पाल्पा, नेपाल राष्ट्रिय शिक्षक संगठन तानसेन नगरपालिकाको अध्यक्षमा झविन्द्र देवकोटा निर्वाचित हुनुभएको छ । तेस्रो नगर अधिवेशनबाट देवकोटा अध्यक्ष हुनु भएको हो । जसको उपाध्यक्षमा सन्तोष ढकाल र गुणवती के.सी. सचिवमा भवानी पंगेनी, कोषाध्यक्षमा नैना ज्ञवाली आचार्य, सहसचिव दमकला गैरे, सहकोषाध्यक्ष इन्दु खनाल, सदस्यहरुमा नारायण ढकाल, मोहनलाल पौडेल, केशरी गैरे, विष्णु ज्ञवाली, डिल्लीराज पौडेल, किशोर भट्टराई, रिता न्यौपाने, सविता कुँवर, सरीता ज्ञवाली, बन्दना शर्मा, रिता बस्याल लगायत हुनुहुन्छ ।

संगठनका नगर अध्यक्ष दीर्घनारायण आचार्यको अध्यक्षतामा भएको कार्यक्रममा प्रमुख अतिथि संगठनका केन्दीय सदस्य रामप्रसाद ढकालले सरकारले तत्काल शिक्षा ऐन जारी गर्नुको कुनै विकल्प नरहेको बताउनु भयो । उहाँले शिक्षा ऐन हिउँदे अधिवेशनबाट जारी नभए शिक्षकहरु आन्दोलनमा जाने बताउनु भयो । ऐन मार्फत शिक्षकका सबैखाले समस्या समाधान हुने गरी संगठनले सरकारलाई दबाब दिइरहेको समेत बताउनु भयो । कार्यक्रममा संगठनका जिल्ला अध्यक्ष मोहन सापकोटाले संगठन दरिलो भएमात्रै शिक्षकका हकहितमा लड्न र अधिकार प्राप्त गर्न सजिलो हुने बताउनु भयो । कार्यक्रमको सञ्चालन सचिव गुणवती केसीले गर्नुभएको थियो ।

अधिवेशनको अवसरमा तानसेन नगर स्तरीय निवन्धलेखन र चित्रकला प्रतियोगिताको आयोजना गरिएको थियो । कक्षा ९ देखि १२ तर्फ दमकडा माविकी सविना पाण्डे प्रथम, मोहनकन्या माविकी त्रिवेणी मानन्धर द्घितीय र देववाणी माविकी रोशनी पाण्डेले तृतीय स्थान हासिल गरेकी छन् । कक्षा ६ देखि ८ तर्फको निवन्ध लेखन प्रतियोगितामा दमकडा माविकी निहारिका ज्ञवाली प्रथम, सेन माविका समीर ढकाल द्घितीय र जनता माविकी तुलजा नेपाल र देववाणी माविकी सुप्रिया खनाल तृतीय भएका छन् । कक्षा १ देखि ५ तर्फ भएको चित्रकला प्रतियोगितामा दमकडा माविका विज्ञान अधिकारी प्रथम, सेन माविका अभिषेक पाण्डे द्घितीय भएका छन् ।

धातानन्द शर्मा गैरे । पाल्पा
पाल्पा साहित्य समाजले एक कार्यक्रमको आयोजना गरी साहित्यिक मासिक जनमतका प्रधान सम्पादक वरिष्ठ साहित्यकार एवं साहित्यिक पत्रकार, समाजसेवी मोहन दुवाललाई दोसल्ला तथा सम्मानपत्रबाट तथा जनमतका सम्पादक उहाँकी धर्मपत्नी भारती श्रेष्ठलाई दोसल्ला ओढाई सम्मान गरेको छ ।

कार्यक्रमका अध्यक्ष पाल्पा साहित्य समाजका अध्यक्ष पुष्कर अथक रेग्मी तथा विशिष्ठ अतिथि वरिष्ठ पत्रकार मेघराज शर्माले उहाँलाई संयुक्तरुपमा सम्मान गर्नुभएको हो ।

कार्यक्रमका अध्यक्ष पुष्कर अथक रेग्मीले मोहन दुवालको परिचय प्रस्तुत गर्दै उहाँको व्यक्तित्त्व, कृतित्त्वका बारेमा जानकारी गराउनुभयो । उहाँका ३३ वटा कृति प्रकाशन भएको, दुई दर्जन बढी कृतिमा सम्पादन, २ सय बढी सम्मान पुरस्कार, उहाँका कृतिमा १३ जनाले शोधपत्र लेखेको र ४० वर्षसम्म अनवरतरुपमा ३२७ वटा जनमत अंक प्रकाशन गरेको विवरण प्रस्तुत गर्नुभयो । उहाँ जस्तो व्यक्तित्त्वलाई पाल्पामा स्वागत गर्न पाउँदा निकै खुसी लागेको छ भन्नुभयो ।

सम्मानित व्यक्तित्त्व प्रमुख अतिथि मोहन दुवालले पाल्पामा आफूलाई सम्मान गरेकोमा पाल्पा साहित्य समाजलाई धन्यवाद दिनुभयो । पाल्पामा पहिलो पटक साहित्यिक व्यक्तित्त्व जगतबहादुर जोशीसंग साहित्यिक भेटघाट भएको, कमलराज रेग्मी र कृष्णदेव रेग्मीलाई आफ्नो घरमा स्वागत गरेको प्रसङ्ग सुनाउनु भयो ।

उहाँले पत्रिकाको नाम जनमत राख्नुको कारण बारे सोधिएको जिज्ञासाको जवाफ दिँदै जनताको आवाजलाई सम्मान गर्ने उद्देश्यले पत्रिकाको नाम जनमत राखेको बताउनु भयो । जनमत पत्रिका स्थापना कालको इतिहासको जानकारी गराउँदै आफू पंचायतको कालो सूचीमा परेका कारण आफ्नो नाममा पत्रिका दर्ता असम्भव हुँदा उहाँकी धर्मपत्नी भारती श्रेष्ठको नाममा पत्रिका दर्ता गरेको प्रसङ्ग पनि सुनाउनुभयो ।

कठिनाई सहेर निरन्तर लडिरहे सहयोगीहरु पाइन्छ । जिल्लाजिल्लामा आफ्ना सहयोगी मित्रहरु रहेको र उहाँहरुबाट आफूलाई धेरै सहयोग मिलेको बताउँदै पुष्कर अथक रेग्मीको सहयोगप्रति धन्यवाद दिनुभयो ।

विशिष्ट अतिथि मेघराज शर्माले सम्मानित अतिथिलाई सुस्वास्थ्य र दीर्घजीवनको शुभकामना दिनुभयो । चालिस वर्षसम्म अनवरत साहित्य पत्रकारिताको क्षेत्रमा योगदान पुर्याएको व्यक्तिलाई राष्ट्रले सम्मान गर्न चुकेको छ भन्नुभयो ।

पाल्पा साहित्य समाजका संरक्षक राजेन्द्र गोपाल सिँहले कुनैबेला पाल्पामा प्रकाशन शुरुभएका श्रीनगर, तानसेन डायरी, जमर्को, मायालु जस्ता पाल्पाली साहित्यिक पत्रिकाले निरन्तरता पाउन नसकेको, निजी क्षेत्रबाट प्रकाशित जनमत चालिस वर्षसम्म निरन्तर प्रकाशित हुनु गौरवको कुरा भएको बताउनुभयो ।

पोखराथोक साहित्यसङ्गमका हरि भट्टराईले लोकतन्त्रमा शीर्षकको गद्य कविता वाचन गर्नुभयो । पत्रकार तथा साहित्यकार धातानन्द शर्मा गैरे, तानसेन गुठीका शकुन्तला बज्राचार्य र साहित्यकार सीतार।म घिमिरेले शुभकामना मन्तव्य राख्नुभएको थियो ।
कार्यक्रम पाल्पा साहित्य समाजका सल्लाहकार चित्रवलीराम सुवालको स्वागत तथा सचिव सविता भट्टराईको सञ्चालनमा चलेको थियो ।

धनबहादुर ठाडा । पाल्पा

पाल्पामा उत्पादित अदुवा र सिमी युरोप पठाउने तयारी गरिएको छ । निस्दी गाउँपालिका–५, गल्धामा उत्पादन भएको सिमी र अदुवा युरोपमा निर्यात हुने भएको छ । विगत चार वर्षदेखि अदुवा निर्यात गर्दै आएको गल्धा सामाजिक उद्यमी महिला सहकारी संस्थाले यस वर्षदेखि सिमीसमेत निर्यात गर्ने तयारी गरेको हो ।

हेफर इन्टरनेशनल प्रालि र ग्रामीण आर्थिक विकास संघ रेडाको समन्वयमा अकिस्टा नेपाल प्रालि मार्फत सिमी र अदुवा प्रमाणित गरेर जर्मनी पठाउने तयारी भइरहेको सहकारीका अध्यक्ष अममाया मश्राङ्गीले बताउनुभएको छ । सहकारीले सिमी २० टन, सुकेको अदुवा १० टन र काँचो अदुवा २० टन पठाउने अध्यक्ष मश्राङ्गीले बताउनुभयो ।

विदेशबाट आएको माग पूरा गर्नका लागि सहकारीका शेयर सदस्यहरुले उत्पादन गरेको सिमी र अदुवा खरिद गरेको व्यवस्थापक दिल माया सारुले बताउनुभएको छ । अहिले सिमी र अदुवाको ग्रेडिङ गर्ने काम भइरहेको छ, अबको २ महिना पछि ग्रेडिङको काम सकाएर जर्मनी पठाउने सारुले बताउनुभयो । ग्रेडिङको लागि सहकारीका २८ जना शेयर सदस्य महिलाहरुलाई दैनिक ज्यालादारीमा परिचालन गरेको छ ।

यसरी आफुहरुले उत्पादन गरेको सिमी र आदुवा सहकारीले खरिद गरेपछि यहाँका कृषकहरू उत्साहित भएका छन । स्मरण रहोस यस सहकारी संस्थाले दशैं तिहारको अवसरमा १ करोड ४५ लाख बराबरको खसी बोका बिक्री गरेका थिए ।

बगनासकाली गाउँपालिकाभित्र संचालन गरिएको घुम्ती शिविरबाट १ हजार बढी नागरिक लाभान्वित भएका छन् । शिविरमा सामाजिक सुरक्षा भत्ता वितरण र स्वास्थ्य परीक्षण समेत गरिएको थियो ।

गाउँपालिका अध्यक्ष सरस्वती दर्लामी चिदीले नागरिकलाई सहज र सरल रूपमा घरदैलोमै सेवा प्रवाह गर्नका लागि वडास्तरमा सामाजिक सुरक्षा भत्ता वितरणसहितको शिविर सञ्चालन गरिएको बताउनुभयो ।

शिविरमा सामाजिक सुरक्षा भत्तातर्फ १ हजार ६ जना र स्वास्थ्य सेवातर्फ ५३० जनाले सेवा लिएको गाउँपालिकाका सामाजिक सुरक्षा तथा पञ्जिकरण शाखा प्रमुख भोजराज भट्टराईले बताउनुभयो ।

शिविरमा जेष्ठ नागरिक, दलित जेष्ठ, एकल जेष्ठ, विधवा आर्थिक सहायता, क वर्गका अपाङ्गता, ख वर्गका अपाङ्गता र दलित बालपोषण प्राप्त गर्न योग्य लाभग्राहीले सामाजिक सुरक्षा भत्ता प्राप्त गरेका थिए भनेस्वास्थ्य परामर्श, चेकजाँच र औषधि वितरण गरिएको थियो ।

बगनासकाली गाउँपालिकामा दोस्रो त्रैमासिकमा वडा नम्बर १ देखि ९ सम्म अन्य जेष्ठ नागरिक १९८३ जना, जेष्ठ दलित १४३ जना, जेष्ठ एकल २७१, विधवा आर्थिक सहायता ४४१, क वर्गका अपांगता भएका ५२, ख वर्गका अपांगता १०८ र दलित बालपोषण १९३ गरी ३ हजार १ सय ९१ लाभग्राही रहेका छन् । ३ हजार १ सय ९१ लाभग्राहीको लागि गाउँपालिकाले ३ करोड १८ लाख ७३ हजार ३ सय ८९ रुपैंया निकासा गरी वितरण गरेको थियो ।

पाल्पा । प्रेस चौतारी नेपाल पाल्पाको नवौं अधिवेशन यही माघ २१ गते गर्ने गरी तयारी गरिएको छ ।

प्रेस चौतारी पाल्पाको बैठकले प्रेस चौतारी नेपालका केन्द्रीय अध्यक्ष गणेश बस्नेतको प्रमुख आतिथ्यतामा उक्त अधिवेशन तानसेनमा गर्ने निर्णय गरेको अध्यक्ष कृष्ण कार्कीले बताउनुभयो ।

अध्यक्ष कार्कीले ३ वर्षको कार्यकाल सफलतापूर्वक चलेको र यो अवधिमा सहयोग गर्ने सबैमा धन्यवाद व्यक्त गर्नुभयो । पत्रकारीता क्षेत्रलाई व्यवसायीक रुपमा अघि बढाउन संगठनले महत्वपुर्ण भूमिका निर्वाह गर्दै आएको उहाँको भनाई थियो ।

नेकपा एमाले पाल्पाका उपाध्यक्ष विमल काफ्लेले हरेक संगठन सक्रिय र चलायमान बनाउन सक्रिय र संगठनमा काम गर्ने व्यक्तिहरु नेतृत्वमा आउनुपर्ने बताउनुभयो । पार्टीका उपसचिव तथा प्रचार विभाग प्रमुख दिपक विश्वकर्माले संचार क्षेत्रको व्यवस्थापन सहित पत्रकारहरुलाई पत्रकारिता क्षेत्रमा निरन्तर रहने बनाउने विषय महत्वपूर्ण रहेको बताउनुभयो । प्रेस चौतारी नेपालका केन्द्रीय सदस्य कमलराज तिमिल्सेना, केन्द्रीय सदस्य मिलन विश्वकर्मा, संस्थापक अध्यक्ष केशवराज नेपाल, केन्द्रीय विभाग सदस्यहरु किरण कौशल, नवराज ज्ञवालीले ३ वर्षको अवधिमा चौतारी मार्फत भएका कार्यहरुको प्रशंसा गर्नुभयो ।

अधिवेशनका दिन चौतारीको वर्तमान कार्यसमितिको कार्यकालका गतिबिधि समेटिएको फोटो पुस्तिका सार्वजनिक गरिने चौतारीका सचिवालय सदस्य दयाराज न्यौपानेले बताउनुभयो । तस्बिरः माडी भ्युबाट

पाल्पा । यही फागुन २ गते तानसेन मखनटोलमा सडक खाना महोत्सव हुने भएको छ । (भ्यालेन्टाइन डे) प्रणय दिवसको दिन उक्त महोत्सवको आयोजना गरिएको हो । मखनटोल टोल विकास संस्था तानसेन ४ पाल्पाको आयोजनामा उक्त महोत्सव हुन लागेको हो ।

तानसेनमा आयोजित पत्रकार भेटघाट कार्यक्रममा संस्थाकी अध्यक्ष ज्ञानु कार्कीले स्थानीय कला, संस्कृति प्रवद्र्धन र संरक्षण गर्ने उद्देश्यले उक्त महोत्सवको आयोजना गरिएको बताउनुभयो ।

तानसेन ४ का वडाध्यक्ष हेमन्त राज शाक्यले खाना महोत्सव प्रवद्र्धनका लागि वडाले २ लाख रुपैंया बजेट विनियोजन गरिएको बताउनुभयो । उहाँले महोत्सवमा महिलाहरुले उत्पादन गरेको कुटीर तथा घरेलु उद्योगबाट बनेका सामग्रीहरु पनि विक्रीवितरण तथा प्रदर्शनी गरिने बताउनुभयो ।

नेपाल पत्रकार महासंघ पाल्पाका अध्यक्ष कमल राज तिमिल्सेनाले आन्तरिक तथा बाह्य पर्यटनमा यो महोत्सवले टेवा पु¥याउने बताउनुभयो ।

महोत्सवमा विभिन्न जातजातिको पहिचान झल्कने भेषभुषा, गायन र नृत्यहरू, स्थानीय लाखे नाच, स्थानीय धिमे बाजा, भजन र कला केन्द्रहरुको प्रस्तुती तथा स्थानीय र राष्ट्रिय कलाकारहरुको प्रस्तुती रहने र ६० वटा स्टल रहने बताइएको छ । पत्रकार भेटघाट कार्यक्रम संस्थाकी अध्यक्ष ज्ञानु कार्कीको अध्यक्षता र सचिव कल्पना भट्टराईको संचालनमा चलेको थियो ।