पाल्पा । माथागढी गाउँपालिकामा कृषि तथा उद्यमशीलतामा आधारित नवप्रवर्तन कार्यक्रम प्रभावकारी रुपमा संचालन हुँदै आएको छ ।
लुम्बिनी प्रदेश मुख्यमन्त्री तथा मन्त्रीपरिषद्को कार्यालय मार्फत बेरोजगार युवासँग नवप्रवर्तन कार्यक्रम हाल पाल्पा जिल्लामा माथागढी गाउँपालिकामा मात्र संचालन रहेको छ । यो कार्यक्रम स्थानीय तहसँगको साझेदारीमा नवप्रवर्तन साझेदारी कोष मार्फत यो कार्यक्रम संचालन हुँदै आएको छ । २०७९ बैशाखबाट सुरू भएको यो कार्यक्रमले पालिका भित्रका ३ सय ७५ जना युवालाई तालिम र प्रविधि हस्तान्तरण सहित उद्यमशील बनाउने उद्देश्य लिएको गाउँपालिकाका प्रमुख प्रशासकीय अधिकृत दिनेश ज्ञवालीले बताउनुभयो ।
यो कार्यक्रम अन्तरगत तालिममा सहभागी युवाहरुलाई तालिममा सहभागी भएवापत प्रमाणपत्र मात्रै नभएर तालिम अनुसारको व्यवसाय गर्नका लागि आवश्यक प्रविधि पनि हस्तान्तरण गरि उनीहरुलाई व्यवसायिक बनाउने यो कार्यक्रमको मुख्य उद्देश्य रहेको उहाँले बताउनुभयो ।
सम्पन्न कार्यक्रमहरूः
यो कार्यक्रम अन्तरगत गाउँपालिका स्तरीय १ दिने अभिमुखीकरण कार्यक्रम गरिएको थियो । जुन कार्यक्रममा १ सय १ जनाको सहभागिता रहेको थियो । त्यस्तै पालिका भित्रका ८ वटै वडाहरुमा ५०० घरहरुमा घरधुरी सर्वेक्षण गरिएको थियो । त्यस्तै पालिकाका सबै वडाका गरि ३ सय ७५ जनालाई ५,५ दिनको उद्यमशीलता विकास तालिम सञ्चालन गरिएको
थियो ।
गाउँपालिकाको वडा नं. २ रुप्से, वडा नं. ७ गोठादी र वडा नं. ७ मटेरीमा १५ दिनको व्यवसायिक तरकारी खेती तालिम संचालन गरिएको थियो । जसमा ६० जनाको सहभागिता रहेको थियो । वडा नं. ४ देउगीरमा २५ जना सहभागी रहेको २ महिने कार्यस्थल तालिम सहित ६ महिने सिलाई कटाइृ सम्बन्धी एडभान्स तालिम संचालन गरिएको छ । त्यस्तै सोही तालिमका सहभागीहरुलाई व्यवसायिक सिलाई कटाई संचालनको लागि प्रविधि हस्तान्तरण गरिएको छ । त्यस्तै वडा नं. ३ सराईमा १६ जनाको सहभागितामा ३ महिने व्यवसायिक व्युटिपार्लर सम्वन्धी एड्भान्स तालिम सम्पन्न भएको छ । यो तालिमका सहभागीहरुलाई प्रतिव्यक्ति झण्डै ६० हजार रुपैयाँ बरावरको प्रविधि हस्तान्तरण कार्य पनि सम्पन्न भएको छ ।
प्रक्रियामा रहेका कार्यक्रमहरूः
यो कार्यक्रम अन्तरगत केही कार्यक्रमहरू तय भएर पनि संचालनको पक्रियामा रहेका छन् । करिव ९० जनाको सहभागिता रहनेगरि संचालन गर्न लागिएको मसला प्रशोधन एवम् प्याकेजिङ तालिम संचालनको प्रक्रियामा रहेको छ । त्यस्तै तालिम पश्चात व्यवसायिक मसला उद्योग संचालनको योजना पनि रहेको प्रमुख प्रशासकीय अधिकृत ज्ञवालीले बताउनुभयो । त्यस्तै ५० जनाको सहभागितामा गर्न लागिएको व्यवसायिक दुनाटपरी तालिमको पनि संचालन तयारी गरिएको छ । यसको लागि आवश्यक प्रविधि ल्याउने कार्य अन्तिम चरणमा रहेको र छिटै तालिम संचालन हुने ज्ञवालीले बताउनुभयो ।
त्यस्तै दुनाटपरी बनाउने तालिम सम्पन्न भएपश्चात सहभागीहरुलाई प्रविधि हस्तान्तरणको कार्यक्रम पनि रहेको छ । त्यस्तै किसानहरुको सबैभन्दा बढी माग रहेको व्यवसायिक मौरी पालन सम्वन्धी तालिम पनि यो कार्यक्रम अन्तरगत संचालनको तयारी गरिएको छ । तालिममा १ सय ३४ जनाको सहभागिता रहने र तालिमका सहभागीहरुलाई तालिम पश्चात प्रविधि हस्तान्तरण गर्ने कार्यक्रम पनि रहेको छ । त्यस्तै यससम्वन्धी रेडियो कार्यक्रम संचालन तानसेन स्थित रेडियो कुटुम्बबाट संचालन हुदै आएको छ । यो कार्यक्रम अन्तरगत हरेक हप्ताको २ दिन सोमवार र बिहीवार यो कार्यक्रमको प्रभाव सहितको रेडियो कार्यक्रम संचालन हुदै आएको प्रमुख प्रशासकीय अधिकृत ज्ञवालीले बताउनुभयो ।
