पाल्पा । फागु मेला लाग्ने मुख्य स्थानको रुपमा परिचित बगनासकाली गाउँपालिका–२ पोखराथोक लालपाटीमा यस वर्ष फागु पर्वको दिने बिशेष मेला लाग्ने भएको छ ।
फागनु २९ गते लाग्ने मेलाको तयारी तीव्र पारिएको छ लालपाटी नरसिंह मन्दिरका अध्यक्ष एवम् मेलाका संयोजक दिपेन्द्र ढकालले बताउनुभयो । कार्यक्रममा राष्ट्रिय तथा स्थानीय कलाकारहरुको बेजोड प्रस्तुती रहनेछ । स्थानीय कलासंस्कृतिको समेत प्रस्तुती रहने अध्यक्ष ढकालले बताउनुभयो ।
बगनासकाली २ र १ को संगमस्थलको रुपमा रहेको लालपाटी मेला संचालनका बगनासकाली गाउँपालिका र वडा नं. २ पोखराथोक वडा कार्यालयको सहयोग रहेको छ । मेलाको अवसरमा यस वर्ष फागु नृत्यु प्रतियोगिताको आयोजना गरिएको छ । प्रतियोगितामा प्रथम द्धितिय र तृतीयलाई क्रमशः ८ हजार, ६ हजार र ४ हजार नगद पुरस्कारको ब्यवस्था गरिएको छ ।
त्यस्तै राष्ट्रिय कलाकार पुरुषोत्तम भण्डारी पुर्खे बा लगायतका धेरै कलाकारको प्रस्तुती रहनेछ । लालपाटीको मुख्य बिशेषता फागु पुर्णिामामा हुने मेला हो । यहाँ प्रत्येक बर्ष फागु पुर्णिमाका दिन पाल्पा लगायत विभिन्न जिल्लाबाट पनि मान्छेहरू जम्मा हुन्छन । एकदिन मात्र हुने मेलामा चारैतिरबाट युवायुवतीहरू जम्मा भएर रङ दलेर र नाचेर रमाइलो गर्दछन् ।
मेलाका दिन व्यपार गर्न तानसेन र वरिपरिबाट खेच्रीमिच्री सामान बोकेर व्यपारी ओइरिन्छन् । केही वर्ष अघिसम्म यहा रमाइलो गर्न माथागढी, डाँडाडुम,सपाङदी र चिर्तुङ्धाराबाट झाम्रे, ठूलो नाँच र रौराहरू लिएर आउँथे । अचेल अलि कम भएको छ । व्यापार गर्नेहरू पनि विभिन्न सर–समान सहित आउथे । केटाकेटीलाई खुशी पार्ने सामान र खानपिनका सामान मेलामा बढी हुन्थे । पछिल्लो वर्षहरुमा यहाँ फागु रौनक हराउँदै जान थालेपछि २ वर्ष अघिदेखि व्यवस्थित रुपमा फागु मेला गर्न लागिएको हो ।
लालपाटी मेलामा रमाईलो संग संगै भक्तिभाव र शिव अराधनको आस्थाले पनि मान्छे उपस्थित हुन्छन् । यहाँ सानो पोखरीको दह थियो । शिवजीको मन्दिर रहेको छ । बगनासकाली गाउँपालिका वडा नं २ पोखराथोकमा पर्ने लालपाटी माँडी फाँटको काखमा सजिएर रहेको छ । पुर्वी सीमामा भैसिपुर र भलुवा डाँडा । पश्चिम सीमामा गोर्सत टोल रहेको छ । जहाँ दुवै क्षेत्रमा कुमाल जनजातिहरुको बाक्लो बस्ती छ । लालपाटी ठूलो क्षेत्रमा फैलिए पनि जम्मा सात घरको मात्र बसाई छ ।
अहिले तीन घर ब्राह्मण, तीन घर मगर र एक घर नेवार मात्र छन् । केही घर नेवारहरू ब्यापारको लागि बसाई सरेर बाहिर गएको स्थानीयको भनाई छ । पहिले बटौलीबाट नुन, तेल र खाद्य बस्तु डोकोमा बोकेर आउने डोके बटुवाहरू यहि बास बस्थे । पाल्पा पुर्वी भेगका ताहँु, सर्देवा,रामपुर र पुर्वखोलाका सबै यहि बाटो भएर हिड्थे गर्थे । स्याङ्जा, पर्वत, तनहुँ, पोखरा जाने पनि डोको भरी सामान बोलेर आँउथे । यहाँ एउटा ठूलो पाटी चौतारी थियो । साँझ घाम डुब्ने बेलैबाट यहि पाटीमा बास बस्ने भएरै लालपाटी भनिएको बुढापाकाहरुको भनाई छ ।
