एवत सारू । पाल्पा
रम्भा गाउँपालिकाको वडा नं. २ फोक्सिङकोट रानीबास गाउँ । जहाँ होमस्टे संचालन अघि त्यति चहलपहल थिएन । टाढाको गाउँ धेरैलाई यहाँको बारेमा थाहा समेत थिएन । तर होमस्टे संचालनमा आएपछि रानीबासको मुहार फेरिएको छ ।
यहाँ सामुदायिक होमस्टे संचालनमा आएपछि दैनिक पर्यटकहरू आउने जाने क्रम बढेको छ । प्राकृतिक सौन्दर्य, स्थानीय नाच र लोक संस्कृति, स्थानीय उत्पादनका परिकार सँगै मगर संस्कृतिले होमस्टे संचालनको छोटो समयमा नै रानीबासको परिचय फराकिलो भएको छ ।
रानीबासमा सुरुमा १६ घरमा होमस्टे संचालन गरिए पनि आगन्तुकहरूको संख्या बढ्दै जाँदा होमस्टे संख्या बढाउनेपर्ने अवस्था आएको रानिबास होमस्टेका सचिब बिरबहादुर गुरुङले बताउनु भयो । ठूलो गाउँ भएकोले घरबासमा आबद्ध घरहरू सजिलै बढाउन सकिने उहाँको भनाई छ ।
गर्मी मौसमको सुरुवातीसँगै पर्यटकहरू शीतल ठाउँको खोजीमा यहाँ आउने गरेका छन् । रानीबास एकातिर पहाडी भुभाग र अर्कोतर्फ डाँडामा भएकोले पनि यहाँ सदाबहार रूपमा शित्तल छ । बुटवल, तानसेन, वालिङ, काठमाडौं, रामपुर लगायतका क्षेत्रबाट पर्यटक आउने गरेको रानीबास होमस्टेका अध्यक्ष देउकुमारी सारूले बताउनु भयो । दिनहुँ घासपात र खेती किसानी गर्ने आफुहरूले होमस्टे संचालनमा आएपछि फुर्सदै नपाएको होमस्टे संचालक बबीसरा सारुले बताउनुभयो । बाख्रा माहारा जाने, घाँस काट्ने आफ्नो दैनिकी पाहुनाको व्यवस्थापनमा दिन बितेको सारुले बताउनुभयो ।
बिदाको समयमा यहाँ बढी संख्यामा पर्यटक आउने गरेका छन् । विभिन्न कार्यालयका कर्मचारीहरू समूह बनाएर आउने गरेका छन् । कतिपय सम्पन्न परिवारले आफ्नो छोराछोरीलाई ग्रामीण जीवनको वास्तविक रूप देखाउन पनि आउने गरेका छन् । रम्भा गाउँपालिका २ नम्बर वडाको रानीबास समुन्द्र सतहदेखी करिब १ हजार ३०० मिटर उचाईमा रहेको उत्तर क्षेत्र फर्केको रमाइलो गाउँ हो । सिद्धार्थ राजमार्गको राम्दी देखी करिब ११ किलोमिटर मोटरबाटो हिंडेपछि रानीबास गाउँ पुग्न सकिन्छ । यहाँका मानिसले कोदो,मकै, फापर, सिलटुङ, गहु जस्ता परम्परागत बाली लगाउने गर्दछन् । तानसेन बजारदेखी झण्डै ४० किलोमीटर, पोखरा देखि ढछ किलोमीटर र रामपुर देखि ३५ किलोमिटर दुरीमा रहेको रानीबास गाउ रमणीय, पर्यटकीय र सुन्दर छ । यहाँबाट घुमीघुमी कालीगण्डकीको बगेको, राम्दी पुल, सिद्धार्थ राजमार्ग, अन्नपूर्ण हिम श्रींखला, रिमिघा लेकहरु देख्न सकिन्छ ।
१५ जनाभन्दा धेरै जनाको समूह आएमा पन्चेबाजा र झाम्रेबाट स्वागत गरिन्छ । बेलुकी पाहुनाको चाहना अनुसार मारुनी नाच सँगै स्थानीय झाम्रे गीतमा मन खोलेर नाच्न पाइन्छ । नाचसँगै गाउको माझमा रहेको चुर्र्की थान र जनजाति संग्राहालय अवलोकन गर्न सकिन्छ ।
एक जना पर्यटकबाट १ हजार रुपियाको प्याकेज तयार गरिएको छ । यस प्याकेजमा स्वागत सहितको ३ पटकको नास्ता, साझ मासु भात र आनन्दको सुताई रहेको छ । गाउमा होमस्टे संचालन भएपछि बाटोघाटो घर आँगन जतिखेर पनि चिटिक्क देखिन थालेको छ । गाउलेहरू खुसी देखिन थालेका छन् । गाउलेहरू फुल खेती गर्न थालेका छन् । छोडी सकेको कोदो, मकै र गहुखेती फेरि सुरू गर्ने तर्खरमा छन् ।
समूहमा आउने पाहुनाहरूले सामुहिक भोजन गर्ने रुचि देखाएका छन् । कतिपयले राती क्याम्प फायरको माग समेत गरेको पाइन्छ । केही पाहुनाले मादल खैजेडी मागेर अनुशाशित रुपमा आफ्नै समूहमा नाचगान गरेको पाइन्छ । आफू रानिबास होमस्टेमा आएर पुर्ण सन्तुष्ट रहेको पाल्पा रामपुर निवासी ५७ बर्षिय कमलराज भट्टराईले बताउनु भयो । यहाको जनजीवन, कला, संस्कृति र स्वागतले आफू अत्यन्तै खुसी भएको आधारभूत मावी रामपुरका प्रधानाध्यापक रुपनाथ गौतमले बताउनुभयो ।
यह फागुन २ गतेबाट होमस्टे सुरू भएको हो । पर्यटन विकासको माध्यमबाट यहाका जनताको आर्थिक विकास गर्नुनै गाउपालिकाको लक्ष्य रहेको रम्भा गाउपालिकाका अध्यक्ष बिष्णुप्रसाद भण्डारीले बताउनुभयो ।
