पाल्पा । बगनासकाली गाउँपालिकाले वडाबाटै सामाजिक सुरक्षा भत्ता वापतको रकम वितरण थालेको छ । गाउँपालिकाले चालु आ.व.को पहिलो त्रैमासिकदेखि नै वडातहमै पुगेर सामाजिक सुरक्षा वितरण थालेपछि जेष्ठ नागरिक उत्साहित भएका छन् । गाउँपालिकाले आ.व.२०७९।०८० देखि नै बैंकमा घण्टौं लाइन बसेर टाढाबाट भत्ता लिन जान कठिन परेको बेला वडाबाटै भत्ता बुझ्न पाएपछि उनीहरूको मुहारमा खुसी झल्किएको हो ।
असार २३ गते शनिबार वडा नं. २ पोखराथोकका नागरिकलाई सामाजिक चौथो त्रैमासिक वापतको सुरक्षा भत्ता वितरण थालेको छ । बैंकमा घण्टौंसम्म लाइन बसेर बृद्धभत्ता बुझ्दै आएका बगनासकाली गाउँपालिका–२ पोखराथोकका ७९ वर्षीय हेमलाल नेपालीले यसआर्थिक वर्षको सवै भत्ता वडाबाटै बुझ्न पाएपछि निकै उत्साहित भएको बताउनुभयो । ‘निर्वाचनका बेला भोट माग्न आउँदा बृद्ध भत्ता वडाबाट दिन्छौं भन्थे, त्यतिबेला विश्वास लागेको थिएन, अहिले भने निर्वाचनमा मतदातासँग गरेको प्रतिबद्धता अनुसार नै काम सुरु गरेकोमा निकै खुसी लागेको छ ।’ उहाँले भन्नुभयो ।
त्यस्तै वडा नं. २ कै मानकुमारी कुमालले पनि वडाबाट बृद्ध भत्ता बुझ्न पाएपछि स्थानीय सरकार घर आँगनमै आएको जस्तो लागेको बताउनुभयो । ‘भत्ता बुझ्नका लागि एक डेढ घण्टा हिंडेर बैंक जानुपर्थ्यो, बुढेशकालको शरीर आउन जानै समस्या’ उहाँले भन्नुभयो । ‘अहिले त गाउँपालिका र जनप्रतिनिधिले जेष्ठ नागरिकको मनको कुरा बुझेर होला वडाका गाउँबाटै भत्ता बुझ्ने व्यवस्था गरेका छन् ।’ उनीहरू जस्ता धेरै जेष्ठ नागरिकलाई वडाबाटै भत्ता वितरण कार्यले ठूलो राहत मिलेको छ ।
बगनासकाली गाउँपालिकाको बर्तमान जनप्रतिनिधि आएपछि बिभिन्न लोककल्याणकारी कार्यक्रमहरुलाई प्राथमिकता दिएको छ । जस अन्तरगत वडामै भत्ता कार्यक्रमलाई पालिकाले महत्व दिएको हो । गाउँपालिका अध्यक्ष सरस्वती चिदीले वडामै पुगेर भत्ता बितरण गर्दा धेरै जना खुशी हुनुभएको बताउनुभयो । उहाँहरुले आफूहरुले जनताको खास सेवकको रुपमा आएकोले असल सेवककै भूमिका निर्वाह गर्ने बताउनुभयो ।
बगनासकाली गाउँपालिकाको चौथो त्रैमासिक सामाजिक सुरक्षा भत्ता वितरण असार २३ देखि श्रावण ८ गतेसम्म जारी रहने गाउँपालिकाका एम.आई.एस. अपरेटर भोजराज भट्टराईले जानकारी दिनुभयो । आ.व.२०७९ को चौथो त्रैमासिकमा पालिभित्र विभिन्न वर्गका ३१३३ जना सामाजिक सुरक्षा भत्ता प्राप्त गर्न योग्य लाभग्राही रहेका छन् । जसमध्ये अन्य जेष्ठ नागरिक १८९९, जेष्ठ नागरिक दलित १३७, जेष्ठ नागरिक एकल महिला ३०७, विधवा आर्थिक सहायता ४१३, ‘क’ वर्ग असक्तता ४९, ‘ख’ वर्ग आर्थिक सहायता १०६ र दलित बालपोषण प्राप्त गर्ने २२२ जना बालबालिका रहेका छन् । चा.लु.आ.व.को चौथो त्रैमासिकमा ३ करोड ८ लाख ६८ हजार ४ सय २१ रुपैया सामाजिक सुरक्षा भत्तामा वितरण हुने रकम निकासा भएको गाउँपालिका स्रोतले जनाएको छ ।
सामाजिक सुरक्षा भत्ता वितरणसँगै गाउँपालिकाले निःशुल्क स्वास्थ्य परीक्षण कार्यक्रमलाई समेत निरन्तरता दिएको छ । शनिबार वडा नं. २ बाट ११९ जनाले सामाजिक सुरक्षा भत्ता प्राप्त गरेका थिए भने ७० जनाले निःशुल्क स्वास्थ्य परीक्षणबाट लाभ लिएका थिए ।
