पाल्पा । जनताको सुरक्ष गर्ने प्रहरी कार्यालय नै असुरक्षित घरमा रहेको छ । पुर्वखोला गाउँपालिका–३ रिङ्नेरहमा रहेको इलाका प्रहरी कार्यालय भाडाको जोखिमपूर्ण कच्ची घरमा रहेको छ ।
नाम इलाका प्रहरी कार्यालय भएपनि यहाँ असईको कमाण्ड रहेको छ । सामान्यतया इलाका प्रहरी कार्यालयमा प्रहरी निरीक्षकको दरबन्दी हुन्छ । भत्किएको ठाटी जस्तो देखिने प्रहरी कार्यालयको होडिङ बोर्डसँगको प्रहरी कार्यालय हो भन्दा धेरैलाई पत्यार लाग्दैन ।
प्रहरी चौकी भवन साच्चिकै जोखिमपूर्ण भवनमा रहेको जिल्ला प्रहरी कार्यालय पाल्पाका एसपी नरेन्द्र चन्दले बताउनुभयो । ७ वर्षदेखि उक्त प्रहरी चौकी उस्तै अवस्थामा रहेको र जोखिमपूर्ण अवस्थामै रहेर प्रहरीले जनताको सुरक्षाको काम गर्दै आएको उहाँले बताउनुभयो ।
पुर्वखोला गाउँपालिकाको नयाँ भवन निर्माण कार्य जारी रहेको र उक्त नयाँ भवनमा कार्यालय सरेपछि हाल गाउँपालिका सञ्चालनमा रहेको भवनमा प्रहरी चौकी सार्ने गरी छलफल भएको उहाँले बताउनुभयो ।
प्रहरी कार्यालय तथा स्थानीय अर्को घरमा प्रहरी निवास प्रयोग गरेवापत मासिक भाडा गाउँपालिकाले तिर्दै आएको पुर्वखोला गाउँपालिकाका अध्यक्ष नुन बहादुर थापाले बताउनुभयो ।
