पाल्पा । कारागारमै राष्ट्रिय परिचयपत्र बनाउन पाएपछि पाल्पा कारागारका कैदी बन्दी खुशी भएका छन् । जिल्ला प्रशासन कार्यालय पाल्पाले कारागारभित्रै राष्ट्रिय परिचयपत्र दर्ता तथा निर्माण कक्ष तयार गरी कैदीबन्दीका लागि सहजता बनाएको हो ।
प्रमुख जिल्ला अधिकारी तोयनारायण सुवेदीले सरकारले लिएको नीति अनुसार कैदीबन्दीहरूलाई आवश्यक सेवाबाट बञ्चित हुन नपरोस् भन्ने साेंचका साथ कारागारमै उनीहरुका लागि यो अवसर प्रदान गरिएको बताउनुभयो । उहाले जिल्लामा अहिले जिल्ला प्रशासन कार्यालयबाट नियमित रुपमा राष्ट्रिय परिचय पत्रको काम भइरहेकोले आम सर्वसाधारण कोही छुट्नुभएको छ भने प्रशासनमा आएर राष्ट्रिय परिचयपत्र बनाउन सकिने बताउनुभयो ।
पाल्पा कारागारका प्रमुख जेलर भगवानभक्त अर्यालले कारागारमा हाल २ सय ७१ जना कैदीबन्दी रहदै आएकोमा आवश्यक कागजपत्र पूरा हुने ५८ जनाले उक्त अवसर पाउने बताउनुभयो । उहाले यसरी कारागारमै राष्ट्रिय परिचयपत्र बनाउन पाएपछि कैदीबन्दीहरू खुशी भएको बताउनुभयो ।
