पाल्पा । रम्भा गाउँपालिकाले सञ्चालन गरेको विद्यार्थीसँग करेसावारी कार्यक्रम प्रभावकारी भएको छ । रम्भाको यो अभ्यास जिल्लामै नौलो हो । यो कार्यक्रम अन्तरगत गाउँपालिकाले विद्यालयलाई विभिन्न तरकारी बालीहरुको बिउबिजन उपलब्ध गराउछ र विद्यालय मार्फत विद्यार्थीहरुलाई बिउ वितरण गरिन्छ ।
विद्यार्थीहरुले खाली समयको सदुपयोग गर्दै घरमा करेसाबारी तयार गर्छन् र त्यसको अनुगमन विद्यालय र पालिकाले गरि परीक्षाको प्राक्टिल बापतको नम्वर दिइन्छ । चालु आर्थिक वर्षको विद्यार्थीसँग करेसावारी कार्यक्रममा बिनियोजित बजेटबाट गाउँपालिका भित्रका विद्यालयमा कक्षा ६ देखि कक्षा १२ सम्म अध्ययनरत विद्यार्थीहरुलाई बिभिन्न ९ प्रकारका तरकारीहरुको बिउबिजन वितरण गरिएको छ । यो वर्ष गाउँपालिकाले बिद्यार्थीहरुलाई ९ प्रकारका तरकारी बालीको बिउ उपलब्ध गराएको छ । फर्सी, करेला, घिरौला, सिम्ला, लौका, सिमी, काक्रा, भिण्डी, बोडीको बिउ विद्यार्थीहरुलाई उपलब्ध गराइएको हो ।
यस वर्ष गाउँपालिकाबाट उक्त कार्यक्रमका लागि ६ लाख रुपैया बिनियोजन गरिएकोमा प्रक्रियागत रुपमा ५ लाख १० हजार रुपैयाको जम्मा १ सय २७ केजी बिउलाई जम्मा २ हजार ४ प्याकेटमा बनाई बितरण गरिएको गाउँपालिकाका लेखापाल डोलराज बस्यालले बताउनुभयो । बिउ खरिद मालुङ्गा एग्रोभेट मार्फत गरिएको उहाँले बताउनुभयो । यो कार्यक्रम रम्भा गाउँपालिकाभित्रका १६ वटा विद्यालयमा सञ्चालन गरिएको छ । गाउँपालिकाले बिउ खरिद गर्नुअघि निर्यातकर्ताले उपलब्ध गराएको सेम्पल बिउ जनकल्याण माविमा रहेको कृषि नर्सरीमा उमारेर हेरेपछि मात्रै खरिद गरिएको रम्भा गाउँपालिकाका अध्यक्ष बिष्णुप्रसाद भण्डारीले बताउनुभयो । “यसले एकातिर विद्यार्थी र अभिभावकहरुमा श्रमप्रतिको आस्था बढाउँछ भने अर्को पोषिलो तरकारी सहितको खाना सबै बिद्यार्थी अभिभावकले खाने वातावरण बन्छ ।” अधयक्ष भण्डारीले भन्नुभयो ।
अध्यक्ष भण्डारीले बिद्यार्थीहरुमा पढाईसँगै उद्यमशीलताको मनोविज्ञान बनाउने उद्देश्यले पालिकाले यो कार्यक्रम अगाडि बढाएको बताउनुभयो । उहाँले अव परीक्षा पछि विद्यार्थीहरुले घरघरमा करेसावारी तयार गर्ने र त्यही करेसावारीको अवलोकन गरिसकेपछि आगामी प्रथम त्रैमासिक परीक्षामा विद्यार्थीहरुले प्राक्टिकल नम्वर पाउने बताउनुभयो ।
गाउँपालिकाले बिउ खरिद गर्नुअघि बिउको उमारशक्तिको परीक्षण गर्नका लागि जनकल्याण माविका कृषि प्रशिक्षक लक्ष्मण पाण्डेलाई जिम्मेवारी दिएको थियो । प्रशिक्षक पाण्डेले बिउको राम्रो उमारशक्ति व्यवहारिक रुपमा हेरेपछि मात्रै खरिदका लागि गाउँपालिकालाई सिफारिस गरिएको बताउनुभयो ।
विद्यार्थीहरुलाई घरमा लगेर नर्सरी राख्ने, तरकारीको बिरुवा लगाउने लगायतको विषयमा कुनै समस्या रहेमा वडा वडामा रहेका कृषि प्राविधिकहरुले सहयोग गर्नेछन् । त्यस्तै जनकल्याण माविमा कृषि सम्वन्धी पनि पढाई हुने भएकोले त्यहाँका प्रशिक्षकहरुले पनि सहयोग गर्नेछन् । रम्भा गाउँपालिकाकी कृषि शाखा प्रमुख पुजा गुरुङले कुनै समस्या भएमा वा प्राविधिक सहयोग गर्नुपरेमा कृषि शाखा र कृषि प्राविधिकहरु जतिबेला पनि विद्यार्थी र अभिभावकहरुलाई सहयोगका लागि तयार रहेको बताउनुभयो ।
रम्भा गाउँपालिकाकी शिक्षा शाखा संयोजक मिनादेवी आचार्यले यो कार्यक्रम अघिल्लो वर्ष पनि प्रभावकारी रहेको बताउनुभयो । उहाँले यो कार्यक्रमबाट विद्यार्थी र अभिभावकहरू दुवै पक्ष लाभान्वित हुने बताउनुभयो ।
गाउँपालिकाका प्रमुख प्रशासकीय अधिकृत भक्तुजङ रानाले यो कार्यक्रम जिल्लामै नौलो भएको बताउनुभयो । रम्भा गाउँपालिकाले यसअघि गाउँपालिका भित्रका बिद्यालयका विद्यार्थीहरुको दुर्घटना वीमा समेत गरिसकेको छ ।
