रिब्दीकोटको वडा वडामा सार्वजनिक सुनुवाई

0
235

पाल्पा । स्थानीय समुदायको जनगुनासो सुन्ने र सम्बोधन गर्ने हेतुले रिब्दीकोट गाउँपालिकाले वडा वडामा सार्वजनिक सुनुवाईको अभ्यास गरेको छ । वडागत रुपमा सार्वजनिक सुनुवाई सकिएपछि पालिका स्तरीय सार्वजनिक सुनुवाई हुने पालिका अध्यक्ष नारायण बहादुर कार्कीले बताउनुभयो । उहाँले पालिकाले गरेको यो अभ्यासबाट गाउँटोलका समस्या पालिकासम्म आउने र आफूलाई समस्या समाधानका लागि सहज हुने भएकोले यो अभ्यास थालिएको बताउनुभयो ।

हालसम्म २ वटा वडामा सार्वजनिक सुनुवाई सकिएको छ । भैरवस्थान र पालुङमैनादीमा सकिएको र अन्य वडाहरुमा पनि क्रमशः हुने पालिकाले जनाएको छ । गाउँपालिकाका प्रमुख प्रशासकीय अधिकृत मदन अर्यालले आफू दुई वटै कार्यक्रममा सहभागी भई जनताका समस्या सुन्ने जवाफ दिने मौका पाएको बताउनुभयो । सुनुवाईका क्रममा स्थानीय नागरिकहरुले योजना सम्झौता तथा फरफारक प्रक्रिया अलि झण्झटिलो भएकोले सहज बनाउनुपर्ने, योजना छनौटका क्रममा नगरि नहुने योजनाहरुलाई प्राथमिकता दिनुपर्ने, विदेशबाट फर्केका युवाहरुलाई स्वदेशमै कसरी स्वरोजगार बनाउने भन्नेमा पालिकाको ध्यान जानुपर्ने, योजनाहरुको अनुगमन र निरीक्षण समयमै गर्नुपर्ने लगायतका सुझावहरू प्राप्त भएको उहाँले बताउनुभयो ।

वडा नं. ४ भैरवस्थानमा भएको कार्यक्रममा वडाअध्यक्ष सोमकुमार कार्कीले वडाको हालसम्मको प्रगति अवस्था प्रस्तुत गर्नुभएको थियो । कार्यक्रममा गाउँपालिकाका प्रमुख प्रशासकीय अधिकृत मदन अर्यालले यसप्रकारको कार्यक्रमले वडाले सम्पन्न गरेका योजनाहरुबारे जनतालाई पनि थाहा हुने र स्थानीय समुदायका समस्याहरू स्थानीय सरकारसम्म राख्नका लागि सहज हुने बताउनुभयो । उहाँले सार्वजनिक सुनुवाई नागरिकको सूचनाको हक स्थापित गर्न सहज हुने समेत बताउनुभयो ।

गाउँपालिकाका लेखा अधिकृत मन्जु पन्थीले वडा कार्यालयबाट गरिएका कामको बारेमा जानकारी गराउँदै उपभोक्ताहरूले काम गर्दा आफुलाई परेको समस्याहरू बारेमा बोल्ने गुनासो गर्ने र सुझाव राख्ने ठाउँभनेको सार्वजनिक सुनुवाइ कार्यक्रम भएकाले प्रश्न उठाउने र त्यसको जवाफ दिने लिने ठाउँ पनि सार्वजनिक सुनुवाई भएकोले उपभोक्ताहरूले खुलेर प्रश्न गर्न सक्नुपर्ने बताउनुभयो ।

रिब्दिकोट गाउपालिकाका योजना अधिकृत काशीनाथ आचार्यले उपभोक्ता समितिले योजनाको कामगर्दा लागत अनुमानमा राखिएको इष्टिमेण्ट अनुसारको काम गरे मुल्यांकन गर्दा समस्या नहुने बताउनुभयो । कार्यक्रममा निवर्तमान वडाअध्यक्ष दुर्गाप्रसाद खनाल, पत्रकार नवराज ज्ञवाली,सामाजिक अभियन्ता दुर्गाबहादुर पोखरेल, कुखुरेढाप लिफ्ट खानेपानी तथा सरसफाइ उपभोक्ता समिति अध्यक्ष माधव प्रसाद पोखरेल, महेन्द्र जनता प्रावि प्रधानाध्यापक चन्द्र प्रसाद गौतम,टोल विकास संस्था अध्यक्ष विरेन्द्र मिधुन लगायतले सुझाव सल्लाह राख्नुभएको थियो ।

वडा नं. ७ पालुङमैनादीमा पनि सार्वजनिक सुनुवाई कार्यक्रम सम्पन्न भएको छ । कार्यक्रममा स्थानीय दोलख बहादुर कार्की जनक आचार्य योजना,खड्का बहादर थापा, नारायण बहादुर कुवर राम बहादुर कुवर,कृष्ण कुवर कमला लाम्टाङगे शिव कुवर लगायतले प्रश्न तथा सुझाव राख्नुभएको थियो । जिज्ञाशाहरुको जवाफ रिब्दीकोट गाउपालिकाका योजना शाखा प्रमुख काशीनाथ आचार्य, स्वास्थ्य शाखा प्रमुख सुनिल अधिकारी पञ्जीकरण सेवा इकाईका सिर्जना नेपाल प्राविधिक मकर गाहाले दिनुभयो ।

गाउँपालिका अध्यक्ष नारायण बहादुर कार्कीले स्थानीय सरकारवाट सञ्चालित विकास कार्यक्रम उपलब्ध सेवा, वस्तु र सुविधा सार्वजनिक गरी त्यस्ता विषयका सम्वन्धमा सार्वजनिक थलोमा सेवाग्राही नागरिकले उठाएका प्रश्नहरुमा स्पष्टता ल्याउने र नागरिकबाट प्राप्त रचनात्मक सुझावलाई ग्रहण गर्नका लागी यो कार्यक्रम वडामै राखिएको बताउनुभयो ।

कार्यक्रममा गाउँपालिकाका प्रमुख प्रशासकीय अधिकृत मदन अर्यालले गाउँपालिकाले प्रवाह गरेको सेवा, सुविधा सेवा प्रवाहका क्रममा भएका समस्या र समाधानका विषयमा कार्यक्रम गरिएको हुँदा सकारात्मक सल्लाह र सुझावको अपेक्षा गरिएको बताउनुभयो ।

वडा अध्यक्ष दान बहादुर कुँवरले वडामा सञ्चालित योजना र योजनाहरुको अप्रगति अवस्थाबारे स्थानीयलाई जानकारी गराउँदै कार्यक्रममा उठेका जनगुनासा, सल्लाह, सुझावका आधारमा भावी नीति तथा योजना सञ्चालन गर्ने प्रतिबद्धता जनाउनुभयो ।

LEAVE A REPLY

Please enter your comment!
Please enter your name here