पाल्पा । बगनासकालीका किसानले यान्त्रिकरणको प्रयोगबाट समय र आर्थिक दुबै पक्ष बचाउनुका साथै ब्यवसायिक कृषितर्फ उन्मुख भएका छन् ।
आजकल गाउँमा गोरु पाल्नको संख्या ज्यादै न्युन भइसकेको छ । खेतबारी जोत्नका लागि गोरुको साटो यान्त्रिकरणको प्रयोग बढेको छ । यसरी यान्त्रिकरणको प्रयोग बढेपछि एक हल गोरुले दिनभरी लगाउने काम १ घण्टामा सम्पन्न भएपछि किसानको खर्च पनि भएको छ भने समयको पनि बचत भएको छ ।
यसरी यान्त्रिकरणको उपयोग बढेपछि किसानलाई समेत सहज भएको उनीहरुको भनाइ छ । एकातिर गोरु पाल्ने, गोरु घस्याउने समस्या समाधान भयो, अर्कोतर्फ सजिलो गरी जोत्न सकिने भयो । यो प्रविधि निकै सहज र फलदायी भएको छ । किसानले जोत्ने मेसिन मात्रै नभएर कुटानी पिसानी मिल समेत घरघरमा राख्न थालेका छन् । बगनासकाली गाउँपालिका र वडा कार्यालयहरुले समेत सहुलियतमा हाते ट्याक्टर तथा कुटानी पिसानी मिल बितरण गर्दै आएको छ । आम किसानहरुबाट माग संकलन आवश्यकताको पहिचानको आधारमा सहुलियतमा प्रविधि बितरण हुँदै आएको छ ।
चालु आर्थिक वर्षको बजेटबाट बगनासकाली गाउँपालिकाले ५० प्रतिशत अनुदान सहुलियतमा किसानलाई कृषि यान्त्रिकरण बितरण गरेको छ । यान्त्रिकरणको प्रयोगबाट कृषि उत्पादन र उत्पादकत्व वृद्धि पुग्ने अपेक्षा तथा किसानको समयको समेत बचत हुने अपेक्षा सहित गाउँपालिकाभित्रका ९ वटै वडाका किसानको मागको आधारमा ९ वटा मिनी टिलर, र २० वटा कुटानी पिसानी मिल वितरण गरिएको गाउँपालिका कृषि शाखा प्रमुख किशोर खत्रीले बताउनुभयो ।
सो अवसरमा बगनासकाली गाउँपालिकाका अध्यक्ष सरस्वती चिदीले आधुनिक कृषि उपकरणहरूको प्रयोगले कृषकहरूको उत्पादन वृद्धि हुने भएकाले अनुदानमा पाएको उपकरणलाई दुरुपयोग नगरी उचित प्रयोग गर्न आग्रह गर्नुभयो । प्रविधिको उपयोगले किसानहरु थप व्यवसायिक कृषि तर्फ उन्मुख हुनुभएको छ । मेसिनरी सामाग्रीहरु मर्मत गर्नुपरेमा गाउँपालिका मार्फत मर्मत गर्ने दक्ष जनशक्ति उत्पादन गरिएको छ । उहाँले भन्नुभयो ।
बगनासकाली आफैमा पनि कृषि तथा पशुपालनका लागि धेरै सम्भावना रहेको पालिका रहेकोले किसानहरुलाई प्रविधि हस्तान्तरणका साथै आवश्यकताका आधारमा धेरै सहजीकरण र सहयोग गर्दै आएको अध्यक्ष चिदीले बताउनुभयो । वडा वडामा रहेका कृषि प्राविधिक मार्फत किसानहरुलाई हरेक समस्यामा सहजीकरणको काम हुँदै आएको उहाँले बताउनुभयो ।
किसानहरूको कृषि उत्पादनमा वृद्धि तथा आधुनिकरण गर्नका लागि गाउँपालिकाले आर्थिक वर्ष २०८१।०८२ को वार्षिक स्वीकृत कार्यक्रम अनुसार किसानलाइ कृषि यान्त्रीकरण सामग्री वितरण गरेको गाउँपालिकाका उपाध्यक्ष हरिप्रसाद पाठकले जानकारी दिनुभयो । उहाँले किसानलाइ व्यवसायिक बनाउदै लैजाने बताउनु भयो ।
प्रवक्ता टीकाबहादुर थापाले कृषि प्रविधिमा आधनिकरण संगै यान्त्रीकरणको माग बढेको र सोको कारण समयको बचत सगै उत्पादनमा वृद्धि गराउन सहयोग पुग्ने बताउनुभयो । प्रविधि वितरण कार्यक्रममा बगनासकाली गाउँपालिका प्रमुख प्रशासकीय अधिकृत खेमराज छिनाल सहित वडाध्यक्षहरु, कार्यपालिकाका सदस्यहरु, कर्मचारीहरु, किसानहरु लगायतको सहभागिता रहेको थियो ।
