पाल्पा । यही पुस ९ गतेदेखि १८ गतेसम्म बगनासकाली गाउँपालिका–१ चिलाङ्दी खेलमैदानमा हुने पाल्पा महोत्सवको तयारी तीव्र पारिएको छ ।
कुटुम्ब मिडिया नेटवर्क प्रालिको आयोजना र बगनासकाली गाउँपालिकाको प्रवद्र्धनमा हुने महोत्सवको प्रमुख उद्देश्य जिल्लाको समग्र पर्यटन प्रवर्धन, ब्यापार एवम् स्थानीय कला संस्कृति एवम् धार्मिक साँस्कृतिक महत्वको प्रचार प्रसारको अपेक्षा राखिएको कुटुम्ब मिडिया नेटवर्कका सञ्चालक एवम् मेला संयोजक नारायण न्यौपानेले बताउनुभयो ।
महोत्सवमा कृषि, घरेलु उद्यम, शिक्षा, प्रविधि सहित ब्यापारका गरी १ सय ५० सय बढी स्टल रहनेछन् । स्टल बुकिङ खुल्ला गरिएको उहाँले बताउनुभयो । महोत्सवमा बालउद्यान तथा फोटो प्रदर्शनी बिशेष आकर्षणको रुपमा रहने उहाँले बताउनुभयो ।
महोत्सवमा स्थानीय कला संस्कृति झ्याउरे, बालन, भजन, कौरा, मारुनी, लाखे, पञ्चेबाजा लगायत प्रर्दशन हुनेछ । महोत्सवमा कुमाल र बोटे जातिको संस्कृति समेत प्रस्तुत गरिने बताइएको छ । हरेक दिन कला केन्द्रहरुको प्रस्तुतीसँगै स्थानीय तथा राष्ट्रिय चर्चित कलाकारहरुको प्रस्तुती रहनेछ । महोत्सवमा कम्तीमा १० वटा स्टल होटल तथा रेष्टुरेन्ट रहनेछन् । होटल रेष्टुरेन्टमा स्थानीय खानाका परिकारहरु ब्यवस्था गरिनेछ । होटल तथा रेष्टुरेन्टमा स्थानीय दुनाटपरीको उपयोगलाई प्राथमिकता दिइनेछ ।
यो महोत्सवले धेरै सम्भावना हुदा हुदै पनि प्रचार प्रसारको अभावमा रहेको बगनासकाली सहित जिल्लाको पर्यटन विकासमा थप टेपा पु¥याउने बिश्वास रहेको मूल आयोजक समितिका सहसंयोजक यज्ञमूर्ति तिमिल्सिनाले बताउनुभयो ।
महोत्सवको सफलतापूर्वक सञ्चालनका लागि आयोजकले स्थानीय समुदायहरुसँग छलफल अन्तरक्रिया कार्यक्रम गरेका छन् महोत्सवको अवसरमा पुस ९ गते स्थानीय कला संस्कृति बिशेष कार्यक्रम संचालनको तयारी गरिएको बताइएको छ । महोत्सवको सफलताका लागि पालिका अन्तरगतका हरेक वडामा भेला तथा अन्तरक्रिया, सरोकारवालाहरुसँगको छलफल अन्तरक्रिया चलिरहेको महोत्सव मूल आयोजक समितिका सहसंयोजक बिष्णु प्रसाद घिमिरेले बताउनुभयो ।
महोत्सवको माध्यमबाट पाल्पाको पर्यटनमा थप टेवा पुग्ने बिश्वास आयोजकले गरेका छन् । महोत्सवको अफिसियल मिडियाको रुपमा पाल्पा समाचारपत्र साप्ताहिक रहेको छ ।
