१३ वर्षे यात्रामा पाल्पा समाचारपत्र

0
421

पाल्पा समाचारपत्र साप्ताहिक औपचारिक रुपमा सुरू भएको १३ वर्ष शुभारम्भ भएको छ । सुरुवातदेखिका १२ बर्ष हामीले आम पाठकहरुको सुझाव सल्लाह बमोजिम नै सफलतापुर्वक पुरा गर्न सफल भएका छौं । १३ औं प्रवेशको यो सुखद अवसरसम्म आइपुग्न प्रत्यक्ष अप्रत्यक्ष रुपले हामीले सुझाव सल्लाह मार्ग दर्शन र सहयोग गर्ने सबै प्रति हार्दिक आभार प्रकट गर्दछौं । पछिल्लो समय स्थानीय पत्रपत्रिकाकाको निरन्तरता निकै चुनौतीपूर्ण बनेको छ ।

कोभिड–१९ को संक्रमणपछि अहिलेसम्म पनि कोभिड अगाडिको अवस्थामा बजार र अर्थतन्त्र फर्कन सकेको छैन । यसकारण पनि स्थानीय पत्रपत्रिकाले पाउने स्थानीय बिज्ञापन सूचनाहरुको क्रम न्युन नै छ । अर्कोतर्फ सरकारी कार्यालय तथा स्थानीय सरकारहरुले पनि समानुपातिक बिज्ञापन नीति कार्यान्वयनमा नहुँदा पाल्पा समाचारपत्र जस्तै धेरै पत्रपत्रिका र स्थानीय संचारमाध्यमहरुको निरन्तरतामा समस्या छ ।

पत्रिका स्थानीय स्तरमा मात्रै बितरण हुने, चाहेर पनि सबै ठाउँमा पठाउन नसकिने र साप्ताहिकका माध्यमबाट भन्दा अनलाइनबाट पनि हामीले हाम्रा पाठकहरुलाई सुसुचित गराउन सक्छौ भन्ने मान्यता अनुुरुप नै हामीले ६ वर्ष अघिदेखि निरन्तर रुपमा पाल्पा समाचार डटकम नामक अनलाइन पत्रिका दर्ता गरि सञ्चालन गरिरहेका छौं । यो अनलाइनले पाल्पा समाचारपत्रमा समावेश सामाग्रीहरुसँगै अन्य स्थानीय सामाग्रीहरुलाई प्रकाशन गर्दै आएको छ । देश विदेशमा रहनुभएका हाम्रा पाठकले पनि आगामी दिनको निरन्तरताका लागि सुझाव सल्लाह दिदै आउनुभएको छ । उहाँहरुको साथ र सहयोगलाई हामीलाई थप उत्साही बनाएको छ ।

पाल्पा आफैमा पनि व्यापरिक हिसावले खासै चलायमान छैन । यस्तो अवस्थामा यहाँको बिज्ञापन बजार चलायमान हुने कुरै भएन । यस्तो अवस्थामा पनि पाल्पा समाचारपत्रले आफूलाई पाल्पाको स्थापित र नियमित पत्रिकाको रुपमा परिचय बनाउन सफल भएको छ । व्यवस्थित कार्यालय र आवश्यक पत्रकार कर्मचारीहरुको उचित संयोजनमा हामीले जोड दिएका छौं ।

स्थानीय तहहरुमा रहेका समाचार सामाग्रीहरुलाई बढी प्राथमिकता दिएका छौं । खासमा पाल्पा समाचारपत्र पाल्पाका बिषय उठान गर्ने लोकप्रिय स्थानीय पत्रिकाको रुपमा आम पाठकहरुलाई चिनाउन सफल भएका छौं । १२ वर्षदेखिको लामो सिकाई र अनुभव बटुल्दै यो पत्रिकाले आजका दिनसम्म निरन्तर रुपमा आफ्ना प्रकाशनहरू पाठक सामु पस्कदै आएको छ । प्रेस काउन्सिल नेपालबाट नियमित रुपमा स्थानीय क बर्गमा बर्गीकृत हुदै आएको यो पत्रिकालाई आगामी दिनमा अझ थप राम्रो र व्यवस्थित बनाउँदै लैजाने प्रतिबद्धता गर्दछौं ।

पाल्पा समाचारपत्रले जिल्लाको कृषि, पर्यटन, शिक्षा, स्वास्थ्य क्षेत्रको सफलताहरुलाई हामीले महत्व दिँदै आएको छ । सार्वजनिक निकायहरुमा भए गरेका ढिला सुस्ती र भ्रष्टाचार तथा अनियमितताबारे समाचार सम्प्रेषण गरि सम्बन्धित निकायको ध्यानाकर्षण गराएका छौं । यसकारण पनि हामीले आजसम्म कहिकतै पनि आफ्नो बिश्वसनीयता गुमाएका छैनौं र आगामी दिनमा पनि अझ परिस्कृत हुँदै अगाडि बढ्नेछौं । आज तेह्रौ वर्ष प्रवेशको सुखद अवसरमा हाम्रा आम पाठक, बिज्ञापनदाता, सहयोगी ब्यक्ति तथा शुभेच्छुकहरू, पत्रकार कर्मचारीहरू लगायत सबैमा हार्दिक आभार सहित धन्यवाद ब्यक्त गर्दछौ ।

 

LEAVE A REPLY

Please enter your comment!
Please enter your name here