पाल्पा । वाङमय प्रज्ञा प्रतिष्ठान, पाल्पाका अध्यक्ष गोपालप्रसाद वश्यालले आफ्ना पिता गुणाखर वश्याल र माता यमकला वश्यालको चौरासी पुजाका दिन आफ्ना अंग्रेजी भाषामा लेखिएका कविताहरूको सँगालो द जर्नी एण्ड अदर पोएम्स् को बिमोचन गरिएको छ ।
आमाबुबाको चौरासीमा उपस्थित पाहुनाहरूका विच कृतिकारका बुबाआमा, लुम्बिनी प्रदेश सभासद वीर बहादुर राना, रम्भा गाउँपालिका अध्यक्ष विष्णु भण्डारी, त्रिभुवन बहुमुखी क्याम्पसका क्याम्पस प्रमुख टंक भट्टराई, जिल्ला समन्वय समिति पाल्पाका सदस्य केशवराज खरालसहितले कृतिको बिमोचन गर्नुभएको हो ।
कृतिको बिमोचन गर्दै साँसद राना, अध्यक्ष भण्डारी र प्रमुख भट्टराईले साहित्यकार वश्यालले शिक्षा र साहित्यका क्षेत्रमा गरेको योगदान र नेतृत्वदायी भूमिकाको प्रशंसा गर्दै उहाँजस्ता सर्जकले समाजलाई असल बाटोमा लैजान मद्दत गरेको बताउनुभयो ।
नेपाली तथा अंग्रेजी दुवै भाषामा साहित्य रचना गर्ने कवि वश्यालले यस कृतिमा विभिन्न समयमा लेखिएका २७ वटा कविताहरू समावेश गरेका छन् । यी कवितामा मूलतः मानवीय समवेदना, सामाजिक सन्देश, राष्ट्रप्रेम, पेशाप्रतिको सम्मान र सामाजिक एवम् राजनीतिक विकृतिहरूमाथि ब्यंग्यात्मक प्रहार रहेको स्रष्टा वश्यालले बताउनुभयो ।
पण्डितहरूले स्वस्तिवाचन गरेर सुरू गरिएको कृति बिमोचन कार्यक्रमको सञ्चालन पोखराथोक साहित्य संगमका पूर्व अध्यक्ष हरि प्रसाद भट्टराईले गर्नुभएको थियो ।