पाल्पा । नेपाल राष्ट्रिय शिक्षक संगठन तानसेन नगर समितिले विद्यालयमा पाल्पाली पहिचान ढाकाको कपडालाई प्रयोग गर्न माग गरेको छ । संगठनले तानसेन नगरप्रमुख सन्तोषलाल श्रेष्ठ समक्ष मागपत्र पेश गर्दै उक्त माग गरेको हो । “विद्यालयमा पाल्पाली चिनोलाई भित्र्याउन शिक्षक तथा विद्यार्थी पोशाकमा अनिवार्य पाल्पाली ढाकाको टाइ, ढाकाटोपी, सल प्रयोगमा ल्याउनुपर्ने निर्णय गरी आगामी शैक्षिक सत्रबाटै लागू गरियोस् ।”–संगठनले भनेको छ ।
संगठनले ३०बुँदे माग पत्र पेश गर्दै तानसेनको शिक्षालाई नमूना बनाउन भनेको छ मागपत्रमा नगरपालिका भित्रका सरकारी तलबभत्ता खाने सबै खाले कर्मचारी र जनप्रतिनिधिका छोराछोरीलाई आगामी शैक्षिक सत्रबाटै सामुदायिक विद्यालयमा अनिवार्य भर्ना गर्नुपर्ने, निःशुल्क शिक्षा कार्यान्वयनको पहिलो चरणमा मा.वि. तहमा २ वटा धारा र आधारभूत तहमा एक वटा धारा, विजुली र इन्टरनेटको व्यवस्था आगामी बजेटबाटै निःशुल्क रुपमा मिलाउनुपर्ने । शिक्षकको सक्षमता विकासका लागि आइसिटी, पाठ्यक्रम प्रबोधिकरण, प्रश्नपत्र निर्माण र अभ्यास आदानप्रदान जस्ता कार्यक्रम समेट्नुपर्ने, विद्यालय तहका कर्मचारी र बाल सहयोगीका लागि नगरपालिकाद्वारा सामाजिक सुरक्षा कोषमा आवद्ध गर्नुपर्ने । तानसेनभित्र उत्पादित अनाजको खाजा निर्माण गरी विद्यालयमा वितरण गर्न मेघा दिवा खाजा कार्यक्रम ल्याउनुपर्ने । एक विद्यालय एक योग, खेलकुद र नर्स शिक्षकको व्यवस्थाका साथै शिक्षककको “प्रविधिमैत्री नमूना कक्षा” कार्यक्रम लागू गर्नुपर्ने छन् ।
त्यस्तै, विद्यालयको नक्साङ्कन गर्न तथा विद्यालय अनुगमन गरी पृष्ठपोषण र सुधार गर्न एक अनुगमन डेस्क तयार गरि परिचालन गर्नुपर्ने । विद्यालयको भौतिक अवस्थाको अनुपातमा विद्यार्थी संख्याको अवस्था समेत विज्ञ टोलीले मूल्याङ्कन गरी विद्यार्थी सिट क्षमता संख्या निर्धारण गर्नुपर्ने । नतिजाको मापदण्ड निर्धारण गरी उक्त आधार पुरा गरेका शिक्षकलाई पुरस्कृत र पुरा नगर्ने शिक्षकलाई पुनःर्बलको कार्यक्रम ल्याउनुपर्ने । मुख्य बजार क्षेत्रको कक्षा ११ र १२ मा एक विद्यालय एक धारको शिक्षा नीति अवलम्वन गर्नुपर्ने । नगरपालिकामा बसोबास गर्दै आएकाहरूका लागि विपन्न लक्षित कार्यक्रम बनाइ विद्यालयसँगको सहकार्यमा नियमित विद्यालय उपस्थित गराउन विद्यार्थी प्रोत्साहनका कार्यक्रम सञ्चालन गर्नुपर्ने । प्रत्येक वडाले आफ्नो बजेटबाट विपन्न विद्यार्थीको विद्यालयमा लाग्ने न्यूनतम खर्च व्यहोर्नुपर्ने छ ।
यसैगरी, विद्युतीय हाजिरी मेसिन बेवारिसे अवस्थामा रहेकाले यसलाई पुनः तत्काल सुचारू गर्नुपर्ने । विद्यालयको कक्षाकोठामा नगरगान गाउन र विद्यालयको परिसरमा नगरको झण्डा फहराउने व्यवस्था मिलाउनुपर्ने । राष्ट्रपति रनिङशिल्डको कार्यक्रमलाई हिउँदे बिदा सुरुहुने बेला सञ्चालन गर्नुपर्ने । एसइइ दिएर ३ महिना फाल्तु समय बस्ने विद्यार्थीका लागि उनीहरूको खुबी अनुसारको सीप स्वेच्छिक सिक्न लगाइ ३ महिने सिप सिकेपछि सोको प्रमाणपत्र नगरपालिकामा पेश गरेमा प्रोत्साहन स्वरुप निश्चित रकम प्रदान गर्ने व्यवस्था मिलाउनुपर्ने लेखिएको छ ।
संगठनले कक्षा ८ आधारभूत तह उत्तीर्ण परीक्षालाई नगरपालिकाले पूर्ण जिम्मा लिइ परीक्षा सञ्चालन, कक्षा ३ र ५ को परीक्षालाई समेत नगरको आधार परीक्षाको रुपमा सञ्चालन, तीनवटै त्रैमासिक तथा वार्षिक परीक्षामा नगरका नीजि तथा सामुदायिक विद्यालयमा एकै प्रकारको प्रश्नपत्र निर्माण गरी लागू गर्नुपर्ने तथा पाठ्यपुस्तकमा एकरुपता ल्याउने व्यवस्था मिलाउनुपर्ने । नगरको शिक्षाको गुणस्तर विकास सम्बन्धी छलफलमा शिक्षकका पेशागत संगठनका प्रतिनिधिलाई समेत सहभागि गराउनुपर्ने । हालको स्थानीय पाठ्यक्रममा कक्षा ५ भन्दा माथि कक्षा ६, ७ र ८ मा वृत्ति मार्गनिर्देशन, नविनतम प्रविधि र व्यवसायिक सिपसँग सम्बन्धित विषयवस्तु तथा कक्षा १ देखि ८ सम्म खुशी पाठ्यक्रम तथा जीवनोपयोगी शिक्षा थप गरियोस् । स्थानीय पाठ्यक्रम अनुसार पाठ्यपुस्तकको व्यवस्था गर्नुपर्ने माग गरेको छ ।
विद्यालय सञ्चालनमा निश्चित मापदण्ड बनाउन विज्ञ, अभिभावक, शिक्षक, विद्यार्थी, पेशागत संगठनका प्रतिनिधि र नगर पालिका सहितको टोली बनाइ वृहद छलफल तथा कार्यशाला गरेर नगरस्तरीय विद्यालयको मापदण्ड निर्धारण गर्न र शिक्षालाई नमूना बनाउन गोलमेच सभाको आयोजना गर्नुपर्ने । विद्यालयमा व्यवस्थित विज्ञान प्रयोगशाला, लाइब्रेरी, इ–लाईब्रेरी र सामाजिक प्रयोगशालामा लगानी बढाउनुपर्ने ।
अन्य जिल्ला तथा पालिकाबाट कक्षा ११ र १२ तथा क्याम्पस पढन तानसेन आउने वातावरण तयार गर्न ३.२ जिपिए भन्दा बढी ल्याउनेलाई मासिक एक हजार दिने घोषणा गर्नुपर्ने । शिक्षकलाई अविलम्ब मासिक तलब भुक्तानी गर्नुपर्ने । नगर शिक्षा शाखामा लामो समयदेखि रिक्त रहेको दरबन्दी तत्काल पूरा गरी आवश्यक जनशक्ति थप गर्नुपर्ने । प्रधानाध्यापकको पद पूर्णतया प्रशासनिक पद बनाई विद्यालय सुधारको करारनामा सहित विद्यालयको पूर्ण जिम्मेवारी प्रधानाध्यापकलाई दिनुपर्ने । शिक्षा क्षेत्रमा स–सर्त अनुदान बाहेक यी माथिका कार्य गर्नका लागि कुल बजेटको ३० प्रतिशत बजेट शिक्षा क्षेत्रमा छुट्याउनुपर्ने माग गरेको छ ।
शिक्षक संगठनका अध्यक्ष झविन्द्र देवकोटा र सचिव भवानी पंगेनीद्धारा हस्ताक्षरित मागपत्रमा तानसेन नगरप्रमुखले माग जायज भएकाले क्रमशः पुरा गर्दै जाने बताउनु भयो ।
