पाल्पा । निस्दी गाउँपालिका–५ गल्धाकी ४९ वर्षीया यमीसरा सारूले यस वर्ष २ सय धार्नी अदुवा बिक्री गर्नुभयो । उहाँले बारीमा अदुवा मात्रै हैन गेडागुडी पनि लगाउनुभएको छ । उहाँले अदुवा र गेडागुडी बिक्री गरेर मासिक ३० हजारसम्म आम्दानी लिन सफल भएको बताउनुभयो ।
गाउँमौ रहेको गल्धा सामाजिक उद्यमी महिला सहकारी संस्थामा लगेर यमीसराले आफ्नो उत्पादन बिक्री गर्नुहुन्छ । आफ्नो उत्पादन बिक्री गर्ने मात्र नभएर यमीसराले सहकारीमा अदुवाको ग्रेडिङ लगायतका काममा पनि दैनिक ज्यालादारीमा काम गर्दै आउनुभएको छ । “अदुवा लगाउने किसानहरु खुशी हुनुहुन्छ । हामीले पनि अदुवा लगाएर राम्रो आम्दानी लिने गरेका छौं ।” यमीसराले भन्नुभयो ।
यो सहकारीले किसानले उत्पादन गरेका अदुवा र सिमीका दाना लगायतका गेडागुडी ग्रेडिङ तथा प्याकेजिङ गरी देश बिदेशमा पठाउँदै आएको छ । यसबाट एकातिर सहकारीको कार्यक्षेत्र फराकिलो हुँदै गएको छ भने अर्कोतिर किसानको उत्पादनले सहज रुपमा बजार पाएको छ ।
स्थानीय ४२ वर्षीया गनिसरा बयम्बु पनि सहरकारीको सदस्यको रुपमा रहनुभएको छ । उहाँले पनि अदुवा उत्पादन गरी बिक्री गर्नुका साथै सहकारीमा ज्यालादारीमा काम समेत गर्दै आउनुभएको छ । उहाँले सहकारी स्थापना भएपनि यस क्षेत्रमा उद्यमशीलता फराकिलो बन्दै गएको उहाँले बताउनुभयो ।
यो सहकारीले बिगत दुई वर्षदेखि अदुवाका सुकाइएका चाना बिदेश निर्यात गर्दै आएको छ । काँचो अदुवा ९ हजार ८ सय केजी युरोप निकासी भएको संस्थाकी ब्यवस्थापक डिलमाया सारुले बताउनुभयो । अहिले सहरकारीको गाडीले किसानको घरघरमा पुगेर अदुवा ल्याउने र सहकारीका ल्याएपछि अदुवाको चाना बनाउने कार्य धमाधम भइरहेको उहाँले बताउनुभयो । दैनिक १५ जना महिलाहरुले अदुवा सफा गर्न, चाना बनाउन, सुकाउने काम गर्दै आएका छन् । त्यस्तै २५ हजार केजी सेतो सिमी ग्रेडिङको पनि काम सकिएको उहाँले बताउनुभयो ।
सहकारीमा आवद्ध भएका २ सय ७२ जना किसानसँग अर्गानिक प्रमाणित गरेर अदुवा खरिद गरी विदेश निकासी गर्ने तयारी गरिएको छ । यो सहकारीले हेफर नेपालको आर्थिक सहयोग, ग्रामीण आर्थिक विकास संघ रेडा पाल्पाको समन्वय र अकिस्टा नेपालको प्राविधिक सहयोग तथा निस्दी गाउँपालिकाको सहयोगमा उक्त अभियान चलाएको ब्यवस्थापक सारुले बताउनुभयो ।
यसवर्ष युरोपबाट आएको माग पूरा गर्न २५ हजार ८१ केजी सेतो र तीन हजार ५९ केजी कालो तथा खैरो गरी २८ हजार १४० केजी सिमी सहकारीले खरिद गरेको व्यवस्थापक सारुले बताउनुभयो । त्यसका लागि कृषि प्राविधिक अकिस्टा नेपाल प्रालिले नै खटाएको उहाँले बताउनुभयो ।
स्थानीय रोजी सुनारीले अदुवा उत्पादन गर्ने किसानहरुका लागि यो सहकारी बरदान सावित भएको बताउनुभयो । उहाँले बाँदर दुम्सीले पनि नखाने र राम्रो उत्पादन गर्न सकिने र बेच्न पनि सजिलो हुने भएकोले किसानहरु यस तर्फ आकर्षित भएको बताउनुभयो ।
सहरकारीले अदुवाको चाना तीन वर्ष अघिबाट युरोप निकासी सुरु गरेको हो । यसवर्ष पनि अकिस्टा नेपालले नसे जातको अदुवाको १० हजार केजी चाना निर्यात गर्ने सम्झौता गरेको छ । यो काँचो अदुवा ६० देखि ६५ हजार केजी हो । सहकारी संस्थाले २०८१ जेठमा ४ हजार ४ सय ६० केजी अदुवाको चाना युरोपका बजारमा पठाएको थियो । संस्थाले दुई वर्षअघि अर्गानिक प्रमाणित गरेर ८ सय ५ किलो अदुवा नमुना परीक्षणका लागि युरोप पठाएको थियो । निकासी गर्ने संस्थाले प्रशोधन घाटा, प्रमाणीकरण, ओभरहेड लगायतमासमेत सहकारीलाई सहयोग गर्ने गरेको छ ।
यो सहकारीले अदुवाको खरिद बिक्री, प्रशोधन तथा बजारीकरण, गेडागुडीको बजारीकरण, खशी बोकाको बजारीकरण, पशु बस्तुको इन्स्योरेन्स लगायतका कार्य गर्दै आएको छ । २०७३ सालमा स्थापना भएको यो सहकारीको अभियानले निस्दीलाई देश बिदेशमा चिनाएको छ ।
यो सहकारी स्थापनादेखि हालसम्म निस्दी गाउँपालिकाले उल्लेख्य सहयोग गर्दै आएको छ । भवन निर्माण, गाडी खरिद तथा तालिम लगायतका कार्यहरुमा गाउँपालिकाको सहयोग रहँदै आएको निस्दी गाउँपालिकाका अध्यक्ष मुक्त बहादुर सारुले बताउनुभयो । उहाँले आगामी दिनमा पनि निस्दी गाउँपलिकाको तर्फबाट यो सहकारीका लागि आवश्यकता अनुसारको सहयोग रहने बताउनुभयो ।
