पाल्पा । तानसेन नगरपालिकाका निवर्तमान मेयर एवम् नेकपा एकीकृत समाजवादी पाल्पाका अध्यक्ष अशोककुमार शाहीले आफ्नी स्वर्गीय छोरी अनुजा शाहीको स्मृतिमा अनुजा शाही स्मृति कोष स्थापना गर्नुभएको छ । उहाँले अनुजाको जन्मदिन पारेर १० लाखको स्मृति कोष स्थापनाको कोष घोषणा गर्नुभएको हो ।
२०५० साल साउन २२ गते तानसेनमा जन्मिनुभएकी अनुजाको ३० बर्षको कलिलो उमेरमा २०८० साल फागुन १८ गते अमेरिकामा उपचारको क्रममा निधन भएको थियो । उहाँको कलिलै उमेरमा मृत्यु भएपनि अनुशासन लगनशिलता र सामाजिक क्षेत्रप्रति सद्भावलाई सधै जीवन्त राख्नको लागि उक्त कोषको स्थापना गरिएको उहाँले बताउनुभयो ।
हाललाई कोषमा १० लाख राखेको र प्रत्येक बर्ष कोषमा रकम बढाउँदै लैजाने र कोषबाट प्राप्त हुने अधिकांश रकम सामुदायिक विद्यालयमा अध्यनरत छात्राहरुको पठन–पाठनमा खर्च गरिने शाहीले बताउनुभयो । केही रकम अनुजाले अध्ययन गरेको विद्यालय सेन्ट कपितानियो स्कुलमा अध्यनरत आर्थिक अवस्था कमजोर भएका छात्राहरुको पठन–पाठनमा खर्च गरिने उहाले बताउनुभयो ।
स्मृति कोष घोषणा कार्यक्रममा जिल्ला संमन्वय समितिका प्रमुख टंकनाथ खनाल, पूूर्व सांसद यादवबहादुर रायमाझी, त्रिभुवन बहुमुखी क्याम्पसका सहायक क्याम्पस प्रमुख डा. टंक पन्थ, पत्रकार महासंघ पाल्पाका अध्यक्ष रेखीराम राना र सहायक क्याम्पस प्रमुख सन्तोष खनाल लगायतले शाही परिवारकी अनुशासित छोरी अनुजाको कलिलो उमेरमा भएको निधनले स्तब्ध भएको बताउनुभयो ।