पाल्पा ,नेपाल सरकारका गृहमन्त्री र पाल्पाका स्थानीय तहका प्रमुखहरुविच परिचयात्मक तथा अन्तरक्रिया कार्यक्रम सम्पन्न भएकाे छ । रामपुर नगरपालिकाकाे आयाेजनामा गृहमन्त्री रमेश लेखकलाई स्वागत तथा पाल्पाका १० वटै पालिकाका प्रमुख तथा जनप्रतिनिधिहरु विच परिचयात्मक कार्यक्रम सहित अन्तरक्रिया भएकाे हाे ।
नगरपालिकाकाे सभाहलमा भएकाे कार्यक्रममा बाेल्दै गृहमन्त्री लेखकले स्थानीय सरकार संविधानले सबैभन्दा धेरै विश्वास गरेकाे र जिम्मेवारी बढी भएकाे सरकार भएको बताउनुभयो । जनता सबैभन्दा छिटो र सजिलो नजिक जाेडिने निकाय स्थानीय सरकार भएको बताउनुभयो । सिमित स्राेत साधनका विच काम गर्नु परे पनि उत्साह र आत्मबलका साथ जनताकाे सेवामा लाग्न आग्रह गर्नुभयो । पछिल्लो समय प्रहरी प्रति जनताकाे विश्वास बढेकाे भन्दै जनताकाे शान्ति सुरक्षाका लागि सरकार प्रतिबद्ध भएर लागेकाे उल्लेख गर्नुभयो । गृहमन्त्री लेखकले हरेक स्थानमा प्राय प्रहरी र इलाका प्रशासनकाे माग बढी आउने गरेकाे भन्दै आवश्यकता अनुसार सबै स्थामा व्यवस्था गरिने बताउनु भएकाे छ ।
कार्यक्रममा ताजसेन नगरपालिकाका नगर प्रमुख सन्ताेषलाल श्रेष्ठले ऐतिहासिक महत्त्व बाेकेका क्षेत्रकाे संरक्षण रका लागि स्थानीय सरकारकाे बचेटले मात्र सम्भव नभएको भन्दै केन्द्र सरकारले विषेश प्राथमिकता दिन आग्रह गर्नुभयो । साथै स्थानीय सरकारलाई सहज रुपमा काम गर्नका लागि संघ सरकारले सहज कानुन बनाउन आवश्यक रहेकाे बताउनुभयो । यस्तै रामपुर नगरपालिकाका नगर प्रमुख रमण बहादुर थापाले समग्र जिल्लाकाे शान्ति सुरक्षाका लागि दरबन्दी अनुसारको प्रहरी जनशक्ति खटाउन र प्रहरी चाैकीकाे स्तराेन्नती गर्न माग गर्नुभयो ।उहाँले रामपुरमा तत्काल डिएसपि पठाउन,अव्यवस्थित जग्गाको स्रेस्ता कायम भएकाेले तत्काल वेच विखन गर्नका लागि कानुनी बाटो फुकाउन ,इलाका प्रशासन कार्यालय मार्फत राहदानी र राष्ट्रिय परिचयपत्र वितरण सेवा नियमित प्रदान गर्न आग्रह गर्नुभयो ।यस्तै रम्भा गाउँपालिकाका अध्यक्ष विष्णुप्रसाद भण्डारीले रम्भाकाे हुँगि प्रहरी चाैकीकाे स्तराेन्नति संगै अन्य अस्थायी पाेष्टलाई स्थायी बनाउन माग गर्नुभयो ।साथै रम्भाकाे वडा नं.१ दुरी र सहजताका हिसाबले रामपुर पायक पर्ने भएकाले प्रशासनिक कामका लागि इलाका प्रशासन कार्यालय रामपुरबाट सेवा प्रदान गर्ने व्यवस्था मिलाउन आग्रह गर्नुभयो ।
निस्दी गाउँपालिकाका अध्यक्ष मुक्त बहादुर सारुले वेग्रह र हाेङ्सी सिमेन्ट खानीमा प्रहरी चाैकी आवश्यक रहेकाेले तत्काल स्थापना गर्न आवश्यक व्यवस्था गरिदिन आग्रह गर्नुभयो । यस्तै तिनाउ गाउँपालिकाका अध्यक्ष प्रेम श्रेष्ठले तिनाउ गाउँपालपका तराई र भारतीय सिमा क्षेत्रका मानिसको आवतजावत धेरै हुने पालिका भएकाले अपराधीक घटना र विभिन्न दुर्घटना हुने गरेकाले आवश्यक सुरक्षा र नीतिगत व्यवस्था बनाउन माग गर्नुभयो । रैनादेवि छहरा गाउँ पालिकाका अध्यक्ष रसक्माङगत भट्टराईले सालझण्डीकाे अस्थाई प्रहरी चाैकीलाई स्थायी बनाई भवन निर्माण गर्न र अर्घाखाँचीकाे पणेना र तिनगिरे संगकाे सिमाना विवाद तत्काल समाधान गरिदिन आग्रह गर्नु भएको छ ।
यसैगरी माथागढी गाउँपालिकाका अध्यक्ष यम बहादुर चिदीले गाेठादीमा रहेकाे प्रहरी चाैकी , माडी अस्थायी प्रहरी चाैकीकाे स्तराेन्नती संगै जनशक्ति थप गर्न माग गर्नुभयो। रिब्दिकाेट गाउँपालपकाका अध्यक्ष नारायण बहादुर कार्कीले फेकमा प्रहरी चाैकी स्थापना गर्न माग गर्दै सिजि सिमेन्ट उद्योगले रिब्दिकाेटबासी बढी पिडित रहेकाे भन्दै आवश्यक परिणाममुखी पहल गर्न आग्रह गर्नुभयो । रामपुर नगरपालिकाका नगर प्रमुख रमण बहादुर थापाकाे अध्यक्षतामा भएकाे कार्यक्रम उपप्रमुख बाल कुमारी थापाकाे स्वागत र प्रवक्ता एवं वडा नं.१ का अध्यक्ष कपिल बहादुर खाँणकाे सञ्चालनमा सम्पन्न भएकाे हाे ।
