पाल्पा । निःशुल्क परिवार योजना तथा प्रजनन् रुग्णता स्वास्थ्य शिविर बगनासकाली गाउँपालिकाभित्र रहेका वडातहका स्वास्थ्य संस्थामा सञ्चालन गरिएको छ । बगनासकाली गाउँपालिकाको आयोजनामा गाउँपालिकाभित्रका सवै वडालाई लक्षित गरि शिविर सञ्चालन गरिएको स्वास्थ्य शाखा प्रमुख मणिराम अधिकारीले जानकारी दिनुभयो ।
आज मंगलबार वडा नं. २ पोखराथोकमा शिविर सञ्चालन गरिएको थियो । शिविरमा महिला तथा प्रसुती रोग सम्बन्धी परीक्षण, उपचार तथा परामर्श, पाठेघरको मुखको क्यान्सर स्क्रिनिङ, थर्मोफोल्यासन, लामो अवधिको परिवार नियोजन सेवा, आङ खस्ने समस्याको परीक्षण, उपचार र परामर्श, निःशुल्क औषधी वितरण लगायतको सेवा प्रदान गरिएको छ । परिवार नियोजन संघ पाल्पा शाखाको सहयोग, वडाहरूमा रहेका स्वास्थ्य चौकीको समन्वयमा कार्यक्रम सञ्चालन भएको गाउँपालिकाले जनाएको छ ।
बैशाख २१ गतेदेखि सञ्चालन भएको शिविरबाट गाउँपालिकाभित्रका विभिन्न स्वास्थ्य संस्थाहरूबाट ३ सय बढी सेवाग्राहीले प्रत्यक्ष लाभ लिएका छन् । बैशाख २१ देखि ३० गतेसम्मको शिविरबाट ९ जनामा क्यान्सरको लक्षण देखिएकोमा ७ जनालाई थर्मोफोल्यसन सर्भिस दिइएको, ३ जना क्यान्सरका विरामीलाई रिफर गरिएको, ५ जनामा आङ खस्ने समस्या देखिएको, १० जनाले लामो समय सम्मको परिवार नियोजन सेवा लिएको स्वास्थ्य शाखा प्रमुख मणिराम अधिकारीले जानकारी दिनुभयो ।
शिविर उद्घाटन कार्यक्रम गाउँपालिकाका अध्यक्ष सरस्वती दर्लामी चिदीको प्रमुख आतिथ्यतामा भएको थियो । उहाँले शिविरको उद्घाटन गर्दै सेवाग्राहीहरूलाई वडाबाट सहजै र गुणस्तरीयरूपमा परिवार योजना सेवाबारे जानकारी, परामर्शसहितस्वास्थ्य सेवा प्रदान गर्ने उद्देश्यले कार्यक्रम आयोजना गरिएकाले वडातहमा उपलब्ध गराइने सेवाको भरपुर उपभोग गर्न अनुरोध गर्नुभयो । उहाँले वडातहमा आवश्यकता पहिचानगरी नियमित शिविर सञ्चालनबाट परिवार योजना, प्रजनन् रुग्णताको सेवा उपलब्धतालाई सुनिश्चितता गर्दै जाने जानकारी दिनुभयो ।
उद्घाटन कार्यक्रम वडा नं. ८ का वडा अध्यक्ष मोतीलाल बस्याल अध्यक्षता बराङ्दी स्वास्थ्य चौकी इन्चार्ज गोम बहादुर क्षेत्रीको स्वागत र स्वास्थ्य शाखा प्रमुख मणिराम अधिकारीको सञ्चालनमा भएको थियो । शिविरको बैशाख ३१ गते बुधबार समापन हुने स्वास्थ्य शाखाले जानकारी दिएको छ ।
गाउँपालिकाको स्वास्थ्य शाखाले दिएको जानकारी अनुसार बगनासकाली गाउँपालिका वडा नं. ६ मा रहेको दर्पुक सामुदायिक स्वास्थ्य इकाई र वडा नं. १ मा रहेको चिर्तुङ्गधारा स्वास्थ्य इकाईमा भने स्वास्थ्य कार्यालयको समन्वयमा शिविर सञ्चालन हुनेछ । यसअघि गाउँपालिकाले सवै वडाहरूमा पुगेर निःशुल्क आँखा परीक्षण, योजना सम्झौता, उपभोक्ता तालिम, सामाजिक सुरक्षा भत्ता वितरण लगायतका सेवा उपलब्ध गराएको गाउँपालिकाका एम.आई.एस. भोजराज भट्टराईले जानकारी दिनुभयो । बगनासकाली गाउँपालिकाले नागरिकको सहज र सर्वसुलभ सेवा प्रदान गर्ने उद्देश्यले अन्य विभिन्न शाखाबाट प्रदान हुने सेवालाई समेत वडातहमै पुगेर उपलब्ध गराउँदै आएको छ ।
