पाल्पा । जापानी समाजसेवी काजुमासा काकीमी ओके बाजेले तानसेन नगरपालिका वडा न १२ मा रहेको श्री सार्वजनिक प्राथमिक विद्यालयलाई सहयोग गर्नुभएको छ ।
एक कार्यक्रमका विचमा ओकेबाजेले विद्यालयको भवन निमार्ण गर्नको लागि नगद तीन लाख रुपैया प्रदान गर्नुभएको हो । साथै उहाँले विद्यार्थीहरुलाई कापी कलम र खेलकुदका सामग्री समेत प्रदान गर्नुभयो । यसै गरी ओकेबाजेले विद्यार्थीहरुले तयार पारेको भित्ते पत्रिकाको तेश्रो अंकको समेत विमोचन गर्नुभयो ।
सो अवसरमा विद्यालय ब्यवस्थापन समितिमा अध्यक्ष रामचन्द्र नेपाललाई चेक हस्तान्तरण गर्दै ओकेबाजेले पाल्पाका विभिन्न विद्यालयहरुलाई सहयोग गरेको उल्लेख गर्नुभयो । उहाँले आउदा दिनहरुमा पनि सहयोग गर्न आफू तयार रहेको बताउनुभयो ।
सो अवसरमा विद्यालय ब्यवस्थापन समितिका अध्यक्ष रामचन्द्र नेपालले ओके बाजेको सहयोगले विद्यालयको भवन निमार्ण गर्न निकै सहयोग पुग्ने बताउदै समयमै भवन निमार्ण सम्पन्न गर्ने प्रतिवद्धता जनाउनु भयो ।
यसैगरी वडा नंं १२ का वडा अध्यक्ष मेजर सि केसीले उहाँको सहयोगमा वडाको तर्फबाट सक्दो सहयोग गरि विद्यालयको भवन निमार्ण गरिने वताउनुभयो । कार्यक्रममा विद्यालयका प्रधानाध्यापक रामकुमारी थापाले ओके बाजेले यस अगाडि पनि विद्यालयलाई सहयोग गरेको चर्चा गर्दै अहिले पनि भवन निमार्ण गर्नको लागि सहयोग गरेकोमा धन्यवाद दिनुभयो ।
सो अवसरमा समाजसेवीहरु झमानसि दर्लामी,मान बहादुर राना, भिमबहादुर रास्कोटी, शिव नेपाल,गोपाल सि आले, मान कुमारी राना, लगायतले आफ्ना भनाई राख्नु भएको थियो । विद्यालय भवन निमार्ण गर्नको लागि मानबहादुर रानाको अध्यक्षतामा समिति गठन गरिएको छ ।
