पाल्पा । केही वर्ष अघिसम्म जम्मा बिद्यार्थी संख्या ५ मा झरेपछि बिद्यालय बन्द हुने स्थितिमा पुग्यो । स्थानीय युवा समाजसेवी, शिक्षासेवी सबैले छलफल गरे । बिद्यालयलाई कसरी प्रभावकारी रुपमा संचालन गर्न सकिन्छ भन्नेबारे प्रसस्त छलफल भयो ।
सबैको सहमतिमा बिद्यालय गाउँलेहरुका लागि पायक पर्ने स्थानमा सार्ने तयारी गरियो । माथागढी गाउँपालिका–१ चिदीपानीको बरपोखरीमा संचालन हुँदै आएको उक्त ज्ञानोदय आधारभूत विद्यालय २०७८ साल साउन ११ गते सोही वडाको एक्लेवरमा स्थानान्तरण गरियो ।
बिद्यालय नयाँ स्थानमा सारेपछि सबै सरोकारवालाहरुको अग्रसरतामा बिद्यालयमा बिद्यार्थी संख्या बढ्न थाले । शिक्षक, अभिभावक, जनप्रतिनिधि र सरोकारवालाहरुको संयुक्त पहलकै कारण यो विद्यालय अहिले जिल्लामै नमुना बनेको छ । २०३० सालमा स्थापना भएको उक्त बिद्यालयले हालै स्वर्णमहोत्सव कार्यक्रम समेत गरेको छ ।
अहिले १ सय ७५ जना विद्यार्थी रहेको बिद्यालयका प्रधानाध्यापक बिजयदीप पन्थीले बताउनुभयो । अघिल्लो वर्ष यो बिद्यालयमा १ सय ५३ जना बिद्यार्थी थिए । चालु शैक्षिक सत्रबाट बिद्यालयमा कक्षा ७ को अध्यापन पनि सुरू भएको छ । बिद्यार्थी संख्या बढ्दै गएका छन् ।
अहिले नयाँ भर्नामा कतिपय बिद्यार्थी नीजि स्कुलबाट पनि भर्ना हुन आएको प्रधानाध्यापक पन्थीले बताउनुभयो । हाल यो बिद्यालयमा ४ जना दरबन्दी संघीय अनुदान, पालिका अनुदानमा २ जना, नीजि स्रोतमा २ जना, सिकाई केन्द्रमा १ जना र कार्यालय सहयोगी २ जना कार्यरत छन् । नर्सरीदेखि कक्षा ७ सम्म नै अंग्रेजी माध्यममा पठनपाठन हुदै आएको प्रअ पन्थीले बताउनुभयो ।
बिद्यालयले गुणस्तरीय शिक्षाका अलावा बिद्यालयमा रचनात्मक कार्यक्रमहरू समेत गर्दै आएको छ । हरेक शुक्रवार २ बजेपछि बिद्यालयमा रचनात्मक कार्यक्रम र प्रतियोगिताहरू हुँदै आएको र बिद्यार्थीहरुको पनि सक्रिय सहभागिता रहँदै आएको प्रअ पन्थीले बताउनुभयो ।
एक्लेवरमा माथागढी बहुउद्देश्यीय सहकारी संस्थाको भवनमा अस्थायी कक्षाकोठा व्यवस्थापन गरि अहिले बिद्यालय संचालन गरिएको हो । विद्यालय संचालनका लागि सहकारीले निःशुल्क रुपमा भवन उपलब्ध गराएको थियो । अघिल्लो वर्ष काजु मासा काकिमी ओके बाजेको पहलमा ३७ लाख आर्थिक सहयोगमा ४ कोठे पक्की भवनको निर्माण भएको छ । त्यस्तै राष्ट्रपति शैक्षिक सुधार कार्यक्रमबाट ५० लाख रुपैयाँको लागतमा अर्को भवन निर्माण कार्य चलिरहेको र भवन निर्माण कार्य अन्तिम चरणमा पुगेको उहाँले बताउनुभयो । उहाँले बिद्यालयमा हालै बालमञ्च गठन गर्ने कार्य सकिएको र बालमञ्च मार्फत बिद्यालयमा बालबालिकासँग सम्वन्धित कार्यक्रमहरू सञ्चालन गर्ने तयारी रहेको बताउनुभयो ।
माथागढी गाउँपालिका वडा नं. १ का अध्यक्ष राजकुमार पन्थी यो बिद्यालयको बिद्यालय व्यवस्थापन समितिको अध्यक्षको रुपमा रहनुभएको छ । अध्यक्ष पन्थीले यो बिद्यालयको आजको सफलताको अवस्थासम्म आइपुग्नुमा सबै पक्षको सहयोगको प्रतिफल भएको बताउनुभयो । उहाँले बिद्यालयलाई आगामी दिनमा थप समयसापेक्ष बनाउँदै प्रविधिमैत्री शिक्षा प्रदान गर्दै अगाडि बढाउने योजना रहेको अध्यक्ष पन्थीले बताउनुभयो ।
