पाल्पा । तानसेन टुँडिखेलमा जारी प्रथम तानसेन महोत्सवको म्याद थप गर्ने विषयमा आर्थिक चलखेलको तानसेन बासीले आंशका गरेका छन् ।
तानसेन नगरपालिकाको मुुख्य आयोजना रहेको ब्यानर र प्रचार प्रसार गरिएपनि मेलाको सबै जिम्मेवारी ठेकेदार कम्पनी राजधानी राइड्स नेपालको हो ।
१० दिने मेला संचालनका लागि ठेकेदार कम्पनीले तानसेन नगरपालिकालाई रु ६१ लाख बुझाइसकेको छ । सम्झौता बमोजिमको समय पनि आज फागुन २९ गते सकिदैछ ।
तर तानसेन नगरपालिकाले ठेकेदार कम्पनीसँगको मिलेमतोमा पुुनः २ दिनको म्याद थपेको छ । यसमा सरासर आर्थिक चलखेल भएको जानकारहरुको भनाई छ ।
सम्झौता बमोजिम नगरपालिकाले प्रति दिनको ६ लाख १० हजार रुपैयाँ पाउछ । तर थपिएको २ दिनको रकम नगरपालिकाको खातामा जम्मा नहुने निश्चित छ । यसबाट पनि २ दिन मेला थपबाट आर्थिक चलखेल भएको एउटा सरल मान्छेले पनि बुझ्न सक्ने अवस्था देखिन्छ ।
मेलाको म्याद थप्ने सम्बन्धी निर्णय तानसेन नगरपालिकाको फागुन २९ गतेको कार्यपालिका बैठकले गरेको हो । तर बैठकको अध्यक्ष समेत रहनु भएका नगरपालिकाका मेयर सन्तोषलाल श्रेष्ठ आफैले गरेको निर्णयबारे जानकार छैनन् । उनले म्याद थप्ने निर्णय भएको तर अन्य विषयमा आफूजानकार नभएको भन्दै राजश्व शाखासँग बुझ्न भने ।
राजश्व शाखा झनै अन्यौल छ । यो समाचार तयार पार्दासम्म मेलाको म्याद थप र आर्थिक विषयमा भएको निर्णय के हो भन्नेबारे आफूलाई कुनै जानकारी नभएको राजश्व शाखा प्रमुख मधुसुधन घर्तीले बताए ।
तानसेन नगरपालिकाका प्रवक्ता यादवसिं कार्कीले ठेकेदार कम्पनी र तानसेन नगरपालिकाबिच भएको सम्झौताको ११ नम्बर बुँदामा बिपद् परेमा म्याद थपिन सकिने उल्लेख रहेको बताए । तर म्याद थप्दा आर्थिक व्यवस्था के हुने भन्नेबारे केही पनि उल्लेख छैन । यसर्थ पनि यो सम्झौतापत्रको प्रारम्भिक समयबाटै चलखेल भएको बुुझिन्छ ।
तानसेनको राजश्व शाखा अरु बेला कडा रहेको जनाउँछ । सामान्य नागरिकहरुलाई समेत पटक पटक दुख दिएको छ । राजश्व तिराएको छ । तर यति गम्भीर विषयमा यो शाखाले गर्ने भूमिका हेर्न तानसेनबासी आतुर छन् । पाल्पा समाचारपत्रसँगको कुराकानीमा राजश्व शाखा प्रमुख घर्तीले आफू यो बिषयमा नचुक्ने बताए । निर्णय कता के भएको छ थाहा छैन तर शाखा चुक्दैन । घर्तीले भने ।
ल मानौ विपद् पर्यो । यो बीचमा सामान्य पानी परेको एक दिन मात्रै हो । त्यस दिनलाई छुट दिने हो भने १ दिन थपे भइहाल्थ्यो । तर नगरपालिकाले २ दिन थपेको छ । यसबाट पनि आर्थिक चलखेलको शंका उत्पन्न भएको तानसेनका नागरिकहरुको बुझाई छ ।