पाल्पा । बिहान ८ बज्नेबित्तिकै रुपाको दैनिकी सुरू हुन्छ । ८ बजेलगत्तै गाउँका बोटे बालबालिकाका घरमा पुग्ने र सबैलाई जुटाउँदै बिद्यालयसम्म ल्याउने जिम्मेवारी छ । दिनभरि बिद्यालयमा पढाउनहुन्छ रुपाले । ४ बजे बिद्यालय बन्द भएपछि फेरि उस्तै गरी उनै बोटे बालबालिकालाई घरघरमा छोडेर आफ्नो घर फर्कदा साँझको ६ बजिसकेको हुन्छ ।
बगनासकाली गाउँपालिका–६यम्घा दर्पुककी रुपा बोटेको दैनिकी ५ वर्षदेखि यसै गरी बितिरहेको छ । उहाँको जिम्मेवारी सुन्दा तपाइँलाई लाग्न सक्छ सेवा सुविधा पनि त राम्रै होला नि ? तर ५ वर्षदेखि रुपाले ज्यादै न्युन तलवमा काम गर्दै आउनुभएको छ ।
स्थानीय भगवती आधारभुत बिद्यालयमा रुपा हेरालु शिक्षकको रुपमा नहुँदा बोटे बालबालिकाहरुको बिद्यालयमा नियमितता थिएन । बिद्यालय आएका बालबालिका पनि अन्तिम घण्टीसम्म बस्दैनथे । तर अहिले यहाँका बोटे बालबालिकाहरुको बिद्यालयमा नियमितता छ । यसमा रुपको भूमिका महत्वपूर्ण छ ।
५ वर्ष अघि स्थानीय बालमैत्री गाउँपालिका घोषणाको तयारीको समयमा बोटे बालबालिकाको शैक्षिक निरन्तरताका लागि भन्दै बगनासकाली गाउँपालिकाले मासिक ५ हजार रुपैयाँ पारिश्रमिक दिने गरी रुपालाई हेरालु शिक्षकको रुपमा नियुक्त गरेको थियो । गाउँपालिकालाई बालमैत्री पालिका घोषणा गर्न रुपाको भूमिका महत्वपूर्ण छ । त्यतिबेला रुपाले भर्खर कक्षा १२ को परीक्षा दिनुभएको थियो । अहिले स्नातक चौथो वर्षमा पढ्दै हुनुहुन्छ । गाउँपालिकाले मासिक ५ हजार बाहेक पोशाक भत्ता समेत उपलब्ध नगराएको रुपाले बताउनुभयो । बिद्यालय पोशाक पनि आफूले सोही ५ हजारबाट किन्नुपरेको रुपाको भनाई छ ।
विद्यालयका प्रधानाध्यापक वेद प्रसाद न्यौपानेले रुपाको पारिश्रमिक वढाउने विषयमा गाउँपालिकामा अनौपचारिक छलफल गरिएको बताउनुभयो । उहाँले बोटे बालबालिकाको शैक्षिक निरन्तरतामा रुपमाको भूमिका महत्वपूर्ण रहेको बताउनुभयो ।
बगनासकाली गाउँपालिकाका उपाध्यक्ष हरी प्रसाद पाठकले रुपाको योगदानले विद्यालय नजाने वालिवालिका विद्यालय जान थालेको बताउनुभयो । उहाँले रुपाको पारिश्रमिक ज्यादै कम भएको बिषयमा आफूहरुको पनि ध्यानाकर्षण भएको र आगामी दिनमा समय सापेक्ष पारिश्रमिक बढाउने बिषयमा गाउँपालिकाले निर्णय गर्ने बताउनुभयो ।