पाल्पा । पाल्पामा पोलियो बिरुद्धको खोप अभियानबारे जिल्ला खोप समन्वय समिति, पाल्पाका पत्रकार तथा संचारकर्मी अभिमुखीकरण गरेको छ ।
जिल्ला समन्वय समितिको सभाहलमा भएको कार्यक्रममा स्वास्थ्य कार्यालय पाल्पाका प्रमुख डा. राजेन्द्रकुमार गिरीले आईपीभी खोप खोप अभियान प्रभावकारी बनाउन सबैको उत्तिकै भूमिका रहेको बताउनुभयो । उहाँले वि.स. २०७३ बैशाख महिनादेखि २०७५ असोज महिनासम्म जन्मिएका खोप अभावका कारण छुटेका बालबालिकालाई मात्र आइपीभी खोप लगाइने बताउनुभयो । उक्त अवधिका छुट भएका बालबालिको संख्या पाल्पामा ९ हजार ४ सय ६७ लाई पोलियो बिरुद्धको खोप लगाइने बताउनुभयो ।
पाल्पामा दुई चरणमा खोप अभियान सञ्चालन हुनेछ । अभियान यही जेष्ठ १३ गतेदेखि २७ गतेसम्म खोप अभियान सञ्चालन हुने बताइएको छ । यस पटक बालबालिकाले विद्यालयमै खोप लगाउन पाउने छन् । खोप केन्द्र नै विद्यालयमा बनाएर खोप लगाउने तयारी गरिएको प्रमुख गिरीले बताउनुभयो ।
अभियान पहिलो चरणमा जेठ १३ गतेदेखि २० गतेसम्म जिल्लाका ६ स्थानीय तहहरु तानसेन नगरपालिका, रिव्दीकोट गाउ“पालिका, बगनासकाली गाउँपालिका, रैनादेवी छहरा गाउपालिका, तिनाउँ गाउपालिका र माथागढी गाउपालिकामा खोप लगाइनेछ । यस्तै दोस्रो चरणमा जेठ २१ गतेदेखि २७ गतेसम्म रामपुर नगरपालिका, रम्भा गाउँपालिका, पूर्वखोला गाउपालिका र निस्दी गाउँपालिकामा खोप अभियान सञ्चालन हुनेछ । खोप लगाउनका लागि विभिन्न विद्यालयमा ४ सय ४८ खोप केन्द्र र ८१ वटा स्वास्थ्य संस्थामा केन्द्र तोकिएको छ । ५ सय २७ जना स्वास्थ्यकर्मी र ५ सय २९ जना स्वयम्सेवक परिचालन हुनेछन् ।
कार्यक्रममा जिल्ला समन्वय समितिका प्रमुख टंकनाथ खनाल, पाल्पाका प्रमुख जिल्ला अधिकारी आनन्द काफ्ले, तानसेन नगरपालिकाकी उपप्रमुख प्रतीक्षा सिंजाली, नेपाल पत्रकार महासंघ पाल्पाका अध्यक्ष रेखीराम रानालगायतले खोप अभियान सफल बनाउनुपर्ने बताउनुभयो ।
