पाल्पा । पुर्वखोला गाउँपालिकाले आफ्नो पालिका अन्तरगतका नागरिकहरुको सहज स्वास्थ्य सेवाका लागि उचित योजना सहित कार्यान्वयन गर्दै आएको छ । स्वास्थ्य शाखा मार्फत स्थानीय स्वास्थ्य चौकी र समुदाय स्तरसम्म स्वास्थ्य सेवाका कार्यक्रमहरुलाई अगाडि बढाएको गाउँपालिका गाउँपालिका अध्यक्ष नुन बहादुर थापाले बताउनुभयो । गाउँपालिका लक्षित समुदायसम्म पहुँच पुग्ने स्वास्थ्य कार्यक्रम संचालन गर्दै आएको छ ।
निःशुल्क आँखा शिविरबाट १०३८ जनाले सेवा लिए
गाउँपालिकाले यही फागुन ११ गतेदेखि १७ गतेसम्म गाउँपालिका भित्रका ६ वटा वडामै पुगेर निःशुल्क आँखा शिविर सञ्चाल ग¥यो । पुर्वखोला गाउँपालिकाको आयोजना र लायन्स लाकौल आँखा अस्पताल तानसेन पाल्पाको प्राविधिक सहयोगमा भएको शिविरबाट वडा नं. १ मा १ सय ९३, वडा नं. २ मा १७०, वडा नं. ३ मा २७५, वडा नं. ४ मा ११४, वडा नं. ५ मा १९३ र वडा नं. ६ मा ९३ जना गरी जम्मा १०३८ जना नागरिकहरुले आँखा जाँच गराएका थिए । त्यस्तै वडा नं. १ मा २१ जना, वडा नं. २ मा १३ जना, वडा नं. ३ मा ९ जना, वडा नं. ४ मा १२ जना, वडा नं. ५ मा १५ जना र वडा नं. ६ मा ११ जना गरी ८२ जना नागरिकहरुको मोतियाबिन्दुको अपरेशन गर्नुपर्ने देखिएको थियो । जसमध्ये फागुन १९ र २० गते पुर्वखोलामै पुगेर डा. सुचन कुमार पुनको नेतृत्वमा रहेको टोलीले ६४ जनाको मोतियाबिन्दुको अपरेशन गरेको र बाँकी बिरामीहरुले आफूलाई सहज हुने स्थानमा गएर अपरेशन गराउनुभएको गाउँपालिका स्वास्थ्य शाखा प्रमुख मोहन ढकालले बताउनुभयो । शिविरमा परीक्षण औषधी र शल्यक्रिया निःशुल्क रुपमा रहेको र सबै खर्च प्रवन्ध गाउँपालिकाले गरेको उहाँले बताउनुभयो ।
गाउँपालिकाले समुदाय स्तरमा रहेका बिरामीहरु सदरमुकाम वा अन्य अस्पतालमा परीक्षण र उपचार गराउन जान टाढा हुने भएकोले रोग लुकाएर वा नजचाएर बस्ने अवस्था रहने भन्दै पालिका र वडा स्तरमै बिभिन्न खालका शिविर संचालन गर्दै आएको छ । पालिका भित्रका ५ वटा वडामा महिलाको पाठेघरको क्यान्सर र महिलाको स्वास्थ्य परीक्षण शिविर संचालन भइसकेको र बाँकी रहेको वडा रिङनेरहमा पनि छिटै यो शिविर संचालन हुने बताइएको छ । आगामी दिनमा पनि समुदायको माग अनुसार शिविर संचालन गर्दै जाने प्रमुख प्रशासकीय अधिकृत सुन्दर श्रेष्ठले बताउनुभयो । छिटै गाउँपालिका स्तरीय मुटुरोग सम्बन्धी शिविर संचालनको तयारी गरिएको छ ।
जिल्लामै नमुना कार्यक्रम
स्वास्थ्य क्षेत्रमा पुर्वखोला गाउँपालिकाको बेग्लै पहिचान छ । यो पालिकामा सुरुवातको समयदेखि नै नमुना कार्यक्रम संचालन हुँदै आएको छ । सबै वडाहरुमा बर्थिङ सेन्टर संचालन गर्ने पुर्वखोला जिल्लामै पहिलो गाउँपालिका हो । पुर्वखोलामा अघिल्लो वर्षदेखि नै सुरु भएको ४० वर्ष उमेर समूह माथिका ब्यक्तिहरुमा मधुमेह र उच्चरक्तचाप सम्बन्धी स्क्रिनिङ कार्यक्रम जिल्लाकै नौलो कार्यक्रम हो । यो कार्यक्रमलाई यो वर्ष पनि निरन्तरता दिइने शाखा प्रमुख ढकालले बताउनुभयो । समुदाय स्तरमा बढ्दो रुपमा रहेको नसर्ने रोगको न्यूनीकरणका लागि यो कार्यक्रम प्रभावकारी हुने बिश्वास गाउँपालिकाले लिएको छ । त्यस्तै टिबी (क्षयरोगका बिरामीको खोजपड्ताल) को स्क्रिनिङ कार्यक्रमलाई पनि गाउँपालिकाले प्राथमिकता दिएको छ । यो कार्यक्रमलाई समुदाय स्तरसम्म पुग्ने गाउँघर क्लिनिकसम्म पनि पु¥याउने योजना रहेको ढकालले बताउनुभयो ।
यो गाउँपालिकाले वडा स्तरसम्म पनि बर्थिङ सेन्टरको ब्यवस्था गरेपछि घरमा सुत्केरी हुने महिलाहरुको संख्या सुन्य भएको छ । २०७५ सालदेखि नै पालिकाभित्रका कोही पनि महिला घरमा सुत्केरी नभएको र केही समयमै यो गाउँपालिकालाई पूर्ण संस्थागत सुत्केरी सुनिश्चित गाउँपालिका घोषणा गर्ने तयारी रहेको र यसको सम्पूर्ण प्रक्रिया पूरा भएको ढकालले बताउनुभयो । गाउँपालिकाले नियमित गर्भ जचाउने गर्भवतीहरुलाई अण्डा उपलब्ध गराउँदै आएको छ । त्यस्तै सुत्केरी गराउन ल्याउने सहयोगीलाई ५ सय र सुत्केरी महिलालाई ५ सय रुपैयाँ उपलब्ध गराउँदै आएको छ । त्यस्तै रेफर गर्नुपर्ने अवस्था आएमा गर्भवती महिलालाई एम्बुलेन्स भाडा समेत पालिकाबाट उपलब्ध गराउदै आएको छ । त्यस्तै सुत्केरीलाई खानाको ब्यवस्था पनि गरिएको छ ।
गाउँपालिकाको स्वास्थ्य शाखा मार्फत जेष्ठ नागरिकको घरदैलोमा पुगी स्वास्थ्य परीक्षण तथा औषधी बितरण कार्यक्रम पुर्वखोला गाउँपालिकाले प्रदेशमै पहिलोपटक सूरु गरेको थियो । यो वर्ष पनि उक्त कार्यक्रमले निरन्तरता पाउने बताइएको छ ।
पुर्वखोला गाउँपालिकाको बीरकोटमा निर्माणाधिन १५ शैयाको अस्पताल निर्माण कार्य झण्डै ७० प्रतिशत सम्पन्न भएको छ । यो अस्पताल निर्माण सम्पन्न भएपश्चात बीरकोट स्वास्थ्य चौकीलाई समेत सोही अस्पतालमा स्थानान्तरण गरी थप गुणस्तरीय स्वास्थ्य सेवा प्रदान गर्ने उद्देश्य रहेको गाउँपालिका अध्यक्ष नुन बहादुर थापाले बताउनुभयो ।
