पाल्पामा ढुंगा माटो निकासीमा सधै शंका

0
696

पाल्पामा ढुंगा माटोको निकासीमा अनियमितता रहेको विषय आज मात्रै होइन पहिलेदेखि नै चर्चा हुन्थ्यो । दैनिक सयौ टिप्परहरुले पाल्पाको सिमेन्ट उद्योगका लागि खानीबाट चुनढुंगा लैजाने गर्छन् । यसबाट फाइदा पाल्पाले खास लिन सकेको छैन । जथाभावी चल्ने टिप्परहरुका कारण जोखिम उस्तै छ । अर्कोतर्फ कमभार बहन क्षमता भएका मोटरबाटोहरू जीर्ण भइरहेका छन् । यसबाट यहा“का स्थानीय तहहरुले उचित राजश्व संकलन पनि गर्न सकेका छैन् । जिल्ला स्तरबाट यस विषयमा धेरै पटक खानी क्षेत्रमै पुगेर अनुगमन पनि हुने गरेको छ । सञ्चारमाध्यममा समाचार पनि आउँछ तर न अनुगमनको प्रतिवेदन बन्छ न त अनुगमन पछि कुनै परिवर्तन नै देखिन्छ ।

पाल्पाको टिप्पर आतंकबारे धेरै कुरा उठ्ने गर्छ । जिल्लामा प्रमुख जिल्ला अधिकारी र प्रहरी प्रमुख नयाँ आउदैपिच्छे सरोकारवालाहरुले ध्यानाकर्षण पनि गराउँछन् । प्रतिबद्धता पनि व्यक्त हुन्छ तर परिवर्तन केही हुदैन । पटक पटक छलफलमा आउने टाइम कार्ड पूर्ण रुपमा कार्यान्वयन हुन सकेको छैन । टिप्परले क्षमताभन्दा बढी लोड बोक्ने क्रम रोकिएको छैन । कुन टिप्परले क्षमता भन्दा बढी लोड बोकेको छ भन्ने मापन गर्ने कुनै उपकरण र संयन्त्र समेत छैन । ट्राफिक प्रहरीले यस्तो संवेदनशील विषयमा खास ध्यान दिँदैन । यसले यहाँको प्रहरी र ट्राफिकिय व्यवस्थापनबारे पनि प्रश्न स्वभाविक रुपमा उठाउँछ ।

खासमा यहाँको ढुंगा माटो निकासीमा चरम लापरवाही छ । हरेक जसो टिप्परले क्षमताभन्दा बढी लोड बोकेर गुडिरहेको प्रष्ट देखिन्छ । तर अनुगमन र कारवाही छैन । कसैले उजुरी गरेमा वा चासो व्यक्त गरेमा मात्रै प्रहरीले देखाउनकै लागि कारवाही गरे जस्तो गरेको पाइन्छ । अघिल्लो साता मात्रै हाम्रो सम्पादकीय टिमले बगनासकाली–१ चिर्तुङधारा जरवादीबाट लु २ ख २७३५ नं. को टिप्परले अत्याधिक लोड सहितको ढुंगा मिश्रित माटो बोकेर जाँदै गरेको बारे प्रहरीलाई जानकारी गराएपछि मात्रै उक्त टिप्परलाई नियन्त्रणमा लिएको थियो । सोही दिन २५ भन्दा बढी टिप्पर सोही ठाउँबाट उत्तिकै लोड सहित रुपन्देही झरेका थिए । तर एउटा पनि टिप्पर जरिवाना वा कारवाहीमा परेनन् । त्यस दिन मात्रै हैन हरेक दिन यसैगरि ढुंगा माटोको निकासी भइरहेको छ । व्यवासायीहरुले खुलेआम राजमार्गका प्रहरीहरुसँगको आर्थिक लेनदेनको विषयलाई उठाउने गरेका छन् ।

यसबारे प्रहरी प्रमुखको गम्भीर ध्यानाकर्षण हुनुपर्छ । राजमार्गमा प्रहरी इन्चार्जहरुको बढी आकर्षण देखिनु, एउटै व्यक्ति लामो समयसम्म एकै स्थानमा इन्चार्जको रुपमा रहिरहनु र टाठाबाठाहरुले इन्चार्जको जिम्मेवारी पाउनु लगायतका विषयमा अति नै सम्वेदनशील हुनु आवश्यक छ । नत्र दिनेहरू दिन्छौ भनिरहने र लिएका भनिएकाहरुले लिएका छैनौं भनेर उम्किरहने अवस्था सधै रहिरहन्छ । यसबारे गम्भीर अनुसन्धान र कारवाहीको खाँचो छ ।

पाल्पा समाचारपत्र साप्ताहिक वर्ष १३ अंक २ को सम्पादकीय

LEAVE A REPLY

Please enter your comment!
Please enter your name here