एवत सारु
सिकाई प्रवर्धन परियोजना रम्भा गाउँपालिकाको आयोजनामा महिलाहरुको लागि सञ्चालन गरिएको पन्चेबाजा बजाउने तालिम सकिएको छ । सिकाई प्रवर्धन परियोजना रम्भा गाउँपालिकाको आयोजनामा रम्भा गाउँपालिका २ कोटथरका महिलाहरुको लागि सञ्चालन गरिएको १० दिने पन्चेबाजा बजाउने तालिम सकिएको हो ।
तालिममा रोशन परियार र गनबहादुर सारुले बाजा बजाउन सिकाएका थिए । तालिम समापन कार्यक्रममा प्रमुख अतिथि रम्भा गाउँपालिका अध्यक्ष विष्णुप्रसाद भण्डारीले महिलाहरुको आय आर्जन बढाउन र लोक संस्कृति जगेर्ना गर्न यस प्रकारको तालिमले सघाउने बताउँदै पन्चेबाजा बजाउने तालिम मनोरञ्जनका लागि मात्र नभएर यसले महिला सशक्तिकरण र आर्थिक सबलीकरणमा महत्वपूर्ण टेवा पु¥याउने विश्वास व्यक्त गर्नु भयो ।
कार्यक्रममा रम्भा गाउँपालिका उपाध्यक्ष राधाकुमारी श्रेष्ठ, जिल्ला समन्वय समिति पाल्पाका सदस्य भोवीसरा सारु, २ नम्बर वडाका वडा अध्यक्ष चेतबहादुर सुनारी लगायतले १० दिने बाजा बजाउने तालिम लाभदायक हुने बताउनु भयो । समापन कार्यक्रममा कोटथर महिला समूहकी अध्यक्ष दिलमाया पाडे मगरले तालिममा सिकेका कुरा व्यवहारमा लागू गर्ने प्रतिबद्धता व्यक्त गर्दै तालिमको व्यवस्थापन गरेकामा रम्भा गाउँपालिका र सिकाई प्रवर्धन परियोजनालाई धन्यवाद दिनु भयो । तालिममा २५ जना महिलाहरुको सहभागीता रहेको थियो । सहनाई, ढोलक, दमाहा, झ्याली, टेम्को, नरसिम्हा लगायतका बाजा बजाउन सिकाइएको थियो ।
समापन कार्यक्रम अगाडि प्रशिक्षार्थी महिलाहरुले बाजा बजाएर रानीबास, कोटथर र भञ्ज्याङ्गथोक गाउँ परिक्रमा गरेका थिए । कार्यक्रममा पाहुनाहरुलाई बाजाको तालमा नचाईएको थियो । रम्भा गाउँपालिकामा सिकाई प्रवर्धन परियोजना मार्फत महिला अभिभावकहरुलाई आयआर्जनका लागि कृषि, सिलाईकटाई, ब्युटिपार्लर, पन्चेबाजा लगायतका विधामा विभिन्न तालिम दिइएको परियोजनाका तालिम अधिकृत कष्ण कुवँरले बताउनु भयो । समापन कार्यक्रम परियोजनाका जीविकोपार्जन सहजकर्ता भूमिका सिंजापतीको सञ्चालन तथा जीविकोपार्जन अधिकृत टिकाराम पोख्रेलको अध्यक्षतामा चलेको थियो ।
