पाल्पा । बगनासकाली ९ चापपानीकी सीता पराजुली खत्री विगत १ वर्षदेखी मेरुदण्ड पक्षघातको समस्याबाट ग्रुजिरहनुभएको छ । ३५ वर्षकी सीता विरामी भई थलिएपछि परिवार आर्थिक विचल्लीमा परेको छ ।
उहाँलाई २०७८ सालमा नसा सम्बन्धी समस्या भएपछी उपचार गरिएको थियो । पटक पटक अप्रेसन गर्दा पनि रोग निको नभएपछी झण्डै एक वर्षदेखी कोमामा रहनुभएको छ ।
झण्डै ९ महिना लामो समय काठमान्डौं वीर अस्पतालको ट्रमा सेन्टरमा उपचार गराइएको थियो । अहिले उहाँ कोमामा हुनुहुन्छ, एक घण्टाको अन्तरालमा विभिन्न उपकरणको सहायतामा सास नलीहरुको सफाई र उपचार घरमै गरिएको छ । श्रीमान् र दुई छोराछोरीकी आमा सीता लामो समयदेखी पक्षघात भई थला पर्दा, श्रीमान्ले स्याहार सुसार गर्दै आउनुभएको छ । गाउँघर, छरछिमेक र ईस्टमित्रको सहयोगमा अहिलेसम्म उपचार धानिरहेपनि अव थप उपचार गर्न र छोराछोरीको लालनपालन गर्न सक्ने अवस्था उहाँको श्रीमान्को छैन् । श्रीमान् शंकर विदेश पुग्नुमात्र भएको थियो, घरमा विरामी भएपछी साथीहरुको सहयोगमा फर्कनुपरयो । पटक पटक र लामो समय अस्पतालको उपचारले आर्थिक अवस्था नाजुक बनायो । अहिले विरामीको उपचार त परै जाओस छोराछोरी पाल्ने अवस्था नै कठिन भएको छ ।
विभिन्न व्यक्ति तथा संघसस्थाहरुले सहयोग गर्दै आएका छन् । वडा कार्यालय र गाउँपालिकाले असक्त अपांगताको सहयोग गर्ने वातावरण वनाएका छन् । नेपाली हट ग्रुप चितवन कार्यसमितिले ५० हजार रुपैया सहयोग गरेको छ ।
सीता विरामी पर्दा श्रीमान्ले स्याहारसुसारमै ध्यान दिनुपरेको छ । रोजगारीको लागि कतै जान सक्ने वातावरण छैन् । छोराछोरी साना छन् । पठनपाठन र लालनपालनमा कतैबाट सहयोग जुटेहुनेथियो भन्ने शंकरको अपेक्षा छ ।