पाल्पा । युनाइटेड मिसन अस्पतालमा स्वास्थ्य बीमा कार्यक्रम संचालनका लागि जिल्ला स्तरीय मानवअधिकार रक्षक सञ्जालले अस्पताल प्रशासनको ध्यानाकर्षण गराएको छ ।
उक्त कार्यक्रममा अस्पतालका प्रमुख सहित प्रतिनिधि, मानवअधिकार रक्षक सञ्जाल, बिभिन्न संघ संस्थाका प्रतिनिधि, स्थानीय बासिन्दाहरुको सहभागिता रहेको थियो । सञ्जालका संयोजक भगवान भण्डारीको नेतृत्वमा पुगेको टोलीले अस्पतालका कार्यकारी निर्देशक डा. रचेल कारख, ब्यवस्थापक जीवन भट्टराई, कर्मचारी ब्यवस्थापन प्रमुख गणेश प्रसाद घिमिरेसँग भेट गरी अस्पतालमा स्वास्थ्य बीमा कार्यक्रम संचालनका लागि रहेका जटिलताहरुको समाधान र संचालन प्रक्रियाको बारेमा छलफल गरेको हो ।
भेटघाट तथा अन्तरक्रियाका क्रममा संयोजक भण्डारीले मिसन अस्पतालमा स्वास्थ्य बिमा कार्यक्रम संचालन हुँदाको अवस्थामा धेरै गरिव तथा बिपन्न परिवारका नागरिकहरुले निःशुल्क उपचार पाउँदै आएकोमा बीमा कार्यक्रम बन्द भएपछि समस्या भएको बताउनुभयो । उहाँले मिसन अस्पताल जिल्लाकै पुरानो अस्पतालको रुपमा रहेको र यो अस्पताल प्रति धेरै बिरामीहरुको उच्च बिश्वास रहेका कारण पनि यहाँ स्वास्थ्य बीमा कार्यक्रम निरन्तर रुपमा लागू हुनुपर्ने बताउनुभयो ।
नेपाल पत्रकार महासंघ पाल्पाका निवर्तमान सचिव किरण कौशलले मिसन अस्पतालमा स्वास्थ्य बीमा कार्यक्रम संचालन गर्नुपर्नेमा जोड दिनुभयो । गैरसरकारी संस्था महासंघ पाल्पाका अध्यक्ष भेषराज तिमिल्सनाले मिसन अस्पतालले बिरामी बिरामीहरुलाई उपचार गर्दै आएकोमा यो अस्पतालप्रति धेरै बिरामीहरुको उत्तिकै बिश्वास रहेको बताउनुभयो ।
युनाइटेड मिसन अस्पतालकी कार्यकारी निर्देशक डा. रचेल कारखले यसअघि मिसन अस्पतालमा स्वास्थ्य बीमा कार्यक्रम निरन्तर रुपमा संचालन हुँदै आएकोमा बिमा बोर्डबाट पाउनुपर्ने बक्यौता रकम पाउनमा ज्यादै ढिलाई भई अस्पतालको नियमित सेवा प्रवाह प्रभावित हुने अवस्था आएपछि बिमा कार्यक्रम स्थगन गर्न बाध्य भएको बताउनुभयो ।
अस्पतालका ब्यवस्थापक जीवन भट्टराईले मिसन अस्पतालमा स्वास्थ्य बीमा कार्यक्रम संचालन हुँदा धेरै गरिव तथा बिपन्न नागरिकले निःशुल्क स्वास्थ्य सेवा पाउने भएकोले पनि यस कार्यमा संघीय, प्रदेश र स्थानीय सरकारको सहयोग र समन्वय आवश्यक रहेको बताउनुभयो । उहाँले सरकारबाट पाउनुपर्ने बक्यौता रकम समयमा प्राप्त भई आगामी दिनमा पनि सोही बमोजिम रहने अवस्था भएमा मिसन अस्पतालमा स्वास्थ्य बीमा कार्यक्रम संचालन गर्न आफूहरु तयार रहेको बताउनुभयो ।