यान्त्रिकरणको प्रयोग सहित व्यावसायिक कृषि आवश्यक छः सांसद आचार्य

0
704

पबित्रा पराजुली । (मदनपोखरा) पाल्पा
पाल्पा क्षेत्र नं. १ का प्रतिनिधिसभा सदस्य नारायणप्रसाद आचार्यले यान्त्रिकरणको उच्चतम् प्रयोग सहित व्यावसायिक कृषि आवश्यक रहेको बताउनुभएको छ । उहाँले कृषि पेशालाई पूर्ण रुपमा आधुनिकरण गर्न सकेमा आवश्यकता अनुरुप कृषि उत्पादन गर्न सकिनेमा जोड दिनुभयो ।

तानसेन नगरपालिका ९ अम्ल्यानमा आयोजित राष्ट्रिय धान दिवसको कार्यक्रममा बोल्दै उहाँले सिंचाइको कार्यक्रमका लागी बजेट विनियोजन गरेर व्यावसायीक र यान्त्रिक खेती अपनाउनुपर्ने बताउनुभयो । जलबायु अनुकूलित कृषक मैत्री प्रविधि धान उत्पादनमा वृद्धि भन्ने मुल नाराका साथ शुक्रबार देशैभर २० औँ राष्ट्रिय धान दिवस मनाइएको छ ।

यसैगरी जिल्लाको तानसेन नगरपालिकाका वडा न ९ अमल्यानमा समेत कृषक, विभिन्न सघंसस्थाका प्रतिनिधि, बहुप्राविधिक शिक्षालयका शिक्षक, विद्यार्थी, कृषि ज्ञान केन्द्र, कृषि शाखाका प्राविधिकहरु मिलेर दिवस मनाएका हुन् । धान दिवस कार्यक्रममा जिल्ला समन्वय समितिका प्रमुख टकंनाथ खनालले किसानले अझैपनि आकाशे पानीको भर र मलखादको अभावमा खेतीपाती गर्नुपर्ने समस्या रहेको बताउनुभयो । जब सम्म सरकारले समस्या औल्याउँदैन तवसम्म किसान सधैँ मर्कामा पर्ने उहाँको भनाई थियो । तानसेन नगरपालिकाका उपप्रमुख प्रतिक्षा सिंजालीले खाली तथा बाझोँ रहेको जग्गा जमिनको प्रयोग गरेर कृषि उत्पादन बढाउनुपर्ने भन्दै नगरपालिका मार्फत कृषि क्षेत्रलाई प्राथमिकता दिएर बजेट विनियोजन गरिएको बताउनुभयो ।

कृषि ज्ञान केन्द्र पाल्पाका प्रमुख कामना अधिकारीले दिवसको औचित्य र आवश्यकता माथि प्रकाश पार्नुभएको थियो । उहाँले किसान समृद्ध नभएसम्म देश समृद्ध नहुने बताउनुभयो । तानसेन नगरपालिकाका कृषि शाखा प्रमुख सरोज तिमिल्सेनाले कृषकहरुलाई कृषि पेसामा उजागर गर्नका निमित्त प्रोसाहन गर्ने नीति लिएको बताउनुभयो । पाल्पामा धानको उत्पादन राम्रो हुने भएकाले उत्पादकत्व बृद्धि गरेर जिल्ला बाहिर सम्मको निर्यात प्रकियालाई बढाउनुपर्ने उहाँको भनाई थियो ।

सम्पूर्ण कृषकहरुको प्रतिनिधित्व गर्दै अगुवा कृषक बुद्धिराज बस्यालले कृषि प्रधान देशका किसानहरुले अझैपनी मल र विउका लागी संघर्ष गर्नुपरेको बताउनुभयो । कृषक बस्यालले राष्ट्रिय धान दिवस मनाउनका निमित्त करिब ६ रोपनी जग्गा सहजीकरण गर्नुभएको थियो । उक्त जग्गामा साँवा मन्सुली र हाईबेड्र धान लगाइएको छ । कार्यक्रममा सांसद नारायण प्रसाद आचार्य, जि.स.स प्रमुख टकंनाथ खनाल , उपप्रमुख कासिका गैरे, प्रमुख प्रशासकीय अधिकृत जीवन ज्ञवाली जिल्ला समन्वय अधिकारी जनार्दन शर्मा, डिभिजन वन कार्यालय पाल्पाका प्रमुख नारायण भट्टाई ,प्रधानमन्त्री कृषि आधुनिकरण परियोजना कार्यान्वयन इकाईका प्रमुख टोपबहादुर थापा , तानसेन नगरपालिका का उपप्रमुख प्रतिक्षा सिंजाली , वडा न ९ का वडाअध्यक्ष राजेश कुमार अर्याल लगाएत समाजसेवी एवम् अगुवा किसानहरुको सहभागीता रहेको थियो ।

कार्यक्रममा अगुवा कृषकहरुसगैँ जनप्रतिनिधि, कर्मचारी र सरोकारवाला व्यक्तिहरु एकआपसमा हिलो खेलेर रमाइलो गरेका थिए भने बहुप्राविधिक शिक्षालयका विद्यार्थी र कृषकहरुले असारे गित गाउँदै रोपाइँ गरी थप रौनकता बढाएका थिए । यसैबिच दिवसको अवसरमा ५० मिटर महिला पुरुष हिलेदौड समेत खेलाईएको थियो । जसमा पुरुष तर्फ पत्रकार कृष्ण कार्की प्रथम, जिल्ला समन्वय अधिकारी जनार्दन अधिकारी द्वितिय र पत्रकार कमल अधिकारी तृतीय हुनुभयो । महिला तर्फ प्राविधिक शिक्षालयका विद्यार्थीहरु क्रमशः चन्द्रा भुषाल, मेनका रोकाय र सिर्जना न्यौपाने प्रथम द्वितिय र तृतीय हुनुभयो । खेलमा विजेता हुने विजयीहरुलाई सम्मानस्वरुप मेडल प्रदान गरिएको थियो ।

पाल्पाका अन्य पालिकामा समेत आज कृषक , जनप्रतिनिधि र सरोकारवाला पक्ष मिलेर धान दिवस मनाएका छन् । मानो रोपेर मुरी फलाउने महिनाको रुपमा लिइने असार १५ मा कामले थकित किसान शक्ति बढाउन दहि, चिउरा र केरा खाने चलन छ । लामो खडेरी पश्चात अहिले मौसमले साथ दिएका कारण जिल्लामा धमाधम रोपाइँ सुरु भएको कृषि प्राविधिकले जनाएका छन् । किसानहरु खेतबारैमै व्यस्त देखिएका छन् । जिल्लाका विभिन्न क्षेत्रमा कृषकहरुले विभीन्न आधुनिक औजारको प्रयोगले खेतिपाती गरेका छन् भने कहिकतै परम्परागत तवरले अर्मपर्म गरी रोपाई गर्न थालेका छन् ।
पाल्पा जिल्लामा कुल आठ हजार दुई सय १० मेट्रिक टन बर्षे धान र ६ सय २० मेट्रिक टन चैते धान उत्पादन हुदैँ आएको छ । पाल्पामा धानको उत्पाकत्व तिन दशमलब नौँ मेट्रिक टन रहेको छ । असार १५ सम्म आइपुग्दा जिल्लामा ४० प्रतिशत रोपाइँ भएको ज्ञान केन्द्रले जनाएको छ । पाल्पाका बेसी र फाटमा धान खेती हुँदै आएको छ ।

LEAVE A REPLY

Please enter your comment!
Please enter your name here