल्पा
बगनासकाली ८ बराङ्दी घिउसीबासमा रहेको सिद्धबाबा मन्दिर व्यवस्थापन समितिको आयोजना तथा महायज्ञ सम्पन्न गर्न सहजीकरण गर्ने “हाम्रो समन क्याम्प” संस्थाको यज्ञ व्यवस्थापनमा २०८१ माघ १ देखि ९ गतेसम्म सिद्धबाबा मन्दिरमा वृहत धार्मिक महायज्ञ हुनेभएको छ । यज्ञ सम्पन्न गर्नका लागि आयोजक संस्था, यज्ञ व्यवस्थापन गर्ने संस्था “हाम्रो समन क्याम्प” र महायज्ञ मूल समारोह समितिको संयुक्त बैठकमा व्यापक छलफल र अन्तक्र्रिया पछि महायज्ञ सम्पन्न गर्ने सम्बन्धी लिखित सम्झौतामा हस्ताक्षर गरिएको छ ।
बैठकमा यज्ञ व्यवस्थापन सहजकर्ता संस्थाका कार्यकारी निर्देशक शैलेशराज अर्यालले महायज्ञमा आर्थिक व्यवस्थापन र यसको पारदर्शिता, दानमा प्राप्त जग्गा र जिन्सीको व्यवस्थापन, आर्थिक पारदर्शिताका लागि एउटामात्र रसिदबाट आम्दानी गर्ने, दैवीप्रकोप तथा अनाथ बालबालिका कोष व्यवस्थापन, दानपेटिका व्यवस्थापन अपनाइने नीतिका बारेमा प्रष्ट पार्नुभयो ।
उहाँले यज्ञ व्यवस्थापनका लागि आफ्नो संस्थाका तर्फबाट सम्पन्न गरिने जिम्मेवारीका सन्दर्भमा प्रमुख वाचक, उपवाचक, लाइभ मिडिया, क्यामेरा, टेन्ट, पण्डाल (वाटरप्रुफ), मूलगेट स्थापना, १०० जना अट्ने मञ्च र त्यसको सजावट, बत्ती, जेनरेटर, पण्डाल प्रवेशद्वार, निमन्त्रणा पत्र, फ्ल्याक्सबोर्ड, इन्धनसहित १० दिनका लागि प्रचारप्रसार गर्न सवारी साधनको व्यवस्था, उद्घाटनमा अतिथिलाई ओढाउने खादा, सचिवालय स्थापनाका लागि आवश्यक सामाग्री, उद्घाटन र कलशयात्राका लागि आवश्यक सामाग्री र मायाको चिनो आदि कामका लागि आफ्नो संस्थाले दायित्व लिने प्रतिवद्धता व्यक्त गर्नुभयो । यी सेवा प्रदान गरेवापत यज्ञमा उठेको रकमको चालिस प्रतिशत रकम आफ्नो संस्थाको र बाँकी ६० प्रतिशत आयोजक संस्थाको हुने, धेरै रकम उठे पनि १८ लाख भन्दा बढी आफ्नो संथाले नलिने र कथं कदाचित दानमा अत्यन्त न्यून रकम उठेर आयोजक संस्थालाई समस्या पर्न गएमा यज्ञको सबै खर्च आफ्नो संस्थाले बेहोर्ने वचनवद्धता पनि शैलेशराज अर्यालले गर्नुभयो ।
आयोजक संस्था सिद्धबाबा मन्दिर व्यवस्थापन समितिका तर्फबाट खानपिन, आवास, चियानास्ता, गुरुवरणी, पञ्चेबाजा, खादा, फ्रेम आदिको व्यवस्था मिलाउनेलगायत रहेको छ । महायज्ञमा सम्पन्न गरिने चौरासी पूजा, तुलादान, व्रतबन्ध, रुद्री, लाखबत्ती प्रज्वलन, सन्ध्याआरती सम्पन्न गर्न चाहने भक्तजनका लागि सहयोग शुल्क निर्धारण गर्ने पनि आयोजक संस्थाको जिम्मेवारी हुने निर्णय भएको छ । कुनै दिनको चियानास्ता, खाना खर्चको जिम्मेवारी लिई त्यसको व्यवस्थापन गर्न ईच्छुक व्यक्ति तथा संस्थालाई त्यसको न्यूनतम शुल्क निर्धारण गर्ने काम पनि आयोजक संस्थाले गर्नेछ ।
बैठकमा छलफलको क्रममा अहिले धर्ममा विकृति मौलाउँदै गएको, हैसियत भन्दा बढी र व्यक्तिको ईच्छा विपरित दान बोलकबोल गर्न प्रेरित गरी दान उधारो राख्दा दान कहिल्यै नउठ्ने, दाताको धार्मिक आस्था विचलित भई दाता मन्दिरमै प्रवेश नगर्ने अवस्थाप्रति चिन्ता व्यक्त गरियो । अब विगतको अवस्थामा सुधार ल्याई धर्ममा शुद्धिकरण र सुधारको पहल गर्ने प्रतिवद्धता पनि व्यक्त गरियो । महायज्ञमा दाताको ईच्छा र क्षमता अनुसार जतिसुकै दान दिए पनि स्वीकार गर्ने, दान नगद मात्र लिने उधारो नराख्ने, उठेको रकम बैंक दाखिला गरी चेकबाटमात्र कारोबार गरी पूर्ण आर्थिक पारदर्शिता अपनाउने, हरेक दिन उठेको दानको हिसाब सुनाउने पनि निर्णय गरियो ।
महायज्ञ मूल समारोह समितिले आउँदो पौष छ गतेका दिन मन्दिर परिसरमा वृहत बैठक बोलाई महायज्ञ सम्पन्न गर्न उपसमितिहरू गठन गरी जिम्मेवारी हस्तान्तरण गर्ने पनि निर्णय गरेको छ । महायज्ञ सम्पन्न गर्ने सम्झौतापत्रमा हाम्रो समन क्याम्पका तर्फबाट संस्थाका कार्यकारी निर्देशक शैलेशराज अर्याल र सहायक यज्ञ व्यवस्थापक प्रज्वलराज पौडेल, महायज्ञ मूल समारोह समितिका तर्फबाट संयोजक गणेशप्रसाद बस्याल, उपसंयोजक युवराज गैरे, महासचिव जीवलाल बस्याल र सहसचिव सुशील बस्यालका साथै सिद्धबाबा मन्दिर व्यवस्थापन समितिका तर्फबाट अध्यक्ष मोहन अर्याल र सचिव कृष्णप्रसाद बस्यालले हस्ताक्षर गर्नुभएको थियो ।
सम्झौता बगनासकाली गाउँपालिका वडा नं ८ का वडाध्यक्ष मोतिलाल बस्यालको रोहवरमा भएको थियो । बैठक महायज्ञ मूल समारोह समितिका अध्यक्ष गणेशप्रसाद बस्यालको अध्यक्षता तथा महासचिव जीवलाल बस्यालको सञ्चालनमा चलेको थियो ।
