पाल्पा । नेपाल नेत्रज्योति संघ पाल्पाको २४ औं साधारणसभा तानसेनमा सम्पन्न भएको छ । सभामा प्रमुख अतिथि नेपाल नेत्रज्योति संघ लुम्बिनी प्रदेशका उपसभापति शेर बहादुर थापाले नीजि क्षेत्रबाट संचालित आँखा अस्पतालमा नेपाल सरकारको सहयोग न्युन रहेको बताउनुभयो ।
उहाँले वर्तमान समयमा आँखा जाँच गर्ने डाक्टरको अभाव रहेकोे पाल्पा, गुल्मी र अर्घाखाँची जिल्ला मिलेर समस्या समाधान गर्न लागि परेको बताउँदै लुम्बिनी प्रदेशको तर्फबाट आवश्यक सहयोग गर्ने प्रतिबद्धता व्यक्त गर्नुभयो । कार्यक्रममा नेपाल रेडक्रस सोसाइटी पाल्पा शाखाका सभापति बाबुराम कार्की, कालीगण्डकी आँखा उपचार केन्द्र तथा सर्जिकल सेन्टरका सदस्य भोजेन्द्र प्रकाश ढकाल, केशलक्ष्मी श्रेष्ठ लगायतले आ–आफ्नो धारणा राख्नुभयो ।
साधारणसभामा संघका भुतपुर्व सचिव स्वर्र्गीय लोकप्रसाद ढकालको स्मृतिमा उहाँको श्रीमती शारदा ढकालले कोठा निर्माणका लागि रु ३ लाख ५ हजार प्रदान गर्नुभएकोमा सम्मान गरिएको थियो । आमन्त्रित सदस्य केशलक्ष्मी श्रेष्ठले आफ्नो स्वर्गीय आमा बुबाको स्मृतिमा रु ३० हजार र भवन निर्माणको लागि प्रेम बुढाले रु २५ हजार सभापति बुद्धिप्रसाद शर्मालाई हस्तान्तरण गर्नुभएको थियो । सभामा संघका सचिव राजेन्द्र लिगलले बार्षिक प्रतिवेदन, र कोषाध्यक्ष बेदराम शिरिषले आँखा अस्पतालको ४ करोड ४३ लाख र नेत्रज्योति संघ तर्फबाट १६ लाख १५ हजार बराबरको आर्थिक प्रतिबेदन प्रस्तुत गर्नुभएको थियो ।
बन्द सत्रले सचिवको वार्षिक प्रतिवेदन र कोषाध्यक्षबाट प्रस्तुत भएको प्रतिवेदन सुझाव सहित पास गरेको थियो । कार्यक्रम संघका सभापति बुद्धि प्रसाद शर्माको सभापतित्व, उपसभापति भिमसेन कार्कीको स्वागत र सचिव राजेन्द्र लिगलको संचालनमा सम्पन्न भएको थियो ।
