पाल्पा । बगनासकाली गाउँपालिका वडा नं. ६ मचेटा स्थित कालीगण्डकी नदीमा अनुगमनको क्रममा गैरकानुनी गिटी बालुवा र ढुंगाको अनियमित निकासी भएको पाइएपछि बगनासकाली गाउँपालिकाले थप अनुगमन र कारवाहीका लागि जिल्ला समन्वय समितिलाई पत्राचार गरेको छ ।
बगनासकाली गाउँपालिकाको आफ्नो नियमित अनुगमन गर्ने क्रममा सोमवार स्थानीयहरुको सूचना अनुरुप गाउँपालिका अध्यक्ष, उपाध्यक्ष, प्रवक्ता सहित कार्यपालिका सदस्य, प्राविधिक कर्मचारी र पत्रकारहरुले बिभिन्न योजना, नदीघाट र बगरको समेत अनुगमन गरेका थिए ।
अनुगमनको क्रममा दर्पुक तथा मचेटाघाट अनुगमनको क्रममा गाउँपालिकाले बातावरणीय प्रभाव मुल्यांकन नगरिएको गिटी बालुवा उत्खनन् तथा ओसारपसारमा रोक लगाइएको जसको नजिकमा कालीगण्डकी बृहत लिफ्टिङ योजनाका संरचनाहरु निर्माण हुँदै गरेको र मचेटाबस्ती समेतलाई प्रभाव पार्ने गरि नदीजन्य पदार्थ ढुंगा गिटी बालुवा गैरकानुनी उत्खननु गरि नजिकैको दर्पुक गाउँमा लगेर डम्पिङ गरिएको पाइएको छ । त्यस्तै दर्पुकमा निर्माणाधिन मोटरबाटोको पक्की नालीमा पनि गैरकानुनी ढुंगा, गिटी बालुवा प्रयोग भएको पाइएको छ ।
सोही घाटमा पाल्पा स्याङजा जोड्ने पक्की पुल निर्माण हुँदै गरेको स्थानबाट बस्ती तथा निर्माणाधिन योजनालाई पनि प्रभाव पार्ने गरि मचेटाबाट कोही कसैको अनुमति बिना नदी जन्य पदार्थको उत्खनन् र निकासी भएको पाइएको र आफुहरुको अनुगमन पश्चात मंगलवार जिल्ला समन्वय समितिलाई थप अनुगमन गरि आवश्यक प्रक्रिया अगाडि बढाउन पत्राचार गरिएको गाउँपालिका अध्यक्ष सरस्वती दर्लामी चिदीले बताउनुभयो ।
सोमवार नै सबैको रोहबरमा गरिएको अनुगमनमा करिव ४० ट्याक्टर गिटी बालुवा र करिव १५ ट्याक्टर ढुंगा दर्पुकका बिभिन्न स्थानमा गरिएको डम्पिङमा भेटिएको छ । दैनिक रुपमा ३ ट्याक्टरले सो स्थानबाट गिटी बालुवा ओसारपसार गर्ने गरेको स्थानीयले बताएका छन् । तत्काल यो उत्खनन् रोक्न नसकेमा त्यस क्षेत्रका बस्ती तथा विकास निर्माण योजनाहरुलाई समेत ठूलो नोक्सानी हुने र अवैध रुपमा हुने यस्ता गैरकानुनी कार्यहरुले प्रसय पाउने भएकोले गाउँपालिकाले अनुगमन गरि थप अनुगमनका लागि जिल्ला समन्वय समितिलाई अनुरोध गरिएकोे अध्यक्ष चिदीले बताउनुभयो । गाउँपालिकाले जिल्ला समन्वय समितिलाई पठाएको पत्रको बोधार्थ जिल्ला प्रशासन कार्यालयलाई समेत पठाइएको छ ।
जिल्ला समन्वय समिति पाल्पाका प्रमुख टंकनाथ खनालले गाउँपालिकाले पठाएको पत्र प्राप्त भएको र जिल्ला समन्वय समितिको तर्फबाट तत्काल अनुगमन गरिने बताउनुभयो । उहाँले गैरकानुनी कार्य भएको पाइएमा दोषी उपर कानुन बमोजिम कारबाही हुने समेत बताउनुभयो ।
